Colosenses 3 - CHUYA QELLQA La Biblia en Quechua de Ayacucho 2012

¹ Sichum Cristowan kawsarichisqa kaspaqa hanaq pachapi, Diospa alleq lawninpi Cristopa tiyasqanpi kaqkunatayá maskaychik.

² Chaynaqa, amayá kay pachapi kaqkunallapiqa piensaychikchu, piensaychikqa hanaq pachapi kaqkunapiyá.

³ Qamkunaqa huchapaqqa wañurunkichikñam, kawsaynikichikqa Cristopim pakasqa kachkan, chaytaqa Diosmi ruwarun.

⁴ Qamkunapa kawsaynikichikqa Cristom, pay rikurimuptinmi qamkunapas paywan kuska kancharichkaqña rikurimunkichik.

Ñawpaq vidamantawan musoq vidamanta

⁵ Chaynaqa, aychapa mana allin ruway munayninkunatayá wañuchiychik: Amayá huchapakuychikchu, amayá millakuypaq kaqkunataqa ruwaychikchu, amayá mana allin munaywanqa aysachikuychikchu nitaq intuchikuychikchu, amataqyá qollqella kuyaqqa kaychikchu, (qollqe kuyayqa idolokuna yupaychay hinam).

⁶ Tukuy chaykunata ruwaspa mana kasukuqkunamanmi Diosqa llumpay castigonta kachaykunqa.

⁷ Qamkunapas ñawpaq kawsakuynikichikpiqa chaynata ruwaspam kawsarqankichik.

⁸ Kunanqa qonqaychikñayá: Piñakuyta, piñasqalla kayta, mana allinllapi kawsayta, insultanakuyta, asipayanakuyta, mana allin rimayta,

⁹ amataqyá llullakunataqa rimaychikchu. Ñawpaq imaynam kawsaynikichiktawan tukuy mana allin ruwaynikichiktaqa saqerunkichikñam,

¹⁰ musoq runa hinañam aswan-aswanraq musoqyachisqa kachkankichik, unanchaqnikichikman rikchakunaykichikpaq, chaynapi payta allinta reqsinaykichikpaq.

¹¹ Kunanqa manam imananñachu judío otaq mana judío kaypas, qari kayninpi señalasqa otaq mana señalasqa kaypas, huklaw nacionniyuq kaypas, mana leeq kaypas, esclavo kaypas otaq libre kaypas, tukuy imamantapas allinqa Cristollam, payqa lliw iñiqkunapim kawsachkan.

¹² Diosmi kuyasusqaykichikrayku akllasurqankichik payllapaqña kanaykichikpaq, chaynaqa musoq pachawan pachakuchkaq hinayá pachallikuychik: Allin kaqkuna ruwaywan, llakipayakuywan, sumaq sonqo kaywan, uchuychakuywan, llampu sonqo kaywan hinaspa pacienciakuywan.

¹³ Huknikichikmanta huknikichikkamayá aguantanakuychik pipapas quejan kaptinqa pampachanakuykuychikyá, imaynam Señorpas pampachasusqaykichikman hinayá qamkunapas ruwaychik.

¹⁴ Tukuymanta llalliqtaqa kuyakuywanyá pachallikuychik, kuyanakuymi allin huklla kaytaqa ruwawanchik.

¹⁵ Cristopa hawkayayninyá sonqoykichikpi munaychakuchun, Diosqa qayasurqankichik huk cuerpolla kanaykichikpaqmi. Chaynaqa, agradecekuqyá kaychik.

¹⁶ Cristopa yachachikuyninkunayá sonqoykichikpi llimparichun. Allin yachaywanyá sapakama yachachinakuspa kallpanchanakuychik. Tukuy sonqoykichikwanyá Diosman graciasta qostin takiychik, himnokunata hinaspa Espiritumanta kaq takikunata.

¹⁷ Tukuy imata ruwaspapas otaq rimaspapas Señor Jesuspa sutinpiyá ruwaychik, chaykunataqa ruwaychik Cristontakama Dios Taytaman graciasta qospa.

Iñiqkunapa imayna kawsanankumanta

¹⁸ Casada warmikuna, Señorman iñisqaykichikraykuyá qosaykichikta kasukuychik.

¹⁹ Qosakuna, warmikichikta kuyaychik, amayá nanay simikichikwanqa qaqchakachaychikchu.

²⁰ Churikuna, tayta-mamaykichikta tukuy imapi kasukuychik, chaynatam Señorqa munan.

²¹ Tayta-mamakuna, ama piñachiychikchu wawa-churikichikta chaynapi ama hukmanyarunankupaq.

²² Esclavokuna, kay pachapi patronnikichikta imapipas kasukuychik, amayá qawasuptillaykichikchu allintaqa ruwaychik, aswanqa Señorta manchakuspayá tukuy sonqowan kasukuychik.

²³ Tukuy imatapas ruwaspaykichikqa Señorninchikpaq ruwachkaq hinayá ruwaychik, amayá runapaq hinachu.

²⁴ Yachasqaykichikpi hinapas Señorninchikmantam tupasuqnikichik herenciataqa chaskinkichik. Qamkunaqa Señorninchik Cristotam servichkankichik.

²⁵ Pipas mana allin ruwaqmi ichaqa mana allin ruwasqanmanta pagonta chaskinqa, Diosqa mana pimanpas sayapakuspam juzgan.