Cantares 8 - CHUYA QELLQA La Biblia en Quechua de Ayacucho 2012

¹ Amalaya ñoqapa turiy kawaq, mamaypa ñuñunwan qespichisqa, callepi tupaspa muchaykuptiy mana pipas burlakuwananpaq.

² Mamaypa wasiymancha pusaykuykiman, qamcha chaypi yachachiwankiman. Ñoqañataqcha granadaykunapa rurunmanta ruwasqa miski asnaq vinota tomachikiman.

³ Ichoq brazonyá umaypa ukunpi kachun, alleq brazonwanñataqyá abrazawachun.

Qarim nin:

⁴ Jerusalenpi sipaskuna, prometeykuwaychik, Kuyakusqayta puñusqanmanta ama rikchachinaykichikpaq, munasqankama puñukuchun.

Soqta kaq taki Takiqkunam ninku:

⁵ ¿Pitaq wak warmiqa kuyay yananman hapipakuykuspa chunniqmanta hamuchkan? Manzana sachapa sikinpim rikchachirqayki, chaypim mamayki dolorwan hapichikurqa, chaypim mamayki wachakusurqanki.

Qarim warminta nin: Warmim qosanta nin:

⁶ Sonqoykipiyá marcata hina churaykuway, brazoykipiyá marcata hina churaykuway; kuyakuyqa wañuy hina atiyniyuqmi, celoso kaypas wañuy hina nanakuqmi. Lenwachkaq nina hinam cheqap kuyakuyqa, Diospa kawsaq ninan hinam cheqap kuyakuyqa.

⁷ Maynaña achka yakupas manam kuyakuytaqa wañuchinmanchu, mayukunapas manam kuyakuytaqa chinkachinmanchu. Sichum pipas tukuy kapuqninwan kuyakuyta rantiy munaqqa, runakunapa llumpay asipayasqancha kanman.

Takiqkunam ninku:

⁸ Ñoqaykupam kapuwachkanku manaraq ñuñuyuq sullka panichayku. ¿Imatataq paniykuwan ruwasaqku pipas payman yaykupakuwan hamuruptin?

⁹ Sichum pay perqa kaptinqa hawanpich qollqemanta palaciota ruwaruymanku, punku kaptinpas, cedro tablakunawancha pacharachiymanku.

Warminmi qosanta nin:

¹⁰ Ñoqaqa kani hatun perqa hinam, ñuñuykunapas iskay torrekuna hinam. Chayraykum kuyakusqaypa qayllanpi kusikuyta tariruniña.

¹¹ Baal-hamón lawpim Salomonpa uvas huertan kapurqa, chay huertantam cuidaqkunaman qoykurqa, hinaptinmi paykunaqa cosecha tiempo chunka kilo qollqeta sapakama pagarqaku.

¹² Salomón, chunka kilo qollqekiqa qampaqyá kachun, iskay kilo qollqeñataqyá huerta nanachikunapaq kachun. Ñoqam ichaqa kikiypa uvas huertayta nanachikusaq.

Qarim warminta nin:

¹³ Huertakunapi munaychakuq kuyakusqalláy, amistadnikikunam simikita uyarinku. ¡Uyariykachiwayá ñoqamanpas!

Warmim qosanta nin:

¹⁴ Kuyasqalláy, utqaymanyá kallpamuy, miski asnaq sachakunapa chawpinta kallpaq luwichu hinayá kallpamuy, uña taruka hinayá pawamuy.