Cantares 1 - CHUYA QELLQA La Biblia en Quechua de Ayacucho 2012

¹ Salomonpa qellqasqan sumaq taki.

Punta kaq taki Warmim nin:

² ¡Ay, imaynaraq simikiwan muchaykuwankiman! kuyakuynikiqa vinomantapas aswan miskim.

³ Perfumekikunapas miski-miski asnariqmi, sutikipas tallisqa perfume hinaraqmi, chayraykum sipaskuna kuyasunki.

⁴ ¡Hakuchik, chaylla pusakuway! ¡Reynilláy, cuartoykiman pusakuway! Ñoqaykuqa sinchillatañam qanwan kusikusaqku, vinomantapas mastaqa kuyakuynikitam yuyarisaqku. Chayraykum sipaskuna anchata kuyasunki.

Takiqkunam ninku: Warmim nin:

⁵ Jerusalenpi warmikuna, kuyaychallapaq yanacham kani, Cedarpa carpankuna hina, Salomonpa wasinpi cortinakuna hina.

⁶ Amayá yanacha kasqaytachu qawaychikqa, nitaq intipa yanayarachisqan aychaytachu. Turiykunam ñoqapaq piñakuruspanku uvas chakrata cuidachiwarqaku, chaynapim kikiypa uvas huertaytaqa mana waqaycharqanichu.

⁷ Ancha kuyakusqalláy, willaykullaway: ¿Maypitaq michinki ovejaykikunata? ¿Maypitaq chawpi punchawta samanki? ¿Imanasqataq michiqmasikikunapa ovejankunapa chawpinpi yanqa purisaq?

Takiqkunam ninku:

⁸ Llapa warmikunamanta kuyayllapaq warmicha, mana yachaspaykiqa, ovejakunapa yupinta qatipay; michiqkunapa hatusninpa waqtampi cabrachaykikunata michiy.

Qarim nin:

⁹ Ancha kuyakusqalláy, ñoqapaqqa qamqa kanki Faraonpa carretan aysaq sumaq yeguacha kaqllam.

¹⁰ ¡Ima sumaqmi aretekikunapa chawpinpi uyaykipas! ¡Mayna kuyayllapaqmi collarnikikunapa chawpinpi kunkaykipas!

¹¹ Qorimanta alhajakunatam ruwapusqaykiku, qollqewan adornasqatam ruwapusqaykiku.

Warmim nin:

¹² Mesanpi rey tiyaykuptinmi, perfumenñataq miskillataña asnarirqa.

¹³ Ñoqapaqqa kuyakusqayqa ñuñuykunapa chawpinpi mirra wayqacha hinaraqmi.

¹⁴ Kuyakusqayqa ñoqapaqqa En-gadi lawpi uvas huertakunapa chawpinpi alheña waytacha kaqllaraqmi.

Qarim nin:

¹⁵ ¡Mayna kuyapam kanki kuyakusqalláy! Mayna kuyapam kanki, ñawikikunapas iskay palomakuna hinaraqmi.

Warmim nin:

¹⁶ Kuyakusqalláy, ¡mayna kuyapam kanki! ¡Mayna kuyayllapaqmi kanki! Verde qorakunam puñunanchikpas.

Qarim nin:

¹⁷ Wasinchikpa pilarninkunapas cedrokunam, wasinchikpa qatanpas cipreskunam.