Apocalipsis 2 - CHUYA QELLQA La Biblia en Quechua de Ayacucho 2012

Éfeso llaqtapi kaq iglesiaman cartasqan

¹ Éfeso llaqtapi iglesiapa angelninman kaynata qellqay: Qanchis chaskakunata alleq makinpi hapiqmi hinaspa qorimanta qanchis candelabrokunapa chawpinpi puriqmi kaynata nin:

² Ñoqaqa yachanim imam ruwasqaykita, yachanitaqmi llumpay llamkasqaykitawan hinaspa pacienciayuq kasqaykitapas. Yachanitaqmi mana allin ruwaqkunata mana aguantay atisqaykitapas. “Apostolmi kani” niqkunatapas allinta qatipaykuspaykim llulla kasqankuta hayparurqanki.

³ Ñakarispapas pacienciakurqankim, ñoqaraykutaqmi mana pisipaspa llumpa-llumpayta llamkarqanki.

⁴ Ichaqa kaymi contraykipi kachkan: Manañam puntata hinañachu kuyawanki.

⁵ Chaynaqa, maymantam wichisqaykita yuyarispayá Diosman kutirikuy, hinaspayki punta ruwasqaykikunata huktawan ruway, sichum mana wanakuptikiqa qanman chaylla kutirimuspaymi candelabroykita maymi kasqanmanta qechurusaq.

⁶ Ichaqa allintam kayta ruwanki, qamqa Nicolaita sutiyuq runakunapa ruwasqantam ñoqa hina cheqninki.

⁷ Pipas uyarikuqqa, iglesiakunaman Espiritupa nisqanta uyarichun. Haykam venceqmanqa kawsachikuq sachapa ruruntam mikunanpaq qosaq. Chay sachaqa kachkan Diospa huertanpa chawpinpim, nispa.

Esmirna llaqtapi kaq iglesiaman cartasqan

⁸ Esmirna llaqtapi iglesiapa angelninman kaynata qellqay: Punta kaqmi, Qepa kaqmi, wañus-qanmanta kawsarimuqmi kaynata nin:

⁹ Ñoqaqa yachanim ruwasqaykikunatawan ñakarisqaykita hinaspa wakcha kaynikitapas, Diospaqmi ichaqa apu kachkanki. Yachanitaqmi judiom kani niqkunapa kamisusqaykitapas, paykunaqa manam judiochu aswanqa Satanaspa sinagoganmi.

¹⁰ Amayá manchakuychu ñakarinaykimantaqa, wakiqnikichiktam pruebasqa kanaykichikpaq carcelman diablo wichqachisunkichik; chunka punchawmi ñaka-rinkichik. ¡Wañukunaykikamayá qaqa hina sayay! Hinaptinqa ñoqam qosqayki kawsay coronata.

¹¹ Pipas uyarikuqqa, iglesiakunaman Espiritupa nisqantayá uyarichun. Haykam venceqkunaqa iskay kaq wañuypiqa manam wañunqachu, nispa.

Pérgamo llaqtapi kaq iglesiaman cartasqan

¹² Pérgamo llaqtapi iglesiapa angelninman kaynata qellqay: Iskay filoyuq espadayuqmi kaynata nin:

¹³ Ñoqaqa yachanim imam ruwasqaykitawan hinaspa Satanaspa trononpa kasqanpi yachasqaykitapas. Chaywanpas qaqa hina sayaspam qatiwachkanki. Chay llaqtapim tukuy sonqonwan serviwaqniy Antipasta wañurachirqaku, ichaqa chaykunawanpas iñiynikichiktaqa manam negarqankichikchu.

¹⁴ Ichaqa kay aslla kaqkunam contraykipi kachkan: Hinallam hatallichkanki Balaampa yachachisqanman hina ruwaqkunata. Balaammi umacharqa Balacta Israelpa mirayninkunata huchallichinanpaq. Chaymi Israelpa mirayninkunaqa idolokunaman ofrecesqa aychata mikuspanku waqllikuspa huchallikurqaku.

¹⁵ Kachkantaqmi Nicolaita sutiyuq runakunapa yachachikuynin mana saqey munaqkunapas.

¹⁶ Chaynaqa, huchaykimantayá wanakuy, mana wanakuptikiqa chaylla qanman hamuruspaymi simiymanta lloqsimuq espadawan paykunapa contranpi peleasaq.

¹⁷ Pipas uyarikuqqa, iñiqkunaman Espiritupa nisqanta uyarichun, venceq-manqa Diospa apachimusqan pakasqa maná sutiyuq mikuytam mikuchisaq hinaspam yuraq rumichata qosaq. Chay rumichapim musoq suti qellqasqa kanqa, chaytaqa manam pipas reqsinmanchu aswanqa chaskiqllanmi, nispa.

Tiatira llaqtapi kaq iglesiaman cartasqan

¹⁸ Tiatira llaqtapi iglesiapa angelninman kaynata qellqay: Kancharichkaq nina hina ñawiyuq hinaspa lluchkayachisqa bronce hina chakiyuq Diospa Churinmi kaynata nin:

¹⁹ Ñoqaqa reqsinim tukuy ruwasqaykikunata, kuyakuynikita, iñiynikita, servikuynikita. Reqsinitaqmi pacienciawan qepa kaq ruwasqaykikunaqa punta kaqmantaqa aswan allinraq kasqantapas.

²⁰ Ichaqa kaymi contraykipi kachkan: Diosmanta willakuqmi kani niq Jezabel warmitam hatallichkanki. Paymi yacha-chispan pantachin serviqniykunata hucha-pakuykunapi purinankupaq hinaspa idolokunaman ofrecesqa aychata miku-nankupaq.

²¹ Jezabelmanqa qorqanim tiempota huchankunamanta wanakunanpaq, ichaqa manam munanchu chuchumika kaynin saqeyta.

²² Jezabeltaqa kunanpunim llumpayta onqorachisaq, ñakarichisaqtaqmi paywan waqllikuqkunatapas, Jezabel hina mana wanakuptinkuqa chaynatam ruwasaq.

²³ Wawankutapas wañurachip-tiymi llapallan iglesiakuna yachanqaku yuyaymanayninkutapas chaynataq son-qonkutapas reqsiq kasqayta, sapakamamanmi ruwasqaykichikman hina qosqaykichik.

²⁴ Wakiqnikichik Tiatirapi kaqkunamanñataqmi nikichik: Qamkunaqa Jezabelpa yachachisqantaqa manam kasukurqankichikchu, manataqmi Satanaspa pakasqa hatun yachachikuynin nisqankutapas chaskirqankichikchu. Chaymi qamkunamanqa imapas sasa ruwaytaqa mana kamachisqaykichikchu.

²⁵ Ichaqa imam kapusuqnikichiktam kutimunaykama hatallinaykichik.

²⁶ Haykam venceqkunamanqa hinaspa tukupayninkama munasqayta ruwaq-kunamanqa atiytam qosaq nacionkunapi munaychakunankupaq,

²⁷ imaynam Taytay ñoqamanpas atiyta qowarqa, chaynam paykunapas fierro tawnawan nacionkunapi munaychakunqaku, allpa mankata pakipachkaq hinam pakipanqaku,

²⁸ qosaqtaqmi achikyaq chaskakunatapas.

²⁹ Pipas uyarikuqqa, iglesiakunaman Espiritupa nisqantayá uyarichun, nispa.