Apocalipsis 16 - CHUYA QELLQA La Biblia en Quechua de Ayacucho 2012

Piñakuy copakunamanta

¹ Templomantam huk hatun qaya-kuyta uyarirqani, qanchis angelkunatam kaynata nimurqa: Rispayá Diospa piñakuyninwan huntasqa qanchis copakunata allpa pachaman tallimuychik, nispa.

² Punta kaq angelmi rispan copa apasqanta kay pachaman talliykurqa, hinaptinmi uta hina sinchi nanachikuqllaña onqoy hamururqa, haykam manchakuypaq animalpa marcan marcayuq hinaspa imagennin yupaychaq runakunaman.

³ Iskay kaq angelpas copa apasqantam lamar qochaman talliykurqa, hinaptinmi lamar qochapi yaku, wañusqa runapa yawarninman tikrakururqa, chaymi yakupi kawsaq tukuy rikchaq animalkunapas wañururqaku.

⁴ Kimsa kaq angelpas copa apasqanta mayukunapa hawanman pukyukunapa hawanman talliykuptinmi yawarman tikrakururqa.

⁵ Chaymantam yaku kama-chiq angelpa kayna nimusqanta uyarir-qani: “Señorlláy, qamqa chuyam kanki, qamqa ñawpaqpas, kunanpas, chuya Diosmi kanki, qamqa allin juzgaqmi kanki.

⁶ Chay juzgasqayki runakunaqa qamllapaqña kawsaqkunatam wañuchirqaku, profetaykikunapa yawarnintam chaqchurqaku, chayna ruwasqankumantam paykunamanpas yawarta upyarachinki, paykunaqa chaytam munarqaku”, nispa.

⁷ Altarmanta lloqsimuq huk qayakuytam uyarirqani, chay qayakuymi kaynata nirqa: “Arí, Tukuy Atiyniyuq Señor Diosnilláy, qamqa allintapunim hinaspa cheqaptapunim juzganki”, nispa.

⁸ Tawa kaq angelpas copa apasqantam intipa hawanman talliykurqa, hinaptinmi intiman atiy qosqa karqa rupayninwan runakunata kañarunanpaq.

⁹ Chaymi llapallan runakuna kañasqa karqaku, ichaqa manam Diosmanpas kutirikurqakuchu nitaqmi yupaycharqakuchu, aswanraqmi paykunaqa kay castigokuna apachimuq Diostapas mana allinkunata rimaspanku kamirqaku.

¹⁰ Pichqa kaq angelpas copa apasqantam manchakuypaq animalpa trononman talliykurqa, hinaptinmi munaychakuynin tutayarurqa, chaymi llapa runakuna nanaywan qallunkutapas kachukurqakuraq,

¹¹ chaywanpas mana allin ruwayninkumantaqa manam wanakurqakuchu, paykunaqa aswanraqmi hanaq pachapi kaq Diosta kamirqaku, chaynataqa kamirqaku nanaywan kasqankuraykum hinaspa uta hina onqoyniyuq kasqankuraykum.

¹² Soqta kaq angelpas copa apasqantam hatun Eufrates mayuman talliykurqa hinaptinmi chay mayuqa chakirurqa, chakirurqaqa intipa qespimunan lawmanta hamuq reykuna chayninta chimpanankupaqmi.

¹³ Rikurqanitaqmi Dragonpa siminmantawan manchakuypaq animalpa simin-manta hinaspa pantachikuq profetapa siminmanta karyakunaman rikchakuq kimsa mana allin espiritukuna lloqsimuqta.

¹⁴ Chaykunaqa kasqa demoniokunapa espiritunkunam. Milagrokunata ruwaspankum kay pachapi llapallan reykuna huñuq lloqsirqaku, huñumurqakuqa Tukuy Atiyniyuq Diospa punchawninpi guerrapi peleanankupaqmi.

¹⁵ Ñoqaqa qonqayllatam suwa hina kutiramusaq. Mayna kusisqam rikchan-rikchanlla kaqqa chaynataq pachanku waqaychaqkunapas, chaynapi mana qalalla purinankupaq nitaq penqayninkupas rikukunanpaq.

¹⁶ Chay espiritukunam reykunata huñurqaku hebreo rimaypi “Armage-donwan” sutichasqa sitiopi.

¹⁷ Qanchis kaq angelpas copa apasqantam wayraman talliykurqa, hinaptinmi hanaq pachapi kaq templopi Diospa trononmanta huk qapariy uyarikurqa: ¡Ruwasqañam kachkan! niq.

¹⁸ Chaymi llipyaykuna, qapariykuna hinaspa rayokuna karurqa, hatu-hatun terremotom kay pachata taspirqa, chayna terremotoqa kay pachapi runakuna kasqanmantapunipas manam karqachu.

¹⁹ Hinaptinmi chay hatun llaqta kimsaman chitqakururqa, tuñirurqataqmi kay pachapi llaqtakunapas. Diosmi yuyarirurqa hatu-hatun Babilonia llaqtamanta vino upyachichkaq hina piñakuyninwan castigananta.

²⁰ Llapallan islakunam ayqerqaku, hinaptinmi orqokunapas chinkarurqa.

²¹ Cielomantam llapa runakunapa hawanman tawa chunka kilo llasayniyuq runtu para chayamurqa, hinaptinmi runakunañataq Diosta kamirqaku, kamirqakuqa hatu-hatun castigo runtu para chayachimusqanmantam.