Amós 9 - CHUYA QELLQA La Biblia en Quechua de Ayacucho 2012

Diospa castigonmantaqa mana pipas lluptinanmanta

¹ Señortam altarpa waqtanpi sayachkaqta rikurqani, paymi niwarqa: Pilarkunata waqtay cimientonkuna kuyurinankama, ñutukuspa runakunapa hawanman wichimuchun. Chaymanta puchuqtam espadawan wañuchisaq; paykunamantaqa manam hukllapas lluptinqachu, nitaqmi pipas vidanta salvanqachu.

² Allpa ukupiña pakakuptinkupas chaymantam paykunata hurqomusaq, cielomanña seqaruptinkupas chaymantam uraykachimusaq.

³ Carmelo orqopa puntanpiña pakakuptinkupas chaypi maskaykuspaymi hapimusaq; qayllaymanta lluptinankupaq lamar qochapa ukunpiña pakakuptinkupas, maqta uruta kamachiptiymi chaypi kachumunqa.

⁴ Enemigonkupa preso apasqanña rispankupas chaypim espadawan wañuchisqa kanqaku; paykunataqa ñakarinankupaqmi qawarisaqpas, manam yanapanaypaqñachu.

⁵ Tukuy Atiyniyuq Tayta Dios llapchaykuptinmi kay pacha chullurin, chaypi yachaqkunam lliw waqanku; chulluspanmi mayu hinaraq timpurin, Egiptopi mayu hinaraqmi yawyarinpas.

⁶ Tayta Diosmi yachananta hanaq pachapi unancharqa, hinaspanmi kay pachapa hawanpi sapincharqa; lamar qochapa yakunta qayaspanmi, kay pachaman chaqchurimun. Tayta Diosmi sutin.

⁷ Tayta Diosmi kaynata nin: Israelpa mirayninkuna, qamkunaqa manam huk rikchaqchu kankichik, aswanqa Etiopía runakuna hinallam; imaynam qamkunata Egiptomanta hurqomurqaykichik, chaynam filisteokunatapas Cretamanta hurqomurqani, Kir lawmantañataqmi Aramta hurqomurqani, nispa.

⁸ Cheqaptapunim Tayta Diosqa hucha-sapa nacionpa contranpi kachkan, chay-raykum nin: Chayna naciontam kay pachamanta chinkachisaq. Jacobpa mirayninkutam ichaqa wakillantapas puchuykusaq, nispa.

⁹ Ñoqam kamachisaq Israelpa mirayninkuna llapa nacionkunapa suysusqan kanankupaq; imaynam trigota harneropi suysuptinku mana chullallapas allpaman wichinchu, chayna suysusqa kanankupaq.

¹⁰ Llaqtaypi huchasapakunam ninku: Manam imapas pasawasunchikchu, nitaqmi ima castigopas chayamuwasunchu, nispanku. Ichaqa paykunam guerrapi wañunqaku.

Israel nación musoqmanta hatarichisqa kananmanta

¹¹ Tayta Diosmi kaynata nin: Chay punchawkunapim Davidpa munaychakuyninta hatarichisaq, uchkunkunata wichqaykuspaymi perqankunatapas allichaykusaq, hinaspaymi ñawpaq tiempopi hina hatarichisaq.

¹² Chaynapim yupaychaqniy runakuna Edompa allpanta hinaspa llapa nacionkunapa allpankunatapas munaychakunqaku, nispa.

¹³ Tayta Diosmi kaynata nin: Ha-muchkanmi tiempo yapuqpas rutuqta haypananpaq, uvasta tarpuqpas uvas saruqta haypananpaq; orqokunawan moqokunapas vinotam weqeri-munqaku.

¹⁴ Israel llaqtaytam preso risqanmanta kutichimusaq; pay-kunam tuñichisqa llaqtakunata hatarichispa chaypi yachanqaku. Uvasta tarpuspam vinotapas upyanqaku, chakrakunapi tarpuspam rurunta mikunqaku.

¹⁵ Paykunatam allpankupi sapinchasaq, chaynapi paykunaman qosqay allpamanta manaña haykapipas hurqosqa kanankupaq. Tayta Diosmi chaynata nin.