Amós 6 - CHUYA QELLQA La Biblia en Quechua de Ayacucho 2012

Israel nación tuñichisqa kananmanta

¹ ¡Ay, imaynaraq kankichik! Jerusalenpi hawkallaña yachaqkuna, chaynataq Samaria orqopi hapipakuqkuna. ¡Ay, imaynaraq kankichik! Israelpa hapipakunan ancha reqsisqa nacionkunapi kamachikuqkuna.

² Calne llaqtanta pasaspayá qawaykuychik, chaymanta Hamat llaqtaman rispayá Filistea nacionpi Gat llaqtaman uraykuychik. ¿Kay nacionkunamanta aswan atiyniyuqchu kankichik? ¿Allpaykichikpas paykunapamanta aswan hatunchu?

³ Qamkunam piensankichik sasachakuy punchawta qamkunamanta asurachiyta, ichaqa aswanraqmi qayaypaq qayachkankichik ñakariy tiempokunata.

⁴ Marfilmanta suma-sumaq catrekunapim waqtapankichik, mastakuykuspam puñukunkichik, malta carnerokunatawan malta torokunatam kanchanmanta hurqoykuspa mikukunkichik.

⁵ Arpata tocaspam musoq takikunata hurqokunkichik, rey David hinaraqmi musoq tocanakunata ruwakunkichik.

⁶ Hatun vasokunapim vinota upyakunkichik, suma-sumaq perfumekunawanraqmi llusikunkichik, ichaqa manam llakikunkichikpaschu Joseypa ñakariyninmantaqa.

⁷ Chayraykum kunan preso apaqkunapas qamkunamanta qallarispa presochasunkichik; chaynapim hawkallaña samakuspa upyakuynikichikwan mikukuynikichikpas tukunqa, nispa.

⁸ Tukuy Atiyniyuq Tayta Diosmi kikin-rayku juraspa kaynata nin: Millakunim Israelpa hatun tukuynintapas, palacionkunatapas cheqninim; chayraykum llaqtata tukuy ima kapuqninkunatawan enemigonman qoykusaq, nispa.

⁹ Chaykuna pasakuptinmi, huk wasipi chunkallaña qepaqkunamantapas lliw wañunqaku.

¹⁰ Hinaptinmi wasimanta tullukunata wischunanpaq hukkaqnin ayllun wañuqkunapa cuerponta kañanqa; hinaspanmi wasi kuchupi qeparuqta tapunqa: ¿Kachkanraqchu pipas chaypi? nispa. Chaymi pakakuqñataq nimunqa: Manañam kanñachu, nispa. Yaykuqñataqmi ninqa: ¡Upallay! Yanqañataq Tayta Diospa sutinpi jurawaq, nispa.

¹¹ Tayta Dios kamachiptinmi hatun sumaq wasikunatapas tuñirachinqaku, taksan wasikunatañataqmi purmarachinqaku, lliwtam ñuturunqaku.

¹² ¿Yaqachu caballokuna qaqanta kallpanmanku? ¿Yaqachu torokuna qaqapi yapunmanku? ¿Imanasqataq allin ruwayta wañuyman tikrarunkichik? ¿Imanasqataq allin kawsakuyta qatqeyarachinkichik?

¹³ Qamkunam Lo-Debar llaqtata vencerusqaykichikmanta kusikuspa ninkichik: ¿Manachum kallpanchikwan Carnaín llaqtatapas vencerunchik? nispaykichik.

¹⁴ Chaynaqa, Israel runakuna, Tukuy Atiyniyuq Tayta Diosmi kaynata nin: Huk naciontam qamkunapa contraykichikpi hatarichisaq, norte lawpi Hamat llaqtamanta qallaykuspa sur lawpi Arabá mayukama ñakarichisunaykichikpaq, nispa.