Amós 5 - CHUYA QELLQA La Biblia en Quechua de Ayacucho 2012

Israelta huchanmanta wanakunanpaq Diospa qayasqanmanta

¹ Israel runakuna uyariychik, llaki simikuna rimarisqayta.

² Manaraq qari reqsiq sipas hinam Israel wichiykun haykapipas manaña hatariy atinankama, maymi tuñisqanpim qeparun, manam pipas hatarichiqnin kanchu.

³ Tayta Diosmi Israel nacionta kaynata nin: Huk llaqtamanta waranqawan lloqsiqmi, pachakllawanña kutimunqa, pachakwan lloqsiqñataqmi chunkallawanña kutimunqa.

⁴ Tayta Diosmi Israel nacionta nin: Maskawaychik hinaspaqa kawsankichikmi.

⁵ Amaña idolokunata Bet-elpi maskaychikñachu, amaña Gilgalmanpas yaykuychikñachu, nitaq Beersebamanpas riychikñachu. Gilgalqa presochaspa apasqam kanqa Bet-elñataqmi purmachisqa kanqa.

⁶ Tayta Diosman kutirikamuychik kawsanaykichikpaq. Yanqañataq nina hina wichiykamuspay Joseypa mirayninkunata ruparuyman, Bet-elpi manaña pipas wañuchiy atinankama.

⁷ ¡Ay, imaynaraq kanqaku! Cheqap kaqta ñakariyman tikraqkuna, allin kawsakuyta saruruspa yanqachaqkuna.

⁸ Maskaychik Suchu chaskakuna unanchaqta, maskaychik Qalalu chaska unanchaqta, tutayayta achkiyman tikraqta, punchawtapas tutayachiqta, lamar qochapa yakunkunata qayaspa allpa pachaman chaqchurimuqta. Payqa Tukuy Atiyniyuq Tayta Diosmi.

⁹ Payqa atiyniyuqkunapa kallpanta yanqachaqmi, atiyniyuq llaqtakunata purmachiqmi.

¹⁰ Paykunaqa llaqtapa punkunpi “allinta kawsaychik” niqninkutam cheqnirurqaku, cheqap kaqkuna rimaqtam qepancharurqaku.

¹¹ Chaynaqa, wakchakunata yanqamanta tumpaspa impuestota trigonpi chaskikusqaykichikraykum, labrasqa rumikunawan wasikuna ruwasqaykichikpipas mana yachankichikchu, manataqmi uvas plantasqaykichikpa rurunmanta vinotapas tomankichikchu.

¹² Yachanim millakuypaq huchaykichikkunatawan mana kasukuspa tukuy mana allin ruwasqaykichikkunatapas, yachanitaqmi allin kawsakuq runata ñakarichispa Juezpa ñawpaqninpi wakchakunata juiciopi pierdechinaykichikpaq qollqe chaskikusqaykichiktapas.

¹³ Chayraykum allin yuyayniyuq runaqa upallakun, tiempokuna mana allinña kasqanrayku.

¹⁴ Allin kaqtayá kawsanaykichikpaq maskaychik, amayá mana allin kaqtachu. Chaynapi nisqaykichikpi hina Tukuy Atiyniyuq Tayta Dios qamkunawan kananpaq.

¹⁵ Mana allin kaqta cheqnispayá allin kaqta kuyaychik, juzgaspapas cheqap kaqwanyá juzgaychik; chaynapiqa ichapas Tukuy Atiyniyuq Tayta Dios Joseypa mirayninmanta puchuqkunata llakipayarinmanraq.

¹⁶ Tukuy Atiyniyuq Tayta Diosmi kaynata nin: Llapa plazakunapim waqanqaku, callekunapim qaparkachanqaku. Chakrapi llamkaqkunatam waqanankupaq qayamunqaku, waqapakuspa ganakuqkunatam waqanankupaq pusamunqaku.

¹⁷ Chawpinkuta ñakarichistin pasaptiymi uvas chakra ukukunapi waqanqaku. Tayta Diosmi chaynata nin.

¹⁸ ¡Ay, imaynaraq kankichik! Diospa punchawnin chayamunanta munaqkuna. ¿Imapaqtaq Diospa punchawnin chayamunanta munankichik? Chay punchawqa kanqa tutayaymi, manam achkiychu.

¹⁹ Imaynam leonmanta ayqespan ukumariwan tuparunman, otaq wasinman yaykuspa perqaman tawnapakuykuptin maqta uru kachurunman, chaynapunim chay punchawqa kanqa.

²⁰ ¿Manachum Diospa punchawninqa kanqa mana imayrikuqllapas achkiyuq aswanqa ancha-ancha tutayay?

²¹ Cheqninim, millakunim yupaychawanaykichikpaq fiestaykichiktapas, hatun huñunakuykuna ruwasqaykichiktapas manam munanichu.

²² Sacrificiokunata kañaspa kawsaykunamanta ofrenda qowasqaykichiktapas manam chaskisqaykichikchu; ñoqawan allinyanakunaykichikpaq wira animalkuna wañuchipuwasqaykichiktapas manam rikuytapas atinichu.

²³ Qayllaymanta wischuychik takikichiktapas, arpa tocasqaykichiktapas manam uyariyta munanichu.

²⁴ Allin juzgasqaykichikpas kallpachkaq mayu hinayá kachun. Justicia ruwasqaykichikpas mana chakiq pukyu hinayá kachun.

²⁵ Israel runakuna, ¿yaqachu tawa chunka wata mana imapa kanan chunniqpi purispa ofrendakunatawan sacrificiokunata ofrecewarqankichik?

²⁶ Aswanraqmi Moloc chaynataq Quiún sutiyuq idoloykichikkunata chaskakunaman rikchaykachispa “diosmi” nispa ruwasqaykichikta qepirikuspa apaykacharqankichik.

²⁷ Chayraykum Tukuy Atiyniyuq Tayta Dios kaynata nin: Damascopa waklawninkunamanraqmi presota apachisqaykichik, nispa.