Amós 3 - CHUYA QELLQA La Biblia en Quechua de Ayacucho 2012

Profetapa imam ruwananmanta

¹ Israelpa mirayninkuna uyariychik Tayta Diospa imam nisqanta. Egiptomanta hurqomusqan runakunapa contranpim kaynata nin:

² Kay pachapi lliw ayllukunamantam qamkunallata akllakurqaykichik. Chayraykum tukuy mana allinkuna ruwasqaykichikmanta castigasqaykichik.

³ ¿Yaqachu iskay runakuna kuska purinmanku imapipas mana huk sonqolla kachkaspanku?

⁴ ¿Yaqachu montepi león qaparinman mikunanpaq mana imatapas hapiruchkaspa? ¿Yaqachu uña león machayninpi yanqa qaparinman mikunanpaq mana imatapas hapiruchkaspa?

⁵ ¿Yaqachu urpichakuna trampaman wichinman mana pipas trampata churaruchkaptin? ¿Yaqachu trampa wichqakurunman mana imatapas hapiruchkaspa?

⁶ ¿Yaqachu trompetata llaqtapi tocaptinku runakuna hawka kakunmanku? ¿Yaqachu llaqtapi ima sasachakuypas hatarinman Tayta Dios mana kacharimuchkaptin?

⁷ Tayta Diosqa imam ruwananta profetankunaman mana willachkaspaqa manam imatapas ruwanqachu.

⁸ León qaparimuptin, ¿Pitaq mana mancharikunmanchu? Tayta Dios rimariptin, ¿pitaq mana profetizanmanchu?

Samaria llaqta tuñichisqa kananmanta

⁹ Asdod llaqtapa palacionkunapi, Egipto nacionpa palacionkunapi, qaparispa niychik: “Samariapa orqonkunaman huñunakuspa qawaychik, Samariapa chawpinpi hatun sasachakuytawan ñakarichinakuyta”, nispaykichik.

¹⁰ Tayta Diosmi kaynata nin: Paykunaqa manam allin ruwayta yachankuchu; aswanqa mana llakipayarispa suwakusqankuta palacionku ukupi pakayllatam yachanku, nispa.

¹¹ Chayraykum Tayta Dios kaynata nin: Enemigoykikunam hamunqa kay pachapa muyuriqninmanta; hinaptinmi muyuriqnikipi harkasuqniki perqakuna tuñichisqa kaptin, palacioykipi tukuy ima taqesqaykipas suwasqa kanqa, nispa.

¹² Tayta Diosmi kaynata nin: Imaynam ovejata león mikuruptin michiqnin salvarun iskay piernallantaña otaq rinrinpa puntallantaña, chaynapunim Samaria llaqtapi yachaq Israel runakunapas lluptinqaku; suma-sumaq camapi puñuqkunapas hinaspa waqtapaqkunapas chaynam ayqenqaku, nispa.

¹³ Tukuy Atiyniyuq Tayta Diosmi kaynata nin: Uyariychik hinaspa Jacob casta runakunapa contranpi rimaychik.

¹⁴ Israel runakunata castigasqay punchawmi Bet-el llaqtapi altarkunatapas tuñichisaq; altarpa waqrankunapas kuchusqa kaspam pampaman wichichisqa kanqa.

¹⁵ Rupay tiempopaq wasitapas chiri tiempopaq wasitawan kuskatam tuñichisaq; apukunapa sumaqllaña wasinpas chinkanqam, llapa wasikunapas purmanqam.