Amós 2 - CHUYA QELLQA La Biblia en Quechua de Ayacucho 2012

¹ Tayta Diosmi kaynata nin: Moab nacionpi yachaqkunatam llumpa-llumpay huchankumanta castigasaqpuni, castigasaqa Edom nacionpi reypa tullunkunata uchpayanankama kañarusqankuraykum.

² Moab nacionta kañaykuptiymi Queriot llaqtapa palacionkunatapas rupanqa; chaynapim Moabqa hatun qapariyllawanña guerrapa chawpinpi chaynataq cornetapa qapariyninpa chawpinpi wañunqa.

³ Chawpinkumanta reyninkuta chinkarachispaymi kamachiqninkunatapas wañurachisaq. Tayta Diosmi chaynata nin.

⁴ Tayta Diosmi kaynata nin: Judá naciontam llumpa-llumpay huchanmanta castigasaqpuni; kamachikuyniykunatapas wischupakuspankum mana kasukurqakuchu, aswanraqmi tayta-mamanku kaqlla paykunapas idolokunata yupaycharqaku.

⁵ Chayraykum Judá nacionta kañaykuptiy Jerusalenpa palaciokunatapas rupanqa, nispa.

Israel juzgasqa kananmanta

⁶ Tayta Diosmi kaynata nin: Israel nacionpi yachaqkunatam llumpa-llumpay huchankumanta castigasaqpuni. Mana huchayuq runata qollqepaq rantikuspa, wakchatañataq chulla pares usutapaq rantikusqankumanta.

⁷ Mana piniyuqkunatam usuchinku, wakchakunatapas yanqamanta cargochaspam pantachinku. Taytakunapas churintinmi huk warmillawan qanrakunku, hinaspam chuya sutiyta penqayman churanku.

⁸ Wakchakunapa mana pagayta atispa prenda saqesqanku pachakunapim, altarkunapa waqtanpi chuchumika warmiwan qanrakunku, mana kaqmanta multata cobrasqanku qollqewan vinota rantiykuspam, diosninkuta yupaychananku wasipi machakunku.

^9-10 Israel llaqta, ñoqam qamkunata Egiptomanta hurqomurqaykichik, hinaspaymi mana imapa kanan chunniqninta tawa chunka wata pusamurqaykichik. Ñawpaqnikichikpim Amor casta runakunatapas, encina sacha hina allin poqosqa kachkaptinkupas, cedro hina sayayniyuqña kachkaptinkupas, sapinmanta chinkarachispay munaychakunaykichikpaq allpantapas qorqaykichik.

¹¹ Hinaspaymi miraynikichikkunamanta wakiqninta akllarqani profetaykuna kanankupaq, joven kaq warmakunamantañataqmi sapaqcharqani ñoqallapaqña kawsanankupaq. ¿Icha manachu chaynata ruwarqani? Tayta Diosmi chaynata nin.

¹² Ichaqa qamkunam sapaqchakusqay jovenkunatapas vinota tomachispa macharachinkichik, profetaykunatapas ñoqamanta willakunanta harkakuspam siminta wichqarunkichik.

¹³ Chayraykum maymi kasqaykichikpi sarusqaykichik, imaynam trigo cargayuq carro allpata sarun, chaynatam sarusqaykichik.

¹⁴ Maynataña kallpaq runapas manam lluptinqachu, kallpasapa runatapas kallpanqa manam yanapanqachu, mana imataña manchakuq runapas manam vidanta salvanqachu.

¹⁵ Flechawan peleayta yachaqpas manam takyanqachu, maynataña kallpaq runapas manam lluptinqachu, caballopi ayqeqpas manam vidanta salvanqachu.

¹⁶ Mana imata manchakuq runapas chay punchawqa qalallam lluptinqa. Tayta Diosmi chaynata nin.