Amós 1 - CHUYA QELLQA La Biblia en Quechua de Ayacucho 2012

Israelpa muyuriqninpi Nacionkunata Dios juzgananmanta

¹ Amosmi karqa Tecoa lawpi michiqkunapa parten. Paymi Israelpi imam pasakunanmanta profetizarqa, Uzías Judá nacionpi rey kachkaptin, Joaspa churin Jeroboampas Israelpi rey kachkaptin, terremoto pasakunanpaq iskay wata ñawpaqninta. Amosmi nirqa:

² Sión moqomantam Tayta Dios qaparimun, Jerusalenmantam simin uyarikun, Pastorkunapa michinan pastokunapas qawinankama, Carmelo orqopa puntanpas chakinankama, nispa.

³ Tayta Diosmi kaynata nin: Damasco llaqtatam llumpa-llumpay huchanmanta castigasaqpuni, Galaadpi yachaqkunata fierromanta trillanakunawan trillachkaq hina ñakarichisqankumanta.

⁴ Hazaelpa wasintam kañaykusaq, ninam rupanqa rey Ben-hadadpa palaciontapas.

⁵ Damascopa punkunkunatam tuñirachisaq, Bicat-avenpi yachaqkunatawan, Bet-edenpi kamachikuqkunatam chinkarachisaq. Siria llaqtatam Kir llaqtaman presota apachisaq. Tayta Diosmi chaynata nin.

⁶ Tayta Diosmi kaynata nin: Gaza llaqtapi yachaqkunatam llumpa-llumpay huchankumanta castigasaqpuni. Llaqtantin runakunata presocharuspa Edom llaqtapi esclavopaq rantikusqankumanta.

⁷ Gaza llaqtapa muyuriqninpi perqakunata kañaykuptiymi palacionkunatapas rupanqa.

⁸ Asdod llaqtapi yachaqkunatam chinkarachisaq, Ascalón llaqtapi kamachikuqkunatam tukurusaq; lliw atiyniywanmi Ecrón llaqtata castigarusaq, Filistea nacionpi puchuq runakunatam puchukarachisaq. Tayta Diosmi chaynata nin.

⁹ Tayta Diosmi kaynata nin: Tiro llaqtapi yachaqkunatam llumpa-llumpay huchankumanta castigasaqpuni. Wawqentin hina kuyanakunankupaq contrato ruwasqankuta qonqaykuspa llaqtantin runakunata presochaspa Edonman apasqankumanta.

¹⁰ Tiro llaqtapa muyuriqninpi perqankunata kañaykuptiymi palacionkunatapas rupanqa, nispa.

¹¹ Tayta Diosmi kaynata nin: Edom llaqtapi yachaqkunatam llumpa-llumpay huchankumanta castigasaqpuni. Paykunam espada makintin mana llakipayarispa ayllunku Israelta qatikacharqaku. Piñakuyninkutapas mismirichispam cheqnikuyninkutapas tukuy tiempo hatallirqaku.

¹² Temán llaqtata kañaykuptiymi Bosra llaqtapa palaciokunatapas rupanqa, nispa.

¹³ Tayta Diosmi kaynata nin: Amón llaqtapi yachaqkunatam llumpa-llumpay huchankumanta castigasaqpuni. Paykunam allpankuta mirachiypi rispanku Galaad lawpi wiksayuq warmikunapa wiksallantapas kuchuspa tallirqaku.

¹⁴ Rabá llaqtapa perqankunata kañaykuptiymi palacionkunatapas rupanqa; chaytaqa ruwasaq sasachakuy punchawpi, guerrapi hatun qaparkachay kachkaptinmi.

¹⁵ Reyninpas, kamachiqninkunapas, huklaw nacionman preso apasqam kanqaku.