2~Timoteo 4 - CHUYA QELLQA La Biblia en Quechua de Ayacucho 2012

Diospa palabran willakunamanta

¹ Munaychakuq hamuspan wañuqku-natapas kawsaqkunatapas juzgaq Señor Jesucristopa hinaspa Dios Taytapa qayllanpim kamachiki:

² Diospa pala-brantayá tiemponpipas mana tiemponpipas willakuy, runakunatapas faltanta qawachiy, qaqchay, kallpanchay hinas-pa tukuy pacienciawan yachaykachiy.

³ Chayamunqam tiempokuna allin yacha-chikuykunata manaña chaskinankupaq, paykunaqa achkallaña yachachikuqkunata huñukuruspankum aychankuman hina munasqallankutaña uyarinqaku.

⁴ Cheqap kaq yachachikuykunamanta karunchakuruspankum tukuy rikchaq cuentokunataña allinpaq hapinqaku.

⁵ Qamyá ichaqa tukuy imapi allin yuyayniyuq kay, sasachakuytapas aguantaspa allin noticiata willakuy chaynata ruwaspaykiyá llamkaynikita cumpliy.

⁶ Ñoqata wañuchiwananku punchawmi chayamuchkanña, ripukunay punchawmi hichpamuchkanña.

⁷ Allin peleaytam tukuruniña, mayman kallpasqaymanmi chayaruniña, iñiyniypim allinta sayarqani.

⁸ Chayraykum sapaqchapuwasqan corona suyawachkan chaytaqa allin arreglo ruwaq Señorninchikmi chay punchaw kutimuspan qowanqa, manataqmi ñoqallamanchu aswanqa kuyakuywan paypa kutimunanta suyaqkunamanwanmi.

Timoteoman imam kunasqanmanta

⁹ Imaynata ruwaspaykipas qawaykuwanaykipaqyá chaylla hamuy.

¹⁰ Demaspas kay pachapi kaqkunallata kuyaruspanmi saqeruwan, hinaspam Tesalónica llaqtaman ripukun. Crescentem Galacia lawman pasan, Titoñataqmi Dalmacia lawman pasan.

¹¹ Lucasllañam ñoqawanqa kachkan. Marcosta maskamuspayki pusarikamuy, payqa allintam llamkayniypi yanapawanqa.

¹² Tiquicotapas Éfeso llaqtamanmi pasachini.

¹³ Hamuspaykiqa Troas llaqtapi Carpopa wasinpi saqeramusqay capallayta aparikamullaway, aparikamuwaytaqyá wankusqa qellqaykunatapas, aswantaqa pergaminoykunata.

¹⁴ Herrero Alejandrom tukuy mana allinkunata ruwawarqa, Señorninchikmi kutichipunqa imam ruwasqanman hina.

¹⁵ Paymantaqa qampas cuidakuy, payqa yachachisqanchikpa contranpim hatarirun.

¹⁶ Ñawpaq kaq kutipi kamachikuqkunapa qayllanman rimanakunaypaq yaykuptiyqa manam pipas yanapaykuwarqachu, lliwchankum saqeruwarqaku. Diosninchikyá kay ruwasqankumantaqa pampachaykuchun.

¹⁷ Señorninchikmi ichaqa ñoqawan kaspa kallpanchawarqa, chaynapi ñoqantakama mana judío kaqkunamanpas salvacionmanta willakuy tukusqa kananpaq. Chaynatam Señorninchikqa leonkunapa siminmanta libraykuwarqa.

¹⁸ Paymi llapa mana allin ruwaymantapas libraykuwanqa, hinaspam hanaq pachapi munaychakusqanpaq waqaychawanqa. ¡Paytaqyá wiña-wiñaypaq hatunchasqa kachun! Amén.

Cartapa tukupayninmanta

¹⁹ Priscatawan Aquilata chaynataq Onesiforotapas wasinpi kaqkunatawan rimaykapullaway.

²⁰ Erastoqa Corin-to llaqtapim qeparamurqa, Trofimo-tañataqmi onqochkaqta Mileto llaqtapi saqeramurqani.

²¹ Manaraq poqoy tiempo chayamuchkaptin utqayman hamuy. Rimaykamusunkichikmi Eubulo, Pu-dente, Lino, Claudia hinaspa llapallan wawqe-paninchikkunapas.

²² Señorninchik Jesucristoyá qanwan kachun, Diosninchikyá kuyakuyninta qamkunaman chaqchurimuchun. Amén.