2~Timoteo 2 - CHUYA QELLQA La Biblia en Quechua de Ayacucho 2012

Soldado hina kanamanta

¹ Churilláy Timoteo, Cristo Jesuspa kuyakuyninwan kallpanchakuy.

² Achka runakunapa qayllanpi uyariwasqaykita, iñiyninpi allin takyaq runa-kunaman yachachiy, chaynapi paykunapas hukkunaman yachachinankupaq.

³ Qamqa Jesucristopa allin soldadon hinayá ñakariy.

⁴ Serviciopi kaq Soldadoqa manam sapaq ruwaymanqa chapukunchu, aswanqa kamachiqnintam kasukun.

⁵ Kallpaqpas premiota chaskinanpaqqa reglamentonman hinam kallpanan.

⁶ Chakrapi llamkaqpas puntataqa tarpunanraqmi cosechananpaqqa.

⁷ Kay nisqaykunapiyá yuyaymanay, hinaptinqa Señormi lliwta yachachisunki.

⁸ Rey Davidpa mirayninmanta kaq Jesucristota yuyariy, paymi kay allin noticia willakusqayman hina wañus-qamanta kawsarimurqa,

⁹ chayraykum ñakariykunata aguantani, runa wañu-chiqta hinam cadenaruwanku, Diospa palabranmi ichaqa mana cadenasqachu kachkan.

¹⁰ Chaymi akllasqankunata kuyasqayrayku tukuyta ñakarispay aguantachkani, chaynapi paykunapas Cristo Jesusnintakama salvakuspanku wiñay kawsayta haypanankupaq.

¹¹ Kay palabraqa cheqapmi: Sichum paywan wañukusun, paywantaqmi kawsakusunpas,

¹² ñakarispaqa paywanmi munaychakusun, payta negaptinchikqa, paypas negaruwasuntaqmi,

¹³ sichum payta qepanchakurusun, paymi ichaqa mana qepanchakuwasunchu, payqa imam nisqantapas manam negakunmanchu.

Diospaq allin llamkaqmanta

¹⁴ Kay nisqaykunata yuyarichiy, ima rimaypipas Diospa qayllanpi ama atipanakunankupaq, chay ruwayninkuqa manam valenchu, aswanqa uyariqkunatam tuñichin.

¹⁵ Kallpanchakuyá Diospa chaskisqan kanaykipaq, allin llamkaq hinayá mana imamantapas penqakuspa Diospa cheqap palabranta allinta yachachiy.

¹⁶ Mana respetowan yanqapas-yanqa rimaqkunataqa ama uyariychu, chayna rimaqkunaqa aswan-aswanmi Diosmanta karunchakunku.

¹⁷ Chayna runakunapa yachachikuyninqa ismupakuy onqoy hinaraqmi mirarun, chay yachachiqkunaqa Himeneowan Filetom.

¹⁸ Paykunam cheqak kaqta saqeruspa: “Wañuqkunaqa ñam kawsarirunkuña” nispanku wakin iñiqkunatapas pantachihchkanku.

¹⁹ Diosmi ichaqa sellachkaq hina mana kuyuriq cimientota churarqa, chaypim kaynata nichkan: Señorqa paypa kaqkunataqa reqsinmi, chaynaqa Señorpa sutin qayakuqkunaqa mana allin ruwaykunamanta rakikuchunku, nispa.

²⁰ Hatun wasipiqa imakunapas manam qorimanta qollqellamantachu kachkan, kachkantaqmi kullumanta hinaspa allpamantapas. Wakinmi allin kaqkunapi servikunanpaq, wakinñataq sapa punchaw qachachanapaq.

²¹ Chaynam ñoqanchikpas mana allin kaqkunamanta sapaqchakuspanchikqa Señorninchikpa instrumenton kasunchik. Diosllapaqña sapaqchakuspam chaylla kasunchik paypa munasqanta imatapas allinta ruwananchikpaq.

²² Joven kaypa munapayayninkunamanta ayqekuspa allin kaqkunata maskay, allin ruwayta, iñiyta, kuyakuyta hinaspa hawkayayta, haykam chuya sonqonkumanta Señorninchikta qayakuqkunawan kuska.

²³ Runakunapa yanqa atipanakusqanmanqa ama chapukuychu, yachasqaykipi hinapas chaykunaqa peleollatam hatarichin.

²⁴ Señor serviqqa manam peleokunapichu purinan, aswanqa llapallanwanmi allinlla kanan, payqa chaylla allin yachachikuqmi hinaspa mana piñakuqmi kanan.

²⁵ Mana kasukuqkunatapas llampu sonqolla-wanmi corregiykunan, icharaqpas wana-kunanpaq Dios tiempota qoykunman, chaynapi cheqap kaqta reqsinankupaq,

²⁶ chaynapi pantaypi kasqankuta reqsikuspanku diablopa presochasqanmanta lluptinankupaq. Paykunaqa diablopa watasqanmi kachkanku paypa munayninta ruwanankupaq.