2~Timoteo 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Ñoqa Pablom Diospa munasqanman hina Cristo Jesuspa apostolnin kani. Imaynam Cristo Jesuspi kawsay chaskisqanchikman hina.

² Kuyasqay churiy Timoteo, Dios Taytanchikwan Señorninchik Jesucristoyá kuyakuy-ninta, llakipakuyninta hinaspa hawkayayninta qampa hawaykiman chaqchu-rimuchun.

Mana manchakuspa willakunamanta

³ Tuta punchawmi qanmanta yuyarispay mañakuyniypi Diosman graciasta qoni, paytam chuya sonqolla servichkani ñawpaq taytaykuna hina.

⁴ Waqasqaykita yuyarispaymi qanwan tupaykuyta munani, chaynapi llumpay kusikuyta tarinaypaq.

⁵ Cheqap iñiyniyuq kasqaykitam yuyarini, abuelayki Loidawan mamayki Eunicepas ñawpaqmantaraqmi iñiyniyuq karqaku, chaymi confiakuchkani qampas chayna iñiyniyuq kasqaykimanta.

⁶ Chayraykum nimuyki, makiyta hawaykiman churaykuspay Diosta mañakuptiy rawrachkaq ninata hina atiy chaskisqaykitayá astawan ruparichiy.

⁷ Diosqa manam manchakuy espiritutachu qowarqanchik, aswanqa atiywan, kuyakuywan hinaspa sonqonchik controlakuq kananchikpaqmi.

⁸ Chaynaqa, amayá penqakuychu Señorninchikmanta willakuytaqa nitaq payrayku preso kasqaymantapas, aswanqa Jesucristomanta allin noticiarayku ñoqa hina ñakariy Diospa kallpa qosusqaykiman hina.

⁹ Diosmi salvawaspanchik chuya llaqtan kananchikpaq sapaqchawarqanchik, manam chayqa imapas allin ruwasqanchikraykuchu, aswanqa munasqanman hinallam hinaspa kay pachapas manaraq unanchasqa kachkaptin Cristo Jesusnintakama kuyawasqanchikraykullam.

¹⁰ Kunanmi salvawaqninchik Jesucristopa hamusqanwan kuyawasqanchikta qawaykachiwanchik, paymi wañuypa atiyninta chinkarachin hinaspam allin noticianwan wiñay kawsayta qoykuwanchik.

¹¹ Diosmi churawarqa Jesucristomanta allin noticiata willakunaypaq, apostolnin hinaspa yachachikuq kanaypaq.

¹² Chayraykum kaynataña ñakarini, aswanqa piman iñisqayta yachakuspaymi mana penqakunichu. Payqa atiyniyuq kasqanraykum imam qowasqantaqa chay punchawkama waqaychanqa.

¹³ Ñoqamanta allin yachachikuy chaskisqaykiman hinayá iñiypi Cristo Jesuspa kuyakuyninpi kawsay.

¹⁴ Ñoqanchikpi kawsaq Chuya Espiritupa yanapakuyninwanyá yachachisqayta allinta waqaychay.

¹⁵ Yachasqaykipi hinapas Asia law-manta kaqkunaqa llapallanmi saqeru-wanku, paykunawantaqmi Figelowan Hermogenespas saqeruwanku.

¹⁶ Onesi-foropa aylluntayá Señorninchik llakipa-yariykuchun, paymi achka kutipi kall-panchaykuwarqa, manataqmi preso kasqaywanpas penqakurqachu.

¹⁷ Aswanqa Roma llaqtaman chayaramuspanmi maskaykuwarqa tariykuwanankama.

¹⁸ Señorninchikyá kutimusqan punchawpi payta kuyapayarichun. Yachasqaykipi hinapas payqa Éfeso llaqtapim anchallataña yanapaykuwarqa.