2~Tesalonicenses 2 - CHUYA QELLQA La Biblia en Quechua de Ayacucho 2012

Chinkananpaq citasqa runamanta

¹ Wawqe-panillaykuna, Señor Jesu-cristopa hamunanmantawan pay-wan huñunakunanchikmantam ruega-kamuykiku.

² Amayá chayllaqa piwanpas engaña-rachikuychikchu, amataqyá mancha-rikuychikchu “Señorpa kutimunan punchawqa chayaramunñam” nispa willasuptikichikpas. Willasunkichikqa Espiritupa atiyninwan rimachkaq hinaraqmi, sumaq palabrawanraqmi hinaspa cartaykutapas chaskichkaq hinaraqmi.

³ Amayá piwanpas engañachikuychikchu, puntataqa runakunam Diosta qepanchanqaku, hinaptinmi rikurimunqa Diospa enemigon millay runa, chay runaqa chinkananpaq citasqañam kachkan.

⁴ Paymi Diospa sutinwan sutichakuqkunapa contranpi chaynataq yupaychana kaqkunapa contranpi hatarinqa. Diospa templonpi tiyaykusparaqmi “Diosmi kani” nispa Dios tukunqa.

⁵ ¿Manachu yuyankichik qamkunawan kachkaspayraq chaykuna nisqayta?

⁶ Kunanqa yachankichikmi chay runapa imam harkasqanta, chaynapi imam tiemponpiña rikurimunanta.

⁷ Chay pakasqa kaqraq mana allinpa espiritunqa ñam llamkachkanña, ichaqa chay harkaqninpa suchurinallantañam suyachkan.

⁸ Hinaptinmi chay millay runa rikurimunqa. Paytam Señorqa samayllanwan wañuchinqa, kancharistin rikurimuspanmi paytaqa chinkarachinqa.

⁹ Chay millay runaqa hatun atiywan hinaspa Satanaspa kallpanchasqanmi hamunqa, chaymi admirakuypaq llulla milagrokunata ruwanqa.

¹⁰ Hinaspam tukuy rikchaq mana allin millakuypaq kaqkunata ruwaspa engañanqa, haykam salvakunankupaq cheqap yachachikuyta mana chaskiyta munaspa condenacionman riqkunata.

¹¹ Diosmi paykunaman kachamun engañakuq atiyta, llulla kaqkunapi creenankupaq,

¹² chaynapi condenasqa kanankupaq, condenasqaqa kanqaku cheqap kaqpi mana iñispanku millay kaqkunapi kusikusqankuraykum.

Iñiqkunata Pablo kallpanchasqanmanta

¹³ Señorpa kuyakusqan wawqe-panillaykuna, ñoqaykuqa tukuy tiempom qamkunamanta Diosman graciasta qonayku. Ñawpaqmantaraqmi Diosqa Espiritupa chuyanchakuyninwan akllasurqankichik, chaynapi cheqap kaqta chaskispa salvakunaykichikpaq.

¹⁴ Chaypaqmi allin noticia willas-qaykutakama qayasurqankichik, chay-napi Señor Jesucristopa maymi kasqanpi kanaykichikpaq.

¹⁵ Chaynaqa, wawqe-panillaykuna qaqa hinayá takyaychik, simiykuwan hinaspa cartaykuwan yachachimusqaykuta allinta waqaychaspa.

¹⁶ Kuyawaspanchik wiñay consuelo qowaqninchik hinaspa kuyakuywan suyakuy qowaqninchik, Señorninchik Jesucristowan Dios Taytanchikyá,

¹⁷ son-qoykichikta kallpanchachun hinaspa tukuy ruwaynikichikpiwan allin rimaynikichikpi takyachisunkichik.