2~Tesalonicenses 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Ñoqa Pablom Silvanowan hinaspa Timoteom Tesalónica llaqtapi lliw iñiqkunata rimaykamuykiku, qamkunaqa Dios Taytawan hinaspa Señor Jesucristowanmi huklla kachkankichik.

² Dios Taytatawan Señor Jesucristoyá kuyakuynintawan hawkayayninta qamkunaman chaqchurimuchun.

Jesucristo kutimuptin Diospa juzgananmanta

³ Wawqe-panillaykuna, qamkunamantam Diosman tukuy tiempo graciasta qonayku, chayqa allinmi, chaynataqa ruwanayku qamkunapa iñiynikichik wiñasqanraykum chaynataq sapakamapa kuyanakuynikichik mirasqanraykum.

⁴ Chaynallataqmi ñoqaykuqa Diospa iglesiankunapi qamkunamanta alabakuniku; sasachakuykunapi, ñakariykunapi pacienciawan iñiynikichikpi qaqa hina sayasqaykichikmanta.

⁵ Kayqa qawachiwanchik Diospa juicionqa justo kasqantam, qamkunaqa Diospa munay-chakusqanpaqñam kankichik, chayraykum ñakarichkankichikpas.

⁶ Diosqa justom, haykam ñakarichisuqnikichiktaqa paymi ñakarichinqa,

⁷ kunan ñakariqkunamanñataqmi samayta qosunkichik ñoqaykumanwan kuska, kaykunaqa pasakunqa Señor Jesucristo hanaq pachamanta atiy qosqan angelninkunawan rawrachkaq ninapi hina hamuptinmi.

⁸ Hinaspam Dios mana reqsiqkunatawan Señorninchik Jesusmanta allin noticia mana kasukuqkunata castiganqa.

⁹ Paykunaqa wiñaypaq castigasqa kaspankum Señorpa qayllanmanta hinaspa suma-sumaq atiyninmanta qarqosqa kanqaku.

¹⁰ Chay punchawmi Señor kutimunqa chuya llaqtanpa alabasqan chaynataq iñiqkunapa admirasqan kananpaq. Chaypim qamkunapas kankichik allin noticia willasqaykupi iñisqaykichikrayku.

¹¹ Chayraykum tukuy tiempo qamkunapaq Diosta mañapuykiku. Diosninchikyá allinpaq hapisuspaykichik qayasusqaykichik-man hina, atiyninwan tukuy allin munasqaykichikta cumplichun, cumplichuntaqyá iñiynikichikwan llamkasqaykichikpipas.

¹² Chaynapim Señor Jesucristopa sutin hatunchasqa qamkunapi kanqa, paypitaqmi qamkunapas hatunchasqa kankichik, chaynaqa kanqa Dios Taytanchikpa chaynataq Señor Jesucristopa kuyakuyninraykum.