2~Samuel 9 - CHUYA QELLQA La Biblia en Quechua de Ayacucho 2012

Mefi-bosetta David yanapasqanmanta

¹ Huk punchawmi David tapukurqa: ¿Pillapas Saulpa mirayninmanta puchurqachu Jonatanrayku yanapaykunaypaq? nispa.

² Saulpa ayllunpam karqa Siba sutiyuq mayordomon, paytam Davidpa qayllanman qayachimurqaku, chaymi David tapurqa: ¿Qamchu Siba kachkanki? nispa. Sibañataqmi nirqa: Arí, ñoqam kachkani, nispa.

³ Hinaptinmi rey David tapurqa: ¿Pillapas Saulpa ayllunmanta kachkanraqchu Diospa kuyakuyninwan yanapaykunaypaq? nispa. Chaymi Siba nirqa: Kachkanraqmi Jonatanpa churin, payqa iskaynin chakinmanta suchuyasqam kallan, nispa.

⁴ Hinaptinmi David tapurqa: ¿Maypitaq payqa kachkan? nispa. Sibañataqmi nirqa: Payqa Lo-debar llaqtapim Amielpa churin Maquirpa wasinpi kachkan, nispa.

⁵ Chaymi rey Davidqa payta pusachimurqa Lo-debar llaqtapi Amielpa churin Maquirpa wasinmanta.

⁶ Saulpa willkan Jonatanpa churin Mefi-bosetmi Davidpa kasqanman chayaramuspan paypa qayllanpi qonqoranpa kumuykurqa. Chaymi David nirqa: ¡Mefi-boset! nispa. Payñataqmi nirqa: Ñoqam kani kamachiwanaykipaq, nispa.

⁷ Chaymi David nirqa: Ama manchakuychu. Ñoqam taytayki Jonatanrayku yanapaspay abueloyki Saulpa llapa allpanta kutichipusqayki, qamñataqmi ñoqawan kuska tukuy tiempo mikunki, nispa.

⁸ Hinaptinmi Mefi-boset kumuykuspan nirqa: ¿Pitaq ñoqallayqa karqani? Ñoqaqa wañusqa allqo hina mana valeqmi kallani, nispa.

⁹ Chaymantam Saulpa mayordomon Sibata qayachimuspan David nirqa: Saulpa chaynataq mirayninkunapa kapuqninkunatam lliwta patronniki Saulpa willkan Mefi-bosetman qoykuni.

¹⁰ Qanmi churikikunapiwan hinaspa serviqnikikunapiwan allpanta llamkapunki, cosechanta hoqarispaykim patronnikipa ayllunkuna mikunankupaq waqaychanki. Patronnikipa willkan Mefi-bosetmi ichaqa ñoqawan kuska tukuy tiempo mikunqa, nispa. Sibapa churinkunam karqa chunka pichqayuq, serviqninkunañataqmi karqa iskay chunka.

¹¹ Hinaptinmi reyta Siba nirqa: Reynilláy, tukuy kamachiwasqaykitam ruwasaq, nispa. Mefi-bosetñataqmi reypa churin hina reywan kuska mikurqa.

¹² Mefi-bosetpam Micaía sutiyuq taksa churin karqa. Sibapa wasinpi llapallan yachaqkunam Mefi-bosetpa serviqninkuna karqaku.

¹³ Mefi-bosetmi ichaqa reywan kuska mikuspa Jerusalén llaqtapi yacharqa. Payqa iskaynin chakinmanta suchuyasqam karqa.