2~Samuel 7 - CHUYA QELLQA La Biblia en Quechua de Ayacucho 2012

Rey Davidman Dios prometesqanmanta

¹ Muyuriqninpi enemigonkunamanta Tayta Dios hawkayayta qoykuptinmi, rey Davidqa palacionpiña yachaspan

² profeta Natanta nirqa: Qawasqaykipi hinam ñoqaqa cedromanta palaciopi yachachkani, Diospa Arcanñataqmi carpallapi kachkan, nispa.

³ Chaymi profeta Natán nirqa: Sonqoykipa nisqanman hinayá ruway, Tayta Diosmi qanwan kachkan, nispa.

⁴ Chay tutam Natanta Tayta Dios nirqa:

⁵ Rispayki serviqniy Davidman kaynata nimuy: ¿Qamchu yachanay wasita ruwapuwanki?

⁶ Egipto nacionmanta Israelpa mirayninkunata hurqomusqay punchawmantam kunankama templopiqa mana yacharqanichu, aswanqa carpallapi yachastinmi purirqani.

⁷ Llapa Israelpa mirayninkunawan tukuy tiempo purichkaspaypas, manam llaqtayta kamachinankupaq churasqay juezkunataqa mayqantapas nirqanichu cedromanta templota ruwapuwaychik nispaqa.

⁸ Chaynaqa, ñoqa Tukuy Atiyniyuq Tayta Diospa nisqaytayá serviqniy Davidman kaynata nimuy: “Oveja michis-qaykimantam Israel llaqtaypi kamachikuq kanaykipaq hurqomurqayki.

⁹ Lliw purisqaykipi yanapaspaymi llapallan contraykipi hatarimuq enemigoykikunatapas tukururqani, kay pachapi atiyniyuqkunata hinam ancha reqsisqata ruwasqayki.

¹⁰ Israel runaykunapaqpas huk sitiotam akllaruniña, chaypim paykunata churasaq manaña pipapas kuyuchisqan kanankupaq; chaypiqa manañam pipas nitaq mana allin runakunapas ñakarichinqañachu,

¹¹ imaynam Israel llaqtaypi juezkuna churasqay punchawkunapi hinaqa. Ñoqam llapallan enemigoykikunamanta hawkayayta qosqayki, miraynikimantapas reykunam hatarinqa.

¹² Machuyaruspa ñawpaq taytaykikuna hina wañukuptikim, qanmanta miramuqta kamachikunanpaq churasaq, hinaspam munaychakuyninta takyachisaq.

¹³ Paymi wasiytaqa ruwapuwanqa, ñoqañataqmi munaychakuyninta wiñaypaq takyachisaq.

¹⁴ Ñoqam paypaq taytan kasaq, payñataqmi churiy kanqa. Mana allinta ruwaptinqa, imaynam huk tayta churinta azotechkaq hinam payta azotesaq.

¹⁵ Ichaqa manam Saulmanta hinachu kuyapayakuyniyta churikimanta qechusaq. Saultaqa wischururqani rantinpi qamtaña churanaypaqmi.

¹⁶ Miraynikipas chaynataq munaychakuynikipas wiñaypaqmi takyanqa. Kamachikuynikipas wiñay-paqmi takyanqa”, nispa.

¹⁷ Chaymi profeta Natanqa visionninpi tukuy ima qawasqanta chaynataq uyarisqanta Davidman willaykurqa.

¹⁸ Hinaptinmi rey Davidqa Diospa qayllanman yaykuykuspan kaynata nirqa: Dios Taytalláy, ¿pitaq ñoqallayqa kani chaynataq aylluykunapas kaykama chayachimuwanaykipaqqa?

¹⁹ Chaypas asllapaqraq rikchakapusuptikim kay serviqnikipa mirayninkuna imaynam kananmantapas rimapayaykuwankiraq. Señor Diosnilláy, ruwasqaykita hinaqa manam ima runapas ruwanchu.

²⁰ Dios Taytalláy, ¿imatawanraqtaq nikiman? Kay serviqnikitaqa qanmi reqsiwanki.

²¹ Prometewasqaykiman hinaspa munasqaykiman hinam tukuy kay admirakuypaq kaqkunata ruwarunki, chaykunatam kay serviqnikiman reqsiykachiwanki.

²² Dios Taytalláy, ¡mayna hatunmi qamqa kanki! Qam hinaqa manam pipas kanchu. Uyarisqaykupi hinapas qanmanta sapaq Diosqa manam kanchu.

²³ Israel llaqtayki hinaqa manam kay pachapi huk nacionqa kanchu. Diosnilláy, paykunataqa qanmi libramurqanki runaykikunaña kanankupaq, admirakuypaq kaqkunata ruwaspaykim paykunataqa ancha reqsisqata ruwarqanki. Egiptomanta hurqomuspaykim qayllankumanta achka nacionkunata chaynataq idolonkunatapas wischururqanki.

²⁴ Qanmi Israelta wiñaypaq llaqtayki kananpaq takyachirqanki, qanmi paykunapa Diosnin kanki.

²⁵ Señorlláy, Dios Taytalláy, kunanyá kay serviqnikimantawan mirayninmanta rimasqaykita wiñaypaq takyachiy. Nisqaykiman hinayá ruway.

²⁶ Sutikiyá wiñaypaq hatunchasqa kachun, hinaptinyá nichunku: “Israelpa Diosninqa Tukuy Atiyniyuq Tayta Diosmi” nispanku. Kay serviqniki Davidpa mirayninkunapas yanapakuynikiwanyá takyachunku.

²⁷ Israelpa yupaychasqan Tukuy Atiyniyuq Dios Taytalláy, qanmi kay serviqnikita mirayniyuqta ruwawanaykipaq niwarqanki. Chayraykum kay serviqnikiqa mañakamunaypaq kallpanchakullani.

²⁸ Dios Taytalláy, qamqa Diosmi kanki, rimasqaykipas cheqapmi. Qanmi serviq-nikiman tukuy kaykunata prometewarqanki.

²⁹ Kunanyá kay serviqnikipa mirayninta bendeciykuy qampa qayllaykipi wiñaypaq takyananpaq. Dios Taytalláy qanmi prometewarqanki, bendicionnikiwanmi kay serviqnikipa mirayninkuna wiñaypaq bendecisqa kanqaku, nispa.