2~Samuel 5 - CHUYA QELLQA La Biblia en Quechua de Ayacucho 2012

Israelpi Davidpa munaychakusqanmanta

¹ Llapallan Israel ayllukunam Hebrón llaqtaman rispanku Davidta kaynata nirqaku: Ñoqaykuqa yawarnikipa, tulluykipa partenmi kaniku.

² Pasaq watakunapi Saúl kamachiwachkaptinkupas, qanmi Israelpa tropankunataqa kamachirqanki. Tayta Diosmi prometesurqanki: “Qanmi oveja michiq hina Israel runaykunata kamachispa munaychakunki”, nispa.

³ Chaynata nispankum Israelpi llapa ancianokuna Hebrón llaqtapi rey Davidwan parlaspanku, Tayta Dios-pa qayllanpi contratota ruwarqaku, hinaspankum Davidta Israelpa reynin kananpaq aceitewan tallispa sapaqcharqaku.

⁴ Davidqa kimsa chunka watanpim kamachikuyta qallaykurqa, hinaspam tawa chunka wata munaychakurqa.

⁵ Hebrón llaqtapi yachaspam, qanchis wata soqta killan Judá runakunata kamachirqa. Jerusalén llaqtapi yachaspanñataqmi, kimsa chunka kimsayuq wata Israelta chaynataq Judata kamachirqa.

Jerusalenman David yaykusqanmanta

⁶ Rey Davidmi tropankunapiwan Jerusalén llaqtaman rirqaku, chay llaqtapi yachaq jebuseokunawan peleananpaq. Jebuseokunañataqmi Davidta nirqaku: Manam kaymanqa yaykumuyta ati-waqchu, qamtaqa ñawsakunawan wistu-kunallaraqmi wischurusunki, nispanku. Chaynataqa nirqaku Davidpa yaykunanta mana munaspankum.

⁷ Davidmi ichaqa qaqay-qaqay perqasqa Sión llaqtata vencerurqa. Chay punchawmantam “Davidpa Llaqtan” nispa suticharqaku.

⁸ Chay punchawmi David nirqa: Pipas jebuseokunata vencey munaqqa yakupa yaykunan uchkunta ustuspayá wistukunata hinaspa ñawsakunata wañuchimuchun. Paykunaqa tukuy sonqoymanta cheqnisqaymi, nispa. Chayraykum kaynata rimaqku: “Ñawsa-kunapas wistukunapas manam Diospa templonmanqa yaykunqachu”, nispanku.

⁹ Davidmi Jerusalén llaqtapi yachayta qallaykuspan suticharqa “Davidpa Llaqtan” nispa. Hinaspam chay llaqtapa muyuriqninta, wayqota allpawan huntachisqanmanta qallaykuspa palaciokama qaqay-qaqayta perqachirqa.

Davidta rey Hiram yanapasqanmanta

¹⁰ Tukuy Atiyniyuq Tayta Dios yana-pasqanraykum Davidqa llumpay atiyniyuq rikurirurqa.

¹¹ Chaymi Tiro llaqtapa reynin Hiramqa runankunata, carpinterokunata chaynataq rumi labraqkunatapas Davidman kacharqa; apachirqataqmi cedro qerukunatapas. Paykunam Davidpa palaciota ruwapurqaku.

¹² Hinaptinmi Davidqa chayraq sumaqta yacharurqa Israel nacionpi rey kananpaq Tayta Diospa churasqanta, musyarurqataqmi Israel nacionta kuyapayaspan kamachikuyninta hatunchasqantapas.

Davidpa Jerusalenpi naceq churinkunamanta

¹³ Hebrón llaqtamanta Jerusalenman astakuruspanmi Davidqa achka warmikunawan casarakururqa, uywanakurqataqmi huk warmikunawanpas. Paykunam qarita warmita Davidpa churinkunata wachakurqaku.

¹⁴ Davidpa Jerusalenpi naceq churinkunam kaykuna: Samúa, Sobab, Natán, Salomón,

¹⁵ Ibhar, Elisúa, Nefeg, Jafía,

¹⁶ Elisama, Eliada hinaspa Elifelet.

Filisteokunata David vencerusqanmanta

¹⁷ Filisteokunam Israel nacionpi rey kananpaq David churasqa kasqanta yacharuspanku llapallanku payta maskamurqaku. Davidñataqmi chayta yachakuruspan pakakunanku sitioman ayqekurqa.

¹⁸ Filisteokunam hamuruspanku Refaim qechwapi samarurqaku.

¹⁹ Hinaptinmi Tayta Diosta David tapurqa: ¿Risaqchu filisteokunapa contranpi? ¿Paykunataqa vencechimuwankichu? nispa. Chaymi Tayta Dios nirqa: Riypuni, filisteokunataqa makikimanmi churamusaq, nispa.

²⁰ Baal-perazim sitiokama David chayaruspanmi filisteokunata chaypi vencerurqa, chayraykum nirqa: Lloqllapa wayqosqanta hinam Tayta Diosqa enemigoykunapa chawpinta ñanta kichaykapuwan, nispa. Chayraykum chay sitiota suticharqa “Baal-perazim” nispa.

²¹ Filisteokuna idolonkuta chaypi saqeruptinkum David-wan runankuna apakurqaku.

²² Filisteokunam huktawan hamuruspanku Refaim qechwapi huñunakururqaku.

²³ Chaymi Tayta Diosta David tapuptin nirqa: Ama ñawpaqninmantaqa atacaychu aswanqa muyuruspayki qepankumanta atacamuy, bálsamo sachakunapa ñawpaqninmanta.

²⁴ Bálsamo sachakunapa kallmanpi saqaqaqaqta uyarispaykim pawaykamunki. Chaynapim yachanki Filistea tropakunata wañuchimunaypaq qampa ñawpaqnikita ñoqa Tayta Dios risqayta, nispa.

²⁵ Davidmi Tayta Diospa kamachisqanman hina ruwaspa, Gabaón llaqtamanta Gezer llaqtapa hichpankama Filistea tropakunata vencerurqa.