2~Samuel 24 - CHUYA QELLQA La Biblia en Quechua de Ayacucho 2012

Llaqtata David censachisqanmanta

¹ Tayta Diosmi Israel nacionpa contranpi huktawan piñakururqa, hinaspam Davidpa sonqonman Israel runakunata yuparuy munayta churarurqa.

² Chaymi rey Davidqa paywan kuska kaq tropakunapa kamachiqnin Joabta nirqa: Israelpi ayllukunaman riy Danmanta qallaykuspa Beerseba llaqtakama hinaspa llapa runata yupamuy, chaynapi hayka kasqantapas yachanaypaq, nispa.

³ Joabmi ichaqa reyta nirqa: Yupaychasqanchik Tayta Diosyá kay nacionpi runakunata kunan kasqan-mantapas pachak kuti mastaraq mira-chichun, chaynapi qam reyniy qawanaykipaq. Chaynaqa, reynilláy ¿imapaqtaq yupachiyta munanki? nispa.

⁴ Ichaqa reypa kamachisqanmi Joab-pa chaynataq tropakuna kamachiq-ninkunapa nisqankumantapas aswan atiyniyuq karqa. Chaymi Israel runakunata yupamunankupaq reypa qayllanmanta Joabwan tropakunapa capitanninkuna lloqsirqaku.

⁵ Jordán mayuta chimparuspankum Aroer llaqtamanta hinaspa qechwapi llaqtamanta qallaykuspanku Gad llaqtakama chaynataq Jazer llaqtakama chayarurqaku.

⁶ Chaymantam Galaad lawman hinaspa Het castakunapa allpanpi Cades lawman rispa Danjaán llaqtakama chayaruspanku Sidón lawninta muyumurqaku.

⁷ Chaymantam Tiro llaqtapa cerconkunakama, Hev lawkama chaynataq Canaán lawkama rirqaku, hinaspam Neguev lawpi Judá ayllukunapa allpanpi Beerseba llaqtakama chayarurqaku.

⁸ Isqon killa iskay chunka punchawninpim lliw Israel nacionta puriyta tukumurqaku, hinaspam Jerusalenman kutimurqaku.

⁹ Chaymantam reyman Joab willarqa hayka runakunam kasqanta. Yuparamuptinkum guerrapi peleanankupaq hina qarikuna Israelpi kasqa pusaq pachak waranqa, Judapiñataq pichqa pachak waranqa.

¹⁰ Runakuna yupayta tukuruspanmi sonqonpi ñakakuspan Tayta Diosta David nirqa: Diosnilláy, hatu-hatuntam kay ruwasqaywanqa huchallikuruni, kunanmi ruegakuyki kay serviqnikita pampachaykuwanaykipaq, muspaypi hinam kayta ruwaruni, nispa.

¹¹ Tutapayta David hatariruptinmi, Tayta Diosqa Davidpa tapukunan profeta Gadman nirqa:

¹² Davidman rispa nimuy; Tayta Diosmi kaynata nin: “Kimsa castigokunamanta hukninta akllakuykuy chaynapi akllakusqaykiman hina qamta castiganaypaq”, nispa.

¹³ Hinaptinmi Davidman rispan Gad nirqa, kay kimsanmanta mayqantataq akllakunki: ¿Llaqtapi qanchis wata muchuy kanantachu? ¿Enemigoykikunapa kimsa killa qatikachasqan kaytachu? Icha, ¿nacionpi kimsa punchawpuni peste onqoy kanantachu? Chaynaqa, allinta tanteaykuy kachamuwaqniyman willamunaypaq, nispa.

¹⁴ Chaymi David nirqa: Hatun sasachakuypim rikuriruni. Runakunapa makinman wichiykuyman-taqa Tayta Diospa makinman wichiykuymi aswan allinqa, Diospa kuyapayakuyninqa hatu-hatunmi, nispa.

¹⁵ Chaynapim peste onqoyta Israel nacionman Tayta Dios kacharimurqa, chay tutapaymanta qallarispa Diospa nisqan punchawkama. Chaymi Dan llaqtamanta qallaykuspan Beerseba llaqtakama, qanchis chunka waranqa runakuna wañururqaku.

¹⁶ Jerusalenpi runakunata ángel chinkarachinanpaq kachkaptinmi, castigasqan runakunamanta llakipayarikuspan chay wañuchiq angelta Tayta Dios nirqa: ¡Chaykamallaña! ¡Amaña masta wañuchiychu! nispa. Tayta Diospa angelninñataqmi Jebús casta Araunapa eranpi kachkarqa.

¹⁷ Llaqta wañuchiq angelta rikuruspanmi Tayta Diosta David nirqa: ¡Ñoqam huchayuqqa kani! ¡Ñoqam kay mana allintaqa ruwaruni! ¿Ima huchayuqtaq kay runakunaqa? Chaynaqa, ruegakuykim ñoqatawan aylluykunata castigawanaykikupaq, nispa.

Altarta David ruwachisqanmanta

¹⁸ Chay punchawmi Davidpaman rispan Gad nirqa: Jebús casta Araunapa eranman rispayki chaypi Tayta Diospaq altarta hatarichimuy, nispa.

¹⁹ Chaymi David rispan Gadnintakama Tayta Diospa kamachisqanman hina ruwarqa.

²⁰ Araunañataqmi qawarispan reytawan serviqninkunata wasinman hamuchkaqta rikururqa, hinaspam taripaykuspan reypa ñawpaqninpi qonqoranpa kumuykuspan

²¹ kaynata nirqa: Reynilláy, ¿imaynanpitaq kay serviqnikita watukaykamuwanki? nispa. Chaymi David nirqa: Tayta Diospaq altarta ruwanaypaqmi trigo trillanayki eraykita rantiq hamuchkani, chaynapi llapa runakuna wañuchiq peste onqoy taninanpaq, nispa.

²² Araunañataqmi nirqa: Reynilláy kayqaya eraqa, munasqaykiman hina ruway, kayqaya torokunapas wañuchispa sacrificanaykipaq, trillanakunapas chaynataq yugokunapas yantapaq.

²³ Reynilláy, tukuy kaykunatam qoyki ¡Tayta Diosyá kuyapayarisunki! nispa.

²⁴ Chaymi rey David nirqa: Amayá qoyllaqa qowaychu, aswanqa qollqeywanmi rantisqayki, yupaychasqay Diosmanqa manam ofreceymanchu mana qollqeypa chanintaqa, nispa. Hinaspanmi Davidqa rantirurqa eratawan torokunata medio kilo masnin qollqewan.

²⁵ Chaypim altarta Tayta Diospaq hatarichispa animalkunata wañuchispa kañapurqa, qorqataqmi Dioswan allinlla kasqanmanta ofrendatapas. Chaymi Israel nacionpa favorninpi ruegakusqanta uyariykuspan peste onqoyta Tayta Dios tanirachirqa.