2~Samuel 23 - CHUYA QELLQA La Biblia en Quechua de Ayacucho 2012

Wañukunallanpaqña Davidpa rimarisqanmanta

¹ Davidpa wañukunallanpaqña kachkaspa rimarisqankunam kaykuna. Isaipa churin Davidmi, Tayta Diospa hatunchasqan runam, Jacobpa Diosninpa akllakusqan reymi, Israel nacionpi miskillataña takiqmi nirqa:

² Tayta Diospa Espiritunmi ñoqantakama rimarin, palabrankunam simillaypiña kachkan.

³ Israelpa Diosninmi rimarirqa, Israelta waqaychaq Diosmi niwarqa: Pipas allinta ruwaspa runakunata kamachiqmi, pipas Diosta kasukuspa runakunata kamachiqmi,

⁴ achikyaykamuptin intipa kanchariynin hina kanqa, mana puyuyuq punchawpi kanchamuq inti hinam kanqa, allpamanta pastota ikllichimuq para hinam kanqa.

⁵ Mirayniykunapas Diospim allin hapipasqa kachkan; paymi ñoqawan wiñaypaq pactota ruwarqa, allin terminonpi hinaspa allin ruwasqata. Payqa salvaykuwaspam tukuy munasqayta ruwanqa.

⁶ Mana allin ruwaqkunaqa kichka hina wischusqam kanqaku, mana pipapas makiwan hoqarinanmi kanqaku.

⁷ Hoqariyta munaqqa tenazawan otaq lanzawanmi hoqarinqa, hinaspam ninaman wischusqa kaspanku pasaypaqta ruparunqaku, nispa.

Davidpa tropankunapa allinnin qari-qari capitanninkunamanta

⁸ Kaykunam Davidpa allinnin qari-qari soldadonkuna karqaku: Tacmón casta Joseb-basebet, paymi Davidpa tropankunapa kimsa capitanninkunapa kamachiqnin karqa. Paymi huk kutipi pusaq pachak soldadokunata lanzanwan wañurachirqa.

⁹ Iskay kaqñataqmi karqa Ahohíta ayllumanta kaq Dodopa churin Eleazar, paymi karqa Davidpa kimsa allinnin qari-qari soldadonkunapa huknin; paymi Israel tropakuna lluptikuptinku Davidwan tarikurqa Filistea tropakunawan Pas-damimpi peleanankupaq.

¹⁰ Eleazarmi ichaqa sunita sayaykuspa Filistea soldadokunata makinpas utinankama wañuchirqa makinpas espadanman laqakunankama. Tayta Diosmi yanapaykurqa chay punchawpi vencenanpaq, chaymi Israel soldadokunaqa Eleazarpa kasqanman kutirqaku wañuqkunapa llapa imankupas hoqarikuqllaña.

¹¹ Kimsa kaqñataqmi karqa Agepa churin Sama, payqa karqa Arar lawpi kaqmi. Filistea tropakunam huñunakurqaku Lehi law lentejayuq chakrapi, chaymi Israel tropakuna Filistea tropakunamanta lluptirqaku.

¹² Samañataqmi chay chakrapa chawpinpi sayaykuspan defienderqa, hinaspam Filistea tropakunata vencerurqa. Chaypim Tayta Dios vencechirqa.

¹³ Huk kutipim cosecha tiempopi, kimsa chunka capitanninkunamanta, kimsa allinnin qari-qari soldadonkuna uraykurqaku, Adulampa machayninpi David kachkaptin. Filistea tropakunañataqmi Refaim Qechwapi kaq campamentonkupi kachkarqaku.

¹⁴ Davidmi pakakusqan sitiopi tarikurqa. Chay tiempopim Filistea tropakunapa cuartelnin kachkarqa Belén llaqtapi.

¹⁵ Chaypim ganasllawanña David nirqa: ¡Imaynaraq Belén llaqtapa punkunpi pozomanta yakuta tomaykuyman! nispa.

¹⁶ Hinaptinmi chay kimsan allinnin qari-qari runakuna, Filistea tropakunapa campamentonman yaykuruspanku Belén llaqtapa punkupa waqtanpi kaq pozomanta yakuta hurqomuspanku Davidman apamurqaku. Davidmi ichaqa mana tomaspan chay yakuta Diosman ofrendata hina tallispan

¹⁷ nirqa: ¡Diosyá libraykuwachun kay yaku tomanaymanta! ¿Imaynataq tomayman kay runakuna vidanta wañuypa makinman churaykuspa apamusqanku yakuta? nispa. Chaymi mana tomarqachu. Chaykunatam kay kimsa allinnin qari-qari runakuna ruwarqaku.

¹⁸ Sarviapa wawan, Joabpa wawqen Abisaimi kimsa chunka allinnin qari-qari capitankunapa kamachiqnin karqa, paymi huk kutipi kimsa pachak soldadokunata lanzanwan wañurachirqa. Chaynapim paypas chay kimsa allinnin qari-qari runakunawan kuska ancha reqsisqa karqaku.

¹⁹ Chay kimsa chunkamantam Abisaiqa ancha reqsisqa karqa, hinaspam paykunata kamachirqa, ichaqa manam chay kimsa allinnin qari-qari runakuna hinachu karqa.

²⁰ Chaymantam karqa Cabseel llaqtamanta kaq Joiadapa churin Benaía. Paymi Moab nacionniyuq Arielpa iskay allinnin qari-qari churinkunata wañurachirqa. Huk punchawmi lastamuchkaptin huk leonta wañurachirqa yakuta waqaychananku uchkupi.

²¹ Egipto nacionniyuq hatunkaray runatapas wañurachirqam lanza makintin hamuchkaqta. Benaiam huk kaspillawan chay Egipto runamanta lanzanta qechuruspa chay lanzallanwan wañurachirqa.

²² Chaykuna ruwasqanwanmi Joiadapa churin Benaía chay kimsa chunka capitankunapi ancha reqsisqa rikurirurqa.

²³ Chay kimsa chunkamanta ancha reqsisqa kachkaspapas manam chay kimsan allinnin qari-qari runakuna hinachu karqa. Chayraykum Benaiata David churarurqa waqaychaqnin soldadokunapa kamachiqnin kananpaq.

²⁴ Chay kimsa chunka capitankunapa wakiqninmi kaykuna: Joabpa wawqen Asael, Belén llaqtayuq Dodopa churin Elhanán,

²⁵ Sama hinaspa Elica, paykunaqa Harod llaqtayuqmi karqaku,

²⁶ Bet-pelet llaqtayuq Heles, Tecoa llaqtayuq Iquespa churin Ira,

²⁷ Anatot llaqtayuq Abiezer, Husah llaqtayuq Mebunai,

²⁸ Ahoa llaqtayuq Salmón, Netofa llaqtayuq Maharai,

²⁹ Netofa llaqtayuq Baanapa churin Heled, Benjamín lawpi Gabaa llaqtayuq Ribaipa churin Itai,

³⁰ Piratón llaqtayuq Benaía, Gaas wayqopi yachaq Hidai,

³¹ Arabá qechwamanta kaq Abi-albón, Bahurim llaqtayuq Azmavet,

³² Saalbim llaqtayuq Eliaba, Jasenpa churin Jonatán,

³³ Arar llaqtayuq Sama hinaspa Arar llaqtayuq Sararpa churin Ahiam,

³⁴ Maacat lawpi Ahasbaipa churin Elifelet, Gilo llaqtayuq Ahitofelpa churin Eliam,

³⁵ Carmel llaqtayuq Hezrai, Arab llaqtayuq Paarai,

³⁶ Soba llaqtayuq Natanpa churin Igal, Gad llaqtayuq Bani,

³⁷ Amón llaqtayuq Selec, Beerot llaqtayuq Naharai, paymi karqa Sarviapa wawan Joabpa yanapaqnin,

³⁸ Jatir llaqtayuq Ira hinaspa Gareb,

³⁹ chaynataq Het llaqtayuq Urías. Llapallankum kimsa chunka qanchisniyuq allinnin qari-qari capitankuna karqaku.