2~Samuel 22 - CHUYA QELLQA La Biblia en Quechua de Ayacucho 2012

Enemigonkunata venceruspa Davidpa takisqanmanta

¹ Enemigonkunamantawan Saulmanta Tayta Dios libraykuptinmi kay takita Diospaq David takirqa,

² kaynata nispa: Dios Taytalláy, amparakunay qaqam kanki, pakaykuwaspa libraykuqniymi kanki.

³ Diosnilláy, kallpanchaqniymi kanki, qamllapim hapipakusaq; atiynikiwan harkaykuwaspam salvaykuwanki, mana pipa chayay atinanpim pakaykuwanki, salvaqniymi qamqa kanki, mana allin ruwaqkunamantam libraykuwanki.

⁴ Tayta Diostam ñoqallayqa qayakusaq, payllam yupaychana Diosqa, paymi enemigoymanta salvaykuqniyqa.

⁵ Wañuymi yakupa olankuna hina wankuruwarqa, kallpachkaq lloqlla hinam mana allinkuna mancharirachiwarqa.

⁶ Wañuymi llumpayta chaqnaruwarqa, wañuymi toqlla hina hapirullawarqa.

⁷ Llakipi kaspaymi Tayta Diosta qayakurqani, yanapakuyta mañakuptiymi templonmanta Diosnillayqa uyariykuwarqa, mañakuyniytam uyariykuwarqa.

⁸ Tayta Diospa piñakuyninwanmi kay pachapas kuyurispa katkatatarqa, cielokunapa cimientonkunam kuyurirqa.

⁹ Senqanmantam qosni wicharirqa, siminmantam lenwachkaq nina lloqsimurqa rupachkaq sansatam wischumurqa.

¹⁰ Cielota kicharispam tutay-tutay puyukunapa hawanta uraykamurqa.

¹¹ Querubinpi sillakuykuspam pawarqa, wayrapa rapranpim pawarikurqa.

¹² Tutayaywanmi tapakuykurqa, yanay-yanay puyuwanmi wankukuykurqa.

¹³ Qayllanmantam kanchariywan rupachkaq sansa lloqsimurqa.

¹⁴ Hanaq pachamanta qaparimuptinmi tukuy imapa hawanpi munaychakuq Diospa rimariyninmi rayo hinaraq uyarikurqa.

¹⁵ Flechanwanmi enemigonkunata cheqechirqa, llipyakunawanmi paykunata tuñichirqa.

¹⁶ Tayta Diospa qaqchakuyninwanmi lamar qochapa ukunkunapas rikurirqaraq, Tayta Diospa qapariyninwanmi kay pachapa cimientonkunapas rikukurqaraq.

¹⁷ Diosmi hanaq pachamanta hapiykamullawarqa, achka yakupa chawpinmantam hurqoykullawarqa.

¹⁸ Atiyniyuq enemigoymantam libraykullawarqa, cheqniwaqniykunamantam libraykullawarqa; paykunaqa ñoqamanta aswan kallpayuqraqmi karqaku.

¹⁹ Sasachakuypi kachkaptiymi paykunaqa pawaykamuwarqaku, Tayta Diosllam ñoqataqa yanapaykullawarqa.

²⁰ Sasachakuymantam hurqoykullawarqa, kuyawaspanmi libraykullawarqa.

²¹ Allin kawsasqayman hinam Tayta Diosqa premiaykullawan, munasqanta ruwasqayman hinam pagaykapullawan.

²² Diosniypa yachachikuynintam waqaycharqani, manam huchallikurqanichu nitaqmi Diosmantapas rakikurqanichu.

²³ Kamachikuynikiqa ñawpaqniypim kachkan, decretoykimantaqa manam karunchakurqanichu.

²⁴ Qayllaykipiqa chuyatam kawsakurqani, mana allinkunamantam karunchakurqani.

²⁵ Chuya kasqayman hinam, allin kawsasqayman hinam, Tayta Diosqa premiaykullawan.

²⁶ Diosnilláy, kuyapayakuqkunawanqa kuyapayakuqmi kanki, allin ruwaqkunawanqa allin ruwaqmi kanki.

²⁷ Chuya runawanqa chuyam kanki, millay runawanqa sakrim kanki.

²⁸ Uchuychakuqkunatam salvaykunki, hatun tukuqkunatam ichaqa penqayman churanki.

²⁹ Diosnilláy, qanmi achkiykuwaqniyqa kanki, tutayayniytam kanchaykuwanki.

³⁰ Qanwanqa nana-nanaq tropakunatam cheqechisaq, qanwanqa hatu-hatun perqakunatam tuñichisaq.

³¹ Diospa ñanninqa mana pantayniyuqmi, Diospa promesankunaqa hapipakunapaqmi, paypi hapipakuqkunataqa waqaychanmi.

³² Diosnilláy, qamllam cheqap Diosqa kanki, qam hina waqaychakuqqa manam hukqa kanchu.

³³ Diosmi kallpanchaqniyqa, paymi allin ñanta pusawaqniyqa.

³⁴ Chakiytapas luwichupata hinaraqmi kallpachin, orqonkunata kallpaspaypas manam urmasaqchu.

³⁵ Paymi guerrapi peleanaypaq yachachiwan, broncemanta arcowan flechanaypaqmi makiyta kallpanchawan.

³⁶ Qanmi harkaykuwaspa salvaykuwanki, kuyakuynikiwan vencechiwaspam hatunchaykuwanki.

³⁷ Mana lluchkanaypaqmi ñanniytapas kichaykunki.

³⁸ Qatispam enemigoykunata chinkarachini, chinkachinaykamam mana kutimurqanichu.

³⁹ Pasaypaqtam puchukarachini manaña hatariy atinankamam ñutuparuni, chaki plantaywanmi lliwta saruparuni.

⁴⁰ Peleanaypaqmi kallpata qoykuwanki, enemigoykunatam ñawpaqniypi qonqorachinki.

⁴¹ Enemigoykunatam qayllaymanta ayqechirqanki, chaynapim cheqniwaqniykunata tukururqani.

⁴² Qayakuptinkupas manam pipas yanaparqachu; Tayta Diosta qayakuptinkupas manam uyarimurqachu.

⁴³ Ñutu allpata hinam ruwarurqani, ñanpi mituta hinam llinqaparurqani.

⁴⁴ Llaqtaypa peleakuyninmantam libraykuwarqanki, nacionkunapa kamachiqnin kanaypaqmi waqaychaykuwarqanki, mana reqsisqay llaqtakunawanmi serviykachiwanki.

⁴⁵ Mana reqsisqay runakunapa mirayninkunam hatunchawanku simiyta uyarispam chaylla kasuwanku.

⁴⁶ Mana reqsisqa runakunam hukmanyaspanku pakakusqankumanta lluptinku.

⁴⁷ ¡Tayta Dios kawsachun! ¡Harkaykuqniy Diosyá qapaqchasqa kachun! ¡Waqaychaykuwaspa salvaykuqniy Diosyá hatunchasqa kachun!

⁴⁸ Rantiypim enemigoykunamanta vengakurun, llaqtakunatam chaki plantayman churaykamun.

⁴⁹ Llapa enemigoymantam libraykuwanki contraypi hatariqkunapa hawanpiraqmi churaykuwanki, wañuchiqkunamantam libraykuwanki.

⁵⁰ Chayraykum nacionkunaman qanmanta willakusaq, takikunawanmi sutikita hatunchasaq.

⁵¹ Akllakusqayki reytam yanapaspa venceykachinki, Davidtawan mirayninkunatam wiñaypaq kuyapayaykunki, nispa.