2~Samuel 20 - CHUYA QELLQA La Biblia en Quechua de Ayacucho 2012

Davidpa contranpi Seba hoqarikusqanmanta

¹ Gilgal llaqtapim huk mana allin runa tarikurqa, paymi karqa Benjamín ayllumanta Bicripa churin Seba. Paymi trompetata tocaspan qaparirqa: Israel runakuna ¡Davidwanqa manam ima ruwananchikpas kanñachu, Isaipa churinwanqa manam herenciapas rakinakunanchikpaq kanñachu! ¡Wasikichikman sapakama ripukusunchik! nispa.

² Chaynapim Israel runakunaqa Davidta saqeruspanku Bicripa churin Sebata qatikurqaku. Judá runakunam ichaqa reyman sayapakuspa Jordán mayu patanmanta Jerusalén llaqtakama rirqaku.

³ Jerusalén llaqtapi palacionman chayaruspanmi, palacion cuidananpaq saqesqan uywanakusqan chunka warmikunata sapaq wasimanña David churarurqa. Paykunamanta nanachikuspanmi hina kikin uywarqa, ichaqa manañam paykunawan puñurqañachu, viudakuna hinam wañunankukama wichqasqa kawsarqaku.

⁴ Chaymantam Amasata rey kamachirqa: Kunanmanta kimsa punchawmanmi Judá runakunata huñumunki, hinaspam paykunawan hamunki, nispa.

⁵ Chaymi Amasa rirqa Judá soldadokuna huñumuq, ichaqa manam nisqan punchawpichu kutimurqa.

⁶ Hinaptinmi Abisaitaña David nirqa: Bicripa churin Sebaqa Absalonmantapas aswan más dañotaraqmi ruwawasun, chaynaqa soldadoykunawan paypa qepanta qatiy, yanqañataq murallasqa llaqtakunata tariruspa pakakuruwachwan, nispa.

⁷ Chaymi Joabpa soldadonkuna, reyta waqaychaq Ceret castakuna, Pelet castakuna hinaspa lliw allinnin qari-qari soldadokunapiwan Jerusalén llaqtamanta Abisaiwan lloqsispa Bicripa churin Sebata qatirqaku.

⁸ Gabaón llaqta law hatun rumipa hichpanpi kachkaptinkum Amasa hamurqa paykunawan tupaykuq. Joabmi soldado pachayuq kachkarqa, weqawninpiñataqmi vainanpi espada watasqa kachkarqa. Joab ichiptinmi vainanmanta espada wichirurqa.

⁹ Chaymi Amasata rimaykuspan Joab nirqa: ¿Hawkallachu kachkanki wawqelláy? nispa. Alleq makinwanmi barbanmanta hapiykurqa muchaykunanpaq.

¹⁰ Amasaqa manam musyarqachu Joabpa makinpi espada kasqanta. Qonqaymantam Amasata wiksanpi Joab tuksirurqa chunchulninkunapas pampaman tallikunankama. Chaylla wañurusqanraykum huktawanqa manaña tuksirqañachu. Chaymantañam Joabqa wawqen Abisai-piwan Bicripa churin Sebata qatirqaku.

¹¹ Joabpa hukkaqnin soldadonmi Amasapa ayanpa waqtanpi sayaykuspa nirqa: Joabtawan Davidta kuyaqkunaqa Joabtayá qatichunku, nispa.

¹² Amasañataqmi ñanpi hinalla yawar-ninpa hawanpi chutaykachakurqa, hinaptinmi chay soldado sapa pasaqkuna sayaykuspa qawarayasqankuta rikuruspa Amasapa ayanta ñanmanta chakra ukuman suchuchispan pachawan tapaykurqa.

¹³ Ñanmanta suchurachiptinmi runakunaqa mana sayarqakuñachu, Bicripa churin Sebata qatinankupaqmi Joabwanña rirqaku.

¹⁴ Sebam Israel casta ayllukunapa lawninta pasaruspa Abel-bet-maaca llaqtaman chayarurqa, Bicripa mirayninkunañataqmi huñunakuruspanku llaqtaman paywan kuska yaykurqaku.

¹⁵ Joabpa tropankunañataqmi Abel-bet-maaca llaqtaman chayaruspanku muyuriqninpi churakururqaku, hinaspam llaqta muyuriq perqapa qepanman allpata montoruspanku llaqta harkaq perqata tuñichiyta qallaykurqaku.

¹⁶ Chaymi huk yachaysapa warmi llaqtamanta qayaykachakamurqa: ¡Uyariwaychik, uyariwaychik! Joabta niykapamuwaychik kayman hamunanpaq, paywan rimaytam munani, nispa.

¹⁷ Joab asuykuptinmi chay warmi nirqa: ¿Qamchu Joab kachkanki? nispa. Joabñataqmi nirqa: Arí, ñoqam kani, nispa. Chay warmiñataqmi nirqa: Kay serviqnikipa rimarisqayta uyariy-kuway, nispa. Payñataqmi nirqa: Uyarisqaykim, nispa.

¹⁸ Chaymi yapamanta chay warmi nirqa: Ñawpaq tiempopim kaynata rimaqku: “Pipas tapukuy munaqqa Abel llaqtapi tapukuchun”, nispanku. Chaynatam ima sasachakuytapas arreglaqku.

¹⁹ Kay llaqtapi kaqkunaqa hawkalla kawsakuq runakunam kaniku chaynataq reypa qatiqnin runakunam. Ichaqa qanmi kay llaqtata chinkarachiypi richkanki. ¿Imanasqataq Tayta Diospa herencianta tuñichiyta munanki? nispa.

²⁰ Joabñataqmi nirqa: Chaytaqa manam piensayllapas-pien-sanichu, manam tuñichisaqchu nitaqmi purmachisaqchu.

²¹ Manam chaynachu kanqa, Efraín orqokunapi yachaq Bicripa churin Sebam rey Davidpa contranpi hoqarikurun, payllata qoykamuwaychik, hinaptinqa kutikusaqmi kay llaqtamanta, nispa. Chaymi Joabta chay warmi nirqa: Chay runapa umanta qoruruspaykum perqapa hawanta wischuramusaqku, nispa.

²² Chaymantam yuyaysapa kayninman hina chay warmi rirqa llapa runakunawan rimaq. Hinaptinmi paykuna Bicripa churin Sebapa umanta qoruruspanku Joabman wischuykamurqaku. Chaymi cornetata Joab tocachiptin, llapa runakuna llaqtamanta anchurikuspanku wasinkuman sapakama ripukurqaku. Joabñataqmi Jerusalén llaqtaman kutikurqa reywan kananpaq.

Davidpa yanapaqninkunamanta

²³ Chaynapim Joabqa lliw Israel tropakunapa kamachiqnin qeparqa. Joiadapa churin Benaiasñataqmi karqa rey waqaychaq cereteokunapa hinaspa peleteokunapa kamachiqnin.

²⁴ Adoramñataqmi karqa impuesto cobraqkunapa kamachiqninku, Ahiludpa churin Josafatñataqmi karqa imapas sucedekusqankunamanta qellqaq.

²⁵ Sevañataqmi karqa secretario, Sadocwan Abiatarñataqmi karqaku sacerdotekuna.

²⁶ Jair llaqtayuq Irañataqmi karqa Davidpa sacerdoten.