2~Samuel 2 - CHUYA QELLQA La Biblia en Quechua de Ayacucho 2012

Judá nacionpi Davidpa munaychakusqanmanta

¹ Chaykuna pasaruptinmi Tayta Diosta David tapurqa: ¿Yaqachu Judá lawpi hukkaqnin llaqtaman riyman? nispa. Chaymi Tayta Dios nirqa: Riy, nispa. Huktawanmi David tapurqa: ¿Mayqan llaqtamantaq risaq? nispa. Tayta Diosñataqmi nirqa: Hebrón llaqtamanmi, nispa.

² Chaymi Davidqa iskaynin warminkunawan: Jezreel llaqtayuq Ahinoamwan chaynataq Carmel llaqtayuq Nabalpa viudan Abigailwan, Hebrón llaqtaman qespirqaku.

³ Puriqmasin runakunatapas aylluntintakamam pusarqa; paykunam Hebrón lawpi yacharqaku.

⁴ Chaymi Judá runakuna hamuruspanku Davidpa umanman aceiteta tallispa, Judapi munaychakunanpaq sapaqcharqaku. Galaad lawpi Jabes llaqtayuqkuna Saulpa ayan pampasqankuta Davidman willaykuptinkum,

⁵ runankunata David kacharqa Galaad law Jabes llaqtapi kaqkunaman kaynata nimunankupaq: Reyninchik Saulta kuyapayarispa pampasqaykichikmantam qamkunaqa Tayta Diospa bendecisqan kankichik.

⁶ Tayta Diosyá kunan kuyapayarisunkichik. Kay ruwasqaykichikmantaqa ñoqapas allintam ruwasqaykichik.

⁷ Chaynaqa, kallpanchakuspayá qarinchakuychik, reynikichik Saúl wañuruchkaptinpas, Judá runakunam aceitewan tallispa rey kanaypaq sapaqchaykuwanku, nispa.

Israel nacionpi kikinkupura peleasqankumanta

⁸ Saulpa tropankuna kamachiq Nerpa churin Abnermi, Saulpa churin Is-bosetta Mahanaim llaqtaman pusarqa.

⁹ Paytam Galaadpi, Aserpi, Jezreelpi, Efraín ayllupi, Benjamín ayllupi hinaspa lliw Israel nacionpi munaychakunanpaq churarurqa.

¹⁰ Is-bosetmi tawa chunka watayuq kachkaspan, Israel nacionpi munaychakuyta qallaykurqa, chaypim iskay wata munaychakurqa. Judá runakunam ichaqa Davidta reyninkupaq chaskirqaku.

¹¹ Davidmi qanchis wata soqta killan, Hebrón llaqtamanta Judá runakunata kamachirqa.

¹² Nerpa churin Abnermi, Mahanaim llaqtamanta Is-bosetpa soldadonkunapiwan Gabaón llaqtaman lloqsirqa.

¹³ Sarviapa wawan Joabpas, Davidpa tropankunawanmi Hebrón llaqtamanta lloqsirqa. Iskaynin tropakunam Gabaón estanquepa waqtanpi tupanakururqaku, hinaspam chimpa-chimpa churakururqaku.

¹⁴ Chaymi Joabta Abner nirqa: Joven soldadonchikkuna lloqsispanku ñawpaqninchikpi peleachunku, nispa. Joabñataqmi nirqa: Allinmi, nispa.

¹⁵ Hinaptinmi Benjamín ayllumanta Is-bosetpa rantinmanta chunka iskayniyuq jovenkuna lloqsirqaku, Davidpa ayllunmantapas chunka iskayniyuq jovenkunam lloqsirqaku.

¹⁶ Chaymi sapakama enemigonwan umankumanta hapinakuruspanku espadankuwan waqtankupi tuksinakururqaku, chaynapim llapallanku wañururqaku. Chayraykum chay lugarta “Helcat-hazurim”, nispa suticharqaku. Chay lugarqa Gabaonpim tarikun.

¹⁷ Chay punchawmi llumpayta pelearurqaku, hinaptinmi Abnertawan Israel tropakunata Davidpa tropankuna vencerurqaku.

¹⁸ Chaypim Sarviapa kimsa qari wawankuna kachkarqaku: Joab, Abisai hinaspa Asael. Asaelmi karqa purunpi luwichu hina kallpaq.

¹⁹ Chaymi Abnerta Asael qatirqa alleqmanpas ichoqmanpas mana muyurispan.

²⁰ Abnerñataqmi qepanta qawarispan nirqa: ¿Manachu qamqa kanki Asael? nispa. Chaymi Asael nirqa: Arí, ñoqam kani, nispa.

²¹ Hinaptinmi Abner nirqa: Ama qatiwaychu, aswanqa alleq lawman otaq ichoq lawmanpas muyurispa hukkaqnin joven soldadota hapispayki llapa imankunatapas qechuspa apakuy, nispa. Asaelmi ichaqa hinalla qatirqa.

²² Chaymi Abnerqa yapamanta nirqa: Ama qatiwaychu, yanqañataq wañurachikiman hinaspaqa, ¿ima uyaywantaq wawqeki Joabman rikuriyman? nispa.

²³ Asael mana asuriyta munaptinmi Abnerñataq lanzapa qepanwan wiksanpi tuksirurqa wasanta lloqsinankama, hinaptinmi Asaelqa chayllapi wañururqa. Haykam Asaelpa wañurusqanman chayaqkunañataqmi qawanankupaq chaypi sayaykuqku.

²⁴ Joabwan Abisaiñataqmi Abnerta qatirqaku. Inti seqaykuytam Amma orqoman chayarurqaku; chayqa tarikun Gía sutiyuq sitiopa chimpanpim, Gabaonmanta chunniqman rina ñanpim.

²⁵ Benjaminpa mirayninkunañataqmi Abnerwan huñunakuruspanku orqopa puntanpi huk tropa hinallaña churakururqaku.

²⁶ Chaymi Joabta qayaspan Abner nirqa: ¿Tukuy tiempochu wañuchinakuyllapi kasun? ¿Manachu yachanki kayqa llakiman apawasqanchikta? ¿Haykapikamataq runaykikunata mana kamachinkichu wawqenkuta amaña qatikachanankupaq? nispa.

²⁷ Hinaptinmi Joab nirqa: Tayta Diosraykum jurayki, mana rimariykamuptikiqa achikyanankamam runaykuna sapakama wawqenkuta qatikachanmanku karqa, nispa.

²⁸ Chaymi trompetata Joab tocaykuptin lliw runankuna sayarurqaku, mana-ñam Israel castamasinkunata qatikacharqakuñachu, nitaqmi mastaqa pelear-qakuñachu.

²⁹ Abnerñataqmi runankunawan Arabá qechwanta tukuy tuta rispanku Jordán mayuta chimparuspa Bitrón lawninta Mahanaim llaqtaman chayarurqaku.

³⁰ Joabpas Abnerta qatikachasqanmanta kutiramuspanmi llapallan tropankunata huñururqa. Chaymi Davidpa tropankunata yuparuptinku Asaelwan chunka isqonniyuq soldadokuna faltarurqa.

³¹ Davidpa tropankunam Abnerpa kamachisqan Benjamín tropankunamanta kimsa pachak soqta chunka runakunata wañurachirqaku.

³² Asaelpa cuerpontañataqmi Belén llaqtapi, taytanpa sepulturanpi pamparurqaku. Joabñataqmi tropankunawan tukuy tuta rispan Hebrón llaqtapi achikyarurqaku.