2~Samuel 19 - CHUYA QELLQA La Biblia en Quechua de Ayacucho 2012

¹ Chaymi Joabman kaynata willaykamurqaku: Reymi Absalonmanta llumpayta waqachkan, nispa.

² Chaynapim llapa tropakunapaq chay kusikuy punchaw llakikuy punchawman tikrakururqa, reyqa churinmanta llakipi kasqanta uyarirusqankurayku.

³ Chay punchawmi llapa soldadokuna, guerrapi vencerachikamuspa penqakuymanta pakan-pakanlla kutimuchkaq hina pakakuspalla llaqtaman yaykurqaku.

⁴ Reyñataqmi uyanta tapakuykuspan qaparillawanña waqarqa: ¡Churilláy Absalón, churilláy, Absalón, kuyasqay churilláy Absalón! nispa.

⁵ Chaymi reypa wasinman rispan Joab nirqa: Kunanmi llapallan serviqnikikunata penqayman churarunki, paykunam vidaykita, churikikunapa, warmikikunapa chaynataq uywanakusqayki warmikunapa vidantapas librarqaku.

⁶ Cheqnisuqni-kikunata kuyaspam kuyasuqnikikunatañataq cheqninki. Kunanmi qawaykachikunki tropa kamachiqkunamantapas chaynataq serviqnikikunamantapas mana imapas qokususqaykita. Kusisqachá kawaq karqa Absalonlla kawsaptin ñoqayku lliw wañuptiykupas.

⁷ Chaynaqa, kunanyá hawaman lloqsispayki tropaykikunata allinllata rimapayamuy, mana chaynata ruwaptikiqa manam huk runallapas kunan tuta qanwan puchunqachu, chaytaqa Diosraykum jurani. Joven kasqaykimanta mana allinkuna pasasusqaykimantapas aswan mana allinraqmi kayqa karunman, nispa.

⁸ Chaymi reyqa rispan llaqtapa pun-kunpi tiyaykurqa. Reypa tiyasqanta yacharuspankum llapa tropankuna asuykurqaku. Israel runakunañataqmi sapakama wasinkuman ayqekurqaku.

Jerusalenman Davidpa kutisqanmanta

⁹ Israelpa mirayninmanta kaq llapallan ayllukunam kaynata ninakurqaku: Rey Davidqa enemigonchikkunamantam librawarqanchik, filisteokunamantapas salvawarqanchikmi, ichaqa Absalonwan guerrapi kasqanraykum payqa lluptirurqa.

¹⁰ Reyninchikpaq sapaqchasqanchik Absalonmi guerrapi wañurun, hinaptinqa ¿imanasqataq reyta mana kutichimuspa upallalla kachkanchik? nispanku.

¹¹ Hinaptinmi rey Davidqa chayta uya-riruspan, sacerdote Sadocmanwan sacer-dote Abiatarman Judá lawpi ancianokunata kacharqa kaynata nimunankupaq: ¿Imatataq qamkuna suyachkankichik palacioyman mana kutichiwaspaykichik? Israel runakunaqa ñam kutichiwanankupaq tanteanakurunkuña.

¹² Qamkunaqa aylluykunam kankichik ¿imatataq suyachkankichik mana kutichiwaspaykichik? nispa.

¹³ Amasatapas kaynatam nichimurqa: Qamqa aylluymi kanki. Joabpa rantinpim llapa tropaykunapa capitannin kanaykipaq churasqayki. Mana chaynata ruwaptiyqa Tayta Diosyá llumpayta castigawachun, nispa.

¹⁴ Chaymi Amasaqa Judá lawpi llapallan runakunapa sonqonta suwarurqa, chaymi huk runa hinalla reyta chaynataq tropankunatapas kutichimunankupaq nichimurqaku.

¹⁵ Reymi kutimuspan Jordán mayukama chayarurqa. Judá runakunañataqmi reyta chaskispa Jordán mayuta pasachimunankupaq Gilgal llaqtakama tariparqaku.

¹⁶ Bahurim llaqtayuq Benjaminpa ayllunmanta kaq Gerapa churin Simeipas, Judá runakunawanmi kallpaylla rirqa rey Davidta chaskinanpaq.

¹⁷ Paywanmi rirqaku Benjamín ayllumanta waranqa qarikuna. Rirqataqmi Saulpa ayllunpa criadon Sibapas chunka pichqan churinkunapiwan chaynataq iskay chunka esclavonkunapiwan. Paykunam manaraq rey chayamuchkaptin Jordán mayuta chimparurqaku

¹⁸ reypa ayllunta mayu pasayta yanapamunankupaq, chaynapi reypa yanapakuyninta haypanankupaq. Jordán mayuta rey chimpamunanpaq kachkaptinmi, Gerapa churin Simei reypa ñawpaqninpi pampaman kumuykuspan

¹⁹ nirqa: Reynilláy, pampachaway Jerusalenmanta lloqsimusqayki punchawpi mana allin ruwasqaymanta, amañayá sonqoykipi chayta waqaychayñachu.

²⁰ Kay serviqnikim huchallikusqayta reqsikuspay kunanpas José casta runakunamanta puntataraq hamurqani qam reynillayta chaskiykunaypaq, nispa.

²¹ Chayta uyarispanmi Sarviapa wawan Abisai nirqa: Tayta Diospa akllakusqan reyta ñakasqanmantaqa ¿manachum Simeiqa wañunqa? nispa.

²² Chaymi David nirqa: Sarviapa wawankuna, manam kayqa qamkunapa sasachakuynikichikchu, ¿imanasqataq qamkunaqa contraypi rikurirunkichik? Kunanqa yachakunim Israel nacionpi rey kasqayta, chaynaqa, ¿yaqachum kunan punchaw Israel nacionpi pipas wañunman? nispa.

²³ Chaymi Simeita juraspan rey nirqa: Manam wañunkichu, nispa.

²⁴ Saulpa willkan Mefi-bosetpas rey chaskiqmi lloqsirqa, payqa manam chakintapas mayllakurqachu, barbantapas manam siksikurqachu, nitaqmi pachantapas taqsakurqachu reypa lloqsisqan punchawmanta Jerusalenman hawkalla kutimunankama.

²⁵ Reyta chaskinanpaq Jerusalenman riptinmi, rey nirqa: Mefi-boset ¿imanasqataq mana ñoqawanchu rirqanki? nispa.

²⁶ Chaymi Mefi-boset nirqa: Reynilláy, serviqniymi engañaruwarqa. Kay serviqnikiqa wistu kasqayrayku nirqani: “Asnota caronaykapuway sillakuykuspay reywan rinaypaq” nispa.

²⁷ Reynilláy serviqniymi ichaqa qampa qayllaykipi yanqamanta tumpaykuwarqa. Qamqa Diospa angelnin hinam kanki, chaynaqa munasqaykiman hinayá ñoqawan ruway.

²⁸ Taytaypa llapallan ayllunkuna qampa qayllaykipi wañunaykupaq kachkaptiykupas, qanmi kay serviqnikita qanwan kuska mikunaypaq convidawarqanki. Chaynaqa, reynilláy, ¿imataraqtaq masta reclamaykiman? nispa.

²⁹ Chaymi rey nirqa: Manañam mastaqa rimachwanñachu. Kunanpunim kamachiki Siba sutiyuq serviqnikiwan chakrakunata partenakunaykichikpaq, nispa.

³⁰ Mefi-bosetñataqmi nirqa: Llapa chakrakunaqa Sibapaqyá kachun, ñoqapaqqa qam reyniy hawkalla palacioykiman kutikamusqaykim aswan allinqa, nispa.

³¹ Galaad law Barzilaipas Rogelim llaqtanmantam hamurqa Jordán mayuta reywan kuska chimparuspa paymanta despedikuykunanpaq.

³² Barzilaiqa pusaq chunka watayuq yuyaqñam karqa, Mahanaim llaqtapi kachkaptinmi Barzilaiqa apu-apu kasqanrayku reyta tukuy imawan yanaparqa.

³³ Barzilaitam rey nirqa: Jerusalén llaqtaman hakuchik, chaypim ñoqa uywasqayki, nispa.

³⁴ Barzilaiñataqmi nirqa: Jerusalén llaqtaman qam reyniywan rinaypaqqa manañam unay watataqa kawsaymanñachu.

³⁵ Pusaq chunka watayuqñam kani, mikusqaypa tomasqaypa gustontapas manañam musyaniñachu, qaripa otaq warmipa takisqan uyariytapas manañam atiniñachu, yanqañachá ñoqataqa nanachikuwankimanpas.

³⁶ Kay serviqnikiqa compañasqayki Jordán mayupa waklaw chimpankamallañam. Chaynaqa, amañayá imatapas ofrece-wayñachu.

³⁷ Aswanqa ruegakuykim llaqtayman kutikunaypaq, chaynapi wañukuspapas tayta-mamaypa sepulturanpa hichpanpi pampakunaypaq. Kayqaya serviqniki Quimam, qanwan riptinyá paywan imam munasqaykita ruway, nispa.

³⁸ Reyñataqmi nirqa: Chaynaqa, Quimamyá ñoqawan richun, ñoqachá paywan imam munasqaykita ruwasaq, ima mañawasqaykitapas ruwasaqmi, nispa.

³⁹ Reymi llapa runankunawan Jordán mayuta chimparurqaku. Hinaptinmi Barzilaita David muchaykuspan Tayta Diospa bendicionninta mañapurqa. Chaymantam Barzilaiqa wasinman kutikurqa.

⁴⁰ Reyñataqmi Quimamwan kuska Gilgal llaqtaman pasarqa. Rir-qakutaqmi Judá runakunapas chaynataq Israelmanta wakin runakunapas.

⁴¹ Llapa Israel runakunam reyman tari-paspanku nirqaku: ¿Imanasqataq Judá aylluykuqa hapi-kuykusunki chaynapi aylluykikunata chaynataq tropaykikunatapas Jordán mayuta chimpachimusunaykichikpaqqa? nispanku.

⁴² Chaymi Israel runakunata Judá runakuna nirqaku: Ñoqaykupaqa aylluykum reyqa, ¿imanasqataq chay ruwasqaykuwan qamkuna piñakunkichik? ¿Icha reypatachu imantapas mikuruspa paymanta ima regalotapas chaskikururqaniku? nispanku.

⁴³ Hinaptinmi Israel runakuna nirqaku: Rey Davidqa chunka kuti mastam qamkunamantaqa ñoqaykuman tupawanku, chaynaqa ¿imanasqataq despreciawankiku? ¿Manachu reyniykuta kutichimunaykupaqqa ñoqayku puntataqa ninakurqaniku? nispanku. Judá runakunam ichaqa Israel runakunamantapas aswan nanay simikunataraq rimarqaku.