2~Samuel 18 - CHUYA QELLQA La Biblia en Quechua de Ayacucho 2012

Absalón wañusqanmanta

¹ Davidmi soldadonkunata tropa-tropata rakinaspan sapa waranqa soldadokunapaq hinaspa sapa pachak soldadokunapaq kamachikuqta churarqa.

² Kimsaman tropankunata rakiruptinmi, punta kaq tropata Joab kamachirqa, iskay kaq tropatam Sarviapa wawan Joabpa wawqen Abisai kamachirqa, kimsa kaq tropatañataqmi Gat llaqtayuq Itai kamachirqa. Tropankunatam David nirqa: Ñoqapas qamkunawan kuskam peleaq risaq, nispa.

³ Ichaqa tropankunam nirqaku: Manapunim ñoqaykuwanqa riwaqchu, enemigonchiktaqa manam imapas qokunqachu ñoqayku lluptiptiykupas otaq wakin soldadokuna wañuptiykupas, qamqa chunka waranqa soldadomantapas mastam valenki. Aswanqa yanapamuwanaykikupaq llaqtapi qepay, nispanku.

⁴ Hinaptinmi rey David nirqa: Qamku-napa nisqankichik ruwasqa kachun, nispa. Llaqtapa punkunpa waqtanpi rey sayaykuptinmi tropankuna pachakninpi waranqanpi lloqsirqaku.

⁵ Reymi Joabta, Abisaita hinaspa Itaita kaynata kamachirqa: Ñoqaraykum churiy Absalonta ama imanankichikchu, nispa. Absalonmanta capitankunaman reypa kamachisqantam llapa tropakunapas uyarirqaku.

⁶ Davidpa tropankunam Israel tropakunawan peleaq lloqsirqaku. Chaymi Efraín law montepi peleaptinku,

⁷ Israel tropakuna Davidpa tropankunawan vencerachikurqaku, chay punchawpim iskay chunka waranqa soldadokuna wañururqaku.

⁸ Guerram lliw llaqtaman chayarurqa. Chay punchawqa espadawan wañuqkunamantapas mastaqa montepim wañururqaku.

⁹ Absalonmi mulanpi sillada richkaspan Davidpa tropankunawan tuparurqa, chaymi kallmasapa hatun encina sachapa ukunman mulan yaykuruptin chukchan wankikururqa, hinaptinmi warkurayachkaq qeparurqa, mulanñataqmi pasakurqa.

¹⁰ Chaytam huk runa rikuruspan Joabman willarqa: Absalontam encina sachapi warkurayachkaqta rikuramuni, nispa.

¹¹ Joabñataqmi chay runata nirqa: ¡Rikuchkaspaykiqa pampaman wichiy-kachispachiki wañurachiwaq karqa! Ñoqam pachak gramo qollqetawan weqaw watanata qoykiman karqa, nispa.

¹² Chaymi Joabta chay runa nirqa: Waranqa gramo qollqetaña qowaptikipas reypa churintaqa manam imanaymanchu karqa. Reymi kamachisurqankichik qamta, Abisaita hinaspa Itaitapas, “churin Absalontaqa amam imanankichikchu nispa”, chaytam uyarirqaniku.

¹³ Chaytaqa vidaypa contranpichá ruwayman karqa. Reypaqqa manam imapas pakasqaqa kanchu. Qampas manam yanapawankimanchu karqa, nispa.

¹⁴ Joabñataqmi nirqa: Yanqañam qanwanqa tiempoyta usu-chini, nispa. Hinaspanmi kimsa lanzawan Absalonta qasqonpi clavarurqa encina sachapi warkurayachkaqta.

¹⁵ Joabpa arman apaq chunka jovenkunapas Absalonpa muyuriqninpi churakuykuspankum wañupaykachirqaku.

¹⁶ Hinaspam cornetata Joab tocaykuspa soldadonkunata harkakuruptin Israel runakunata manaña qatirqakuñachu.

¹⁷ Absalonpa cuerpontam montepi hatun uchkuman wischuykuspa hawanman rumikunata montorurqaku. Israel soldadokunañataqmi wasinkuman sapakama ayqekurqaku.

¹⁸ Absalonmi kawsachkasparaq huk monumentota ruwarachikurqa “reypa wayqon” nisqanku sitiopi, kaynata tanteaspa: Ñoqapaqqa manam churiypas kanchu sutiy yuyarisqa kananpaqpas, nispa. Chay monumentotam kikinpa sutinwan suticharqa. Chaymi kunankama “Absalon-pa monumentonwan” reqsisqa.

¹⁹ Sadocpa churin Ahimaasmi Joabta nirqa: Ama hina kaspa kachaykuway reyman kallpaspay, imaynam enemigonmanta Tayta Dios libraykusqanta willamunaypaq, nispa.

²⁰ Chaymi Joab nirqa: Kunanqa manam willamuwaqchu, reypa churin wañusqanraykum huk punchawña willamunki, nispa.

²¹ Ichaqa Etiopía nacionniyuq soldadotam Joab nirqa: Rispayki reyman imam rikusqaykita willamuy, nispa. Hinaptinmi chay runaqa Joabpa ñawpaqninpi kumukuykurqa, hinaspam kallparqa.

²² Sadocpa churin Ahimaasñataqmi huktawan Joabta nirqa: Ima kaptinpas Etiopía nacionniyuq soldadopa qepanta kallpasaq, nispa. Joabmi ichaqa nirqa: Churilláy, ¿imapaqtaq kallpawaq? Willamusqaykimantaqa manam ima premiotapas chaskinkichu, nispa.

²³ Chaymi Ahimaas nirqa: Munanki mana munanki kallpasaqmi, nispa. Joabñataqmi nirqa: Munaspaqa kallpayá, nispa. Chaymi Ahimaasqa pampan kaq ñanninta kallpaspan Cus nacionniyuq soldadota llallirurqa.

²⁴ Davidmi llaqtapa punkunpi tiyachkarqa. Llaqta cuidaq runañataqmi punkupi perqapa hawanman seqaruspan huk runa sapallan kallpamuchkaqta rikururqa.

²⁵ Hinaspam qaparispan reyman willarqa. Reyñataqmi nirqa: Sapallan hamuspaqa allin willakuytam apamuchkan, nispa. Kallpamuq runa astawan hichpamuptinmi

²⁶ llaqta cuidaqñataq huk runatawan kallpamuchkaqta rikururqa, hinaspam punku cuidaqta qayarqa: Huk runapas sapallanmi kallpamuchkan, nispa. Chaymi rey nirqa: Chay runapas allin willakuytam apamuchkan, nispa.

²⁷ Llaqta cuidaqmi yapamanta nirqa: Punta hamuqpa kallpamuyninmi Sadocpa churin Ahimaaspa kallpayninman rikchakun, nispa. Chaymi rey nirqa: Chay runaqa allin runam, allin willakuytachá apamuchkan, nispa.

²⁸ Chayaruspanmi Ahimaasqa reyta hatunmanta rimaykuspan ñawpaqninpi pampakama kumukuykuspan nirqa: Yupaychasqayki Tayta Diosyá hatunchasqa kachun, paymi qam reyniypa contranpi hoqarikuqkunata makiykuman churaykamurqa, nispa.

²⁹ Hinaptinmi rey tapurqa: ¿Allinllachu churiy Absalón kachkan? nispa. Ahimaasñataqmi nirqa: Joab kachamuwachkaptinmi achkallaña runakuna huñunakuruspa chaqwakuchkaqta rikurqani, ichaqa manam ima pasakusqantapas yacharqanichu, nispa.

³⁰ Chaymi rey nirqa: Suchurispa chaylawpi sayay, nispa. Ahimaasñataqmi chaylawman suchurispan chaypi sayarqa.

³¹ Chayllamanmi etíope soldadopas chayaramuspan nirqa: Reynilláy, kay allin willakuytayá uyariy. Kunanmi contraykipi llapallan hoqarikuqkunamanta Tayta Dios libraykusunki, nispa.

³² Hinaptinmi etíope soldadota rey tapurqa: ¿Allinllachu churiy Absalón kachkan? nispa. Etíope soldadoñataqmi nirqa: Chay runa hinayá qam señorniy reypa enemigoykikunapas ruwasqa kachun chaynataq daño ruwasunaykipaq contraykipi llapallan hoqarikuqkunapas, nispa.

³³ Chaymi rey hukmanyaruspan punkupa altonpi cuartoman waqastin seqarqa. Waqastin rispanmi nirqa: ¡Churilláy Absalón, churilláy, Absalón! ¡Qampa rantikipi ñoqa wañuyman karqa! ¡Kuyasqay churilláy Absalón! nispa.