2~Samuel 17 - CHUYA QELLQA La Biblia en Quechua de Ayacucho 2012

Ahitofelpa consejasqanta Husai yanqachasqanmanta

¹ Absalontam Ahitofel nirqa: Kunan tutapuni chunka iskayniyuq waranqa soldadokunata akllaykuspay Davidta hayparusaq.

² Hinaspa pisipasqa mana kallpayuq kachkaptillan qonqayllamanta chayaruspay mancharirachisaq; paywan kaq llapallan runankuna ayqekuptinmi reyta sapallantaña wañurachisaq.

³ Chaynatam llapa runakunata qanwan allinyanachisaq imaynam huk warmita qosanwan allinyanachichkaq hina; qamqa huk runapa kawsaynillantam maskachkanki, paykuna kutikaramuptinqa llaqtam hawkaña kanqa, nispa.

⁴ Ahitofelpa consejasqanmi Absalon-paqpas chaynataq Israelpi llapallan ancianokunapaqpas allin rikchakarapurqa.

⁵ Chaymi Absalón nirqa: Chaynaqa, Arqui castamanta Husaitapas qayamuychik, paypa consejontawan uyarinanchikpaq, nispa.

⁶ Absalonpa kasqanman Husai chayaramuptinmi Ahitofelpa consejasqanta willaspan Absalón nirqa: ¿Ahitofelpa consejasqanman hinachu ruwasunchik icha manachu? Qamqa, ¿imaninkitaq? nispa.

⁷ Chaymi Absalonta Husai nirqa: Ahitofelpa consejo qosusqaykiqa manam allinchu.

⁸ Yachankim taytaykipa runankunaqa allinnin qari-qari soldadokuna kasqanta, kunanqa mayna piñasqachiki kachkanku, wawan qechusqa ukumari hinaraq. Taytaykiqa guerrapi peleaq runam, manam runankunawan kuskaqa puñunmanchu.

⁹ Taytaykiqa kunallanpas hukkaqnin machaypichá pakakuchkan. Sichum soldadoykikuna peleasqankupi puntata wañuruptinqa pipas uyarispam qaparinqa: “Absalonpa soldadokunam achkallaña wañurunku, nispa”.

¹⁰ Hinaptinchá maynaña guerrapi peleaq qaripas, león hina allinnin qari-qari kachkaspapas hukmanyarunqa. Llapallan Israel runakunam yachanku taytaykiqa guerrapi peleaq kasqanta chaynataq paywan kaqkunapas allinnin qari-qari soldadokuna kasqankuta.

¹¹ Chaynaqa, kaytam consejayki: Dan llaqtamanta qallarispa Beerseba llaqtakama lliw Israel nacionpi soldadokunata huñuruy, paykunaqa lamar qochapa patanpi aqo hinañam kachkanku, ichaqa qampunim guerrapi peleanankupaq pusanki.

¹² Hinaspam maymi tarisqanchikpi allpapa hawanman sulla tiyamuchkaq hinaraq paykunata atacasunchik, chaynata ruwaptinchikqa manañam paypas nitaq huk soldadollapas kawsanqachu.

¹³ Hukkaqnin llaqtapi pakakuruptinpas, lliw Israel runakunam waskakunata apasunchik, hinaspam chaywan llaqtapa ruminkunatapas wayqokama astarusunchik, huk rumillapas mana puchunankama, nispa.

¹⁴ Chaymi Absalonwan lliw Israel runakuna nirqaku: Ahitofelpa consejasqanmantapas aswan allinqa Arqui casta Husaipa consejasqanmi, nispanku. Tayta Diosmi chayta ruwarqa Ahitofelpa consejasqan allin kachkaptinpas yanqachasqa kananpaq, chaynapi Absalonman desgracia chayananpaq.

¹⁵ Husaimi sacerdote Sadocmanwan Abiatarman willarqa, imaynam Absalonman chaynataq Israelpa ancianonkunaman Ahitofelpa consejasqanta chaynataq kikinpa consejasqantapas.

¹⁶ Chaynaqa, utqayman Davidman willachimuychik: Chunniqpi ama qepaykuspa Jordán mayuta chimpay, mana chayqa reypas llapallan paywan kaqkunapas wañuchisqam kanmanku, nispa.

¹⁷ Jonatanwan Ahimaasmi Rogel pukyupa patanpi kachkarqaku, llaqtapi runakuna mana rikurunankupaq; paykunamanmi huk criada rispa willamurqa, chaynapi paykunañataq rey Davidman willamunankupaq.

¹⁸ Paykunata huk joven rikuruspanmi Absalonman willaykamurqa. Paykunam ichaqa utqayman kallpaspa Bahurim llaqtapi hukkaqninpa wasinman chayarurqaku. Chay runapa pationpi pozo-man yaykuruptinkum

¹⁹ chay runapa warminñataq pozota taparurqa hawanman trillasqa kawsayta mastaruspa, chaynapim mana pipas yacharqachu.

²⁰ Absalonpa serviqninkunam chayaruspanku wasipi yachaq warmita tapurqaku: ¿Maypitaq Ahimaaswan Jonatanqa kachkanku? nispanku. Warmiñataqmi nirqa: Mayutapas chimparunkuñachá, nispa. Maskaq rispankum mana tarimuspa Jerusalén llaqtaman kutikurqaku.

²¹ Chay maskaqkuna kutiruptillankum Ahimaaswan Jonatanpas pozomanta lloqsiruspanku rey Davidman willaq rispanku kaynata nirqaku: Apurawman mayuta chimpaychik. Ahitofelmi kayna-waknata qamkunapa contraykichikpi consejarun, nispanku.

²² Hinaptinmi manaraqpas achikyamuchkaptin Davidqa llapallan runankunapiwan Jordán mayuta chimparurqaku, manam hukllapas kaylaw chimpapiqa qeparqachu.

²³ Ahitofelñataqmi consejasqanta Absalón mana kasukuptin, asnonta caronaykuspa llaqtanpi wasinman ripukurqa. Hinaspam llapa imanta allicharuspa, teqokuruspan wañururqa, chaymi abuelonpa sepulturanpi pamparurqaku.

Davidpa Mahanaimman chayasqanmanta

²⁴ Mahanaim llaqtaman David chayaruptinmi Absalonñataq Israelpa llapallan soldadonkunawan Jordán mayuta chimpachkarqa.

²⁵ Absalonmi tropankunapa kamachiqnin Joabpa rantinpi Amasata churarurqa. Amasaqa karqa Ismael casta Itrapa churinmi, mamanñataqmi karqa Nahaspa wawan Abigail. Nahasqa karqa Joabpa maman Sarviapa ñañanmi.

²⁶ Absalonmi Israel castakunawan Galaad law allpapi campamentonkuta sayachirqaku.

²⁷ Mahanaim llaqtaman David chayaruptinmi, Rabá llaqtayuq Amón, Nahaspa churin Sobi, Lo-debar llaqtayuq Amielpa churin Maquir, Galaad lawpi Rogelim llaqtayuq Barzilai payman hamurqaku.

²⁸ Davidpaqwan runankunapaqmi apamurqaku camakunata, tazonkunata, allpa mankakunata, chaynallataq mikunankupaq trigota, cebadata, harinata, hamkata, habasta, lentejata,

²⁹ mielta, lluklluta, ovejakunata hinaspa quesota, kaynata nispanku: Chunniqpi llapa runakunaqa pisipasqa, yarqasqa hinaspa yakunayasqachá kachkanku, nispa.