2~Samuel 15 - CHUYA QELLQA La Biblia en Quechua de Ayacucho 2012

Davidpa contranpi Absalón hatarisqanmanta

¹ Tiempopa risqanman hinam Absalonqa guerrapaq carretakunata, caballokunata chaynataq pichqa chunka runakunatapas ñawpaqninta kallpanankupaq armakururqa.

² Absalonmi sapa tutapayta hatarispan llaqtaman yaykuna ñanpa patanpi sayaq, hinaspanmi pipas quejawan reyman hamuqta qayaspan tapuq: ¿Maylaw llaqtamantataq hamuchkanki? nispa. Sichum chay tapusqan runa Israelpi hukkaqnin ayllumantam nispa niptinqa,

³ Absalonmi niq: Kay sasachakuynikiqa cheqapmi, razonninpim quejakunkipas, ichaqa manam pipas reypa rantinpi atiendesuqniki kanchu.

⁴ Sichum kay nacionpi juez kanaypaq ñoqata churaykuwaptinkuqa llapallan quejayuqkunapaqcha allin arreglota ruwayman, nispa.

⁵ Chaymi pipas Absalonpa ñawpaqninpi qonqorakunanpaq asuykuptinqa makinta haywarispan abrazaykuspan muchaykuq.

⁶ Chaynatam ruwaq Israelpi runakuna allin arreglo ruwapunanpaq reyman hamuqkunawan. Chaynata ruwaspanmi Israel runakunapa sonqonta suwarqa.

⁷ Tawa wataña pasaruptinmi reyta Absalón nirqa: Ama hina kaspayá kachaykuway Hebrón llaqtaman rispay Tayta Diosman prometesqayta cumplimunaypaq.

⁸ Aram law Gesur nacionpi kachkaspaymi kaynata prometekurqani: “Sichu Jerusalén llaqtaman Tayta Dios kutirachiwaptinqa ñoqam payta servisaq”, nispay.

⁹ Chaymi rey nirqa: Riruyá, nispa. Hinaptinmi Absalonqa Hebrón llaqtaman pasaspan

¹⁰ llapallan Israel ayllukunaman willakuqkunata kacharqa kaynata nimunankupaq: Trompeta tocasqankuta uyarispaykichikmi ninkichik: ¡Absalonmi Hebrón llaqtapi munaychakuchkan! nispaykichik.

¹¹ Jerusalenmantam Absalón lloqsirqa qayachisqan iskay pachak runakunapiwan, paykunaqa mana imatapas yachastinmi rirqaku.

¹² Sacrificiota Diosman ofrecechkaspanmi Absalonqa qayachimurqa Davidpa consejaqnin Gilo llaqtapi yachaq Ahitofelta. Chaynapim reypa contranpi kaqkuna astawan miraspanku Absalonta qatirqaku.

Jerusalén llaqtamanta Davidpa ayqekusqanmanta

¹³ Huk willakuqmi Davidpa kasqanman chayaruspan kaynata willaykurqa: Llapallan Israel runakunam Absalon-wanña kachkanku, nispa.

¹⁴ Chaymi Jerusalenpi serviqninkunata David kamachirqa: Kunanpuni ayqekusunchik, Absalon-mantaqa manam lluptiyta atichwanchu, utqayman ayqekusunchik, yanqañataqmi hayparamuwaspanchik llaqtapi runakunatapas wañurachinman, nispa.

¹⁵ Hinaptinmi reypa serviqninkuna nirqaku: Ñoqaykuqa chayllam kachkaniku imam niwasqaykikuta ruwanaykupaq, nispanku.

¹⁶ Chaymi rey Davidqa palacionpi kaqkunawan kuska lloqsispan, uywanakusqan chunka warminkunatañataq wasinta nanachikunankupaq saqerqa.

¹⁷ Reymi llapallan runankunawan kuska lloqsirqa, hinaspam llaqtapa patanpi kaq wasipi samaykurqaku.

¹⁸ Llapallan serviqninkunam paywan rirqaku, reyta waqaychaq Ceret chaynataq Pelet casta soldadokunapas Gat llaqtamanta chakiwan qatimuq soqta pachak soldadokunawan kuskam ñawpaqninta rirqaku.

¹⁹ Chaypim Gat llaqtayuq Itaita rey David nirqa: ¿Imapaqtaq qamqa ñoqaykuwan riwaq? Kutispayki Absalonwan qepamuy. Qamqa llaqtaykimanta qarqomusqa huklaw llaqtayuqmi kanki.

²⁰ Qayna punchawllaraq chayamuq kachkaptikichu, ¿ñoqaykuwan hakuchik nisqayki? Ñoqaqa manam mayman rinaytapas yachakunichu, waw-qekikunawan kuska kutikuychik, Tayta Diosyá cheqaptapuni bendecisunki, nispa.

²¹ Chaymi rey Davidta Itai nirqa: Kawsaq Tayta Diosraykum hinaspa qam reyniyraykum jurani: “Wañunay otaq kawsanay kaptinpas maymi kasqaykipim ñoqapas kasaq”, nispa.

²² Hinaptinmi Itaita David nirqa: Chaynaqa, hakuchikyá, nispa. Chaynapim Gat llaqtayuq Itaiqa llapallan tropantin hinaspa aylluntin rirqa.

²³ Llapallankum llumpayta waqastin rirqaku. Qepatañataqmi rey David chaynataq paywan riq runakuna Cedrón wayqopi yakuta chimpaspanku chunniq lawman llapallanku rirqaku.

²⁴ Sacerdote Sadocpas Diospa pacto ruwasqan Arcata apaq Leví ayllukunawan kuskam rirqaku, hinaspam sacerdote Abiatarpa qayllanpi Arcata churaykurqaku, llaqtamanta runakuna lloqsiyta tukunankukama.

²⁵ Ichaqa Sadoctam rey David nirqa: Diospa Arcanta llaqtaman kutichiy. Tayta Dios kuyapayariwaspan kutichimuwaptinqa Arcatapas chaynataq yachanan carpatapas qawaykusaqraqchá.

²⁶ Sichum pay niwanqa: “Manañam munaykichu” hinaptinqa ñoqawanyá imam munasqanta ruwachun, nispa.

²⁷ Huktawanmi sacerdote Sadocta rey David nirqa: Abiatarwan kuskayá llaqtaman hawkalla kutikuychik. Qamkunawan kuskataqyá kutichun churiki Ahimaaspas chaynataq Abiatarpa churin Jonatanpas.

²⁸ Ñoqañataqmi chunniqpi kachkasaq imam pasakusqanta willamuwanaykichikkama, nispa.

²⁹ Chaymi Sadocwan Abiatarqa Diospa Arcanta Jerusalenman kutichispanku chaypi qeparurqaku.

³⁰ Davidmi waqastin Olivos wichayta qespirqa, qala chakilla chaynataq uman wankisqa. Paywan riq runakunapas umanku wankisqam waqastin rirqaku.

³¹ Davidmanmi willaykurqaku: “Ahitofelpas Absalonwan kuskam contraykipi hatarirun”, nispanku. Hinaptinmi David nirqa: Diosnilláy, Ahitofelpa tanteasqankunatayá pantarachiy, nispa.

³² Davidmi chayarurqa Diosta yupay-chana orqopa puntanman, chaymanmi lloqsimurqa reywan tupananpaq, Arqui castamanta kaq Husai, pachanpas llikipasqa chaynataq umanpas allpallaña.

³³ Chaymi David nirqa: Ñoqawan rispaykiqa sasachakuytam qowankiman.

³⁴ Aswanqa Jerusalenman kutispa Absalonta nimuy: Reynilláy, imaynam taytayki servisqayta hinam qamtapas servisqayki, nispayki. Chaynata ruwaspaykim Ahitofelpa tanteasqankunata yanqachanki.

³⁵ Sacerdote Sadocwan Abiatarpas chaypim kachkanku, chaynaqa palaciopi imataña uyarispaykipas paykunamanmi willanki.

³⁶ Sadocpa churin Ahimaaswan Abiatarpa churin Jonatanpas chaypim kachkanku, imataña uyarisqaykitapas paykunawanmi willachimuwanki, nispa.

³⁷ Jerusalenman Absalón yaykuy-kuch-kaptinmi Davidpa amistadnin Husaipas llaqtaman chayarurqa.