2~Samuel 14 - CHUYA QELLQA La Biblia en Quechua de Ayacucho 2012

Absalonta Joab kutichimusqanmanta

¹ Sarviapa wawan Joabmi yacharurqa Absalonmanta rey David llakikusqanta.

² Chaymi Tecoa llaqtamanta sakri warmita pusachimuspa Joab nirqa: Ama hina kaspayá wañuchikuq warmi hina luto pachawan churakuspayki ama aceitewanpas tallikuspa, aswanqa wañukuqninmanta unayña llakikuq warmiman rikchakuy.

³ Hinaspayá reypa qayllanman yaykuspayki imam yachachisqayta willamuy, nispa. Hinaspanmi chay warmita imakunam rimanantapas yachachirqa.

⁴ Reypa qayllanman yaykuruspanmi pampaman kumuykuspan chay warmi nirqa: ¡Reynilláy yanapaykullaway! nispa.

⁵ Davidñataqmi nirqa: ¿Imanantaq? nispa. Hinaptinmi chay warmi nirqa: Cheqaptapunim ñoqaqa viuda kani, qosaymi wañukunña.

⁶ Ñoqapam iskay qari wawaykuna kapuwarqa, paykunam campopi peleaptinku mana pipas amachaqninku kaptin wawqenta huknin wañurachirqa.

⁷ Chaymi ñoqapa contraypi llapallan aylluykuna hatariramuspa niwachkanku: Wawqen wañuchiq wawaykita makiykuman churamuy wawqen wañuchisqanmanta wañuchinaykupaq, chaynapi herencia chaskinantapas amaña chaskinanpaq, nispanku. Chaynaqa, reynilláy, huknin wawaytachiki nina sansa hina kachkaqta chinkarachinqaku, hinaptinchá qosaypa sutinpas chaynataq mirayninpas kay pachamanta chinkarunqa, nispa.

⁸ Hinaptinmi chay warmita rey nirqa: Wasikiman kutikuy, ñoqam kay sasachakuynikita allichasaq, nispa.

⁹ Chaymi Tecoa llaqtayuq warmi nirqa: Reynilláy, aylluykunawan ñoqayá chaymantaqa huchayuq kasaqku, amayá qamchu nitaq kamachikuqkunachu, nispa.

¹⁰ Reyñataqmi nirqa: Contraykipi rimaqta pusamuway chaynapi mana pipas imanasunaykipaq, nispa.

¹¹ Hinaptinmi chay warmi nirqa: Reynilláy, ruegakuykim, ama wawallayta wañurachinanpaqyá yupaychasqayki Tayta Diosta mañakuy, mana chayqa huknin wawallaytawanchá wañurachinqaku, nispa. Reyñataqmi nirqa: Tayta Diosraykum jurani, wawaykipaqa manam umanpi huk chukchallanpas wichinqachu, nispa.

¹² Ichaqa chay warmim yapamanta nirqa: Reynilláy kayllatañayá niykullasqayki, nispa. Chaymi rey David nirqa: Rimariyá, nispa.

¹³ Hinaptinmi chay warmi nirqa: Chaynata rimaspaykiqa, ayqekuq churikita mana kutichimusqaykiraykum kikillayki huchayuq kanki. Chaynaqa, ¿imanasqataq Diospa llaqtanpa contranpi chaynata tanteanki?

¹⁴ Lliwpas wañuqllam kanchik, pampaman yaku tallisqa hina waspiruqllam kanchik. Nitaqmi Diospas runapa vidantaqa qechunchu, aswanqa qarqosqa runa payman kutirikamunanpaqmi tukuy imata ruwaspan yanapan.

¹⁵ Reynilláy, runakuna manchachiwaptinmi kaykunata niykuqniki hamurqani: “Kunanyá reyta nimusaq, icharaqpas nisqayta ruwanman”, nispay.

¹⁶ Uyariykuwaspaykiqa wawaytawan kuskatam libraykuwanki Diospa herencia qowasqankumanta chinkarachiy munawaqniy runamanta.

¹⁷ Reynilláy, ñoqaqa munani sonqollay tiyaykachinaykitam, qamqa Diospa angelnin hinam allin kaqta mana allin kaqtapas sumaqta reqsinki. Tayta Diosyá qanwan kachun, nispa.

¹⁸ Chaymi chay warmita rey David nirqa: Kunanmi ama pakaykuspa imam tapusqayta willawanki, nispa. Hinaptinmi reyta chay warmi nirqa: Reynilláy, tapuykuwayá, nispa.

¹⁹ Chaymi rey kaynata tapurqa: ¿Manachum tukuy kaykuna niwasqaykiqa Joabpa nimususqayki? nispa. Chay warmiñataqmi nirqa: Reynilláy, kay niwasqaykiqa cheqapmi, arí serviqniki Joabmi ima ninaytapas sumaqta umachaykamuwaspan kamachimuwarqa.

²⁰ Payqa imam pasakusqanta allichananpaqmi tukuy kaykunata ruwarqa. Ichaqa qanmi Diospa angelnin hina ancha yachayniyuq kasqaykirayku kay nacionpi tukuy ima pasakusqanta yachanki, nispa.

²¹ Chaymantam Joabta rey nirqa: Mañakusqaykiyá ruwasqa kachun: Rispayki Absalonta kutichimuy, nispa.

²² Hinaptinmi Joabqa pampakama kumuykuspan Davidta bendeciykuspan nirqa: Reynilláy, kunanmi kay serviqnikipa mañakusqanta ruwaykusqaykiwan kay serviqniki kuyapayasqaykita qawaykachikunki, nispa.

²³ Chaymi Joabqa Gesur nacionman rispan Jerusalén llaqtaman Absalonta pusamurqa.

²⁴ Ichaqa Davidmi nirqa: Absalonqa wasinman ripuchun, chaynapi ama rikuwananpaq, nispa. Chaymi Absalonqa wasinman ripukuspa reyta mana rikurqachu.

²⁵ Israel nacionpiqa manam pipas Absalón hina ancha kuyayllapaqqa karqachu. Payqa chaki pampanmanta uma puyukninkama kuyayllapaqmi karqa.

²⁶ Chukchantapas llumpayta llasasqanraykum sapa wata tukuyta rutuchikuq, ruturuspanku chukchanta pesaptinkum reypa balanzanpi iskay kilo masninta llasaq.

²⁷ Absalonpam churinkuna nacerurqa, kimsa qari huk warmi. Warmi churintam Tamarwan suticharqa, payqa ancha kuyayllapaq sipasmi karqa.

²⁸ Iskay watam Jerusalenpi Absalón yacharqa, ichaqa manam reypa qayllanman yaykurqachu.

²⁹ Huk punchawmi reypa qayllanman kachananpaq Joabta Absalón qayachirqa, Joabmi ichaqa hamuyta mana munarqachu. Kaqllamanta qayachiptinpas Joabqa manam hamuyta munarqachu.

³⁰ Chaymi serviqninkunata Absalón nirqa: Chakraypa waqtanpi Joabpa cebada chakranta kañaykamuychik, nispa. Chaymi Absalonpa serviqninkuna Joabpa cebadanta kañaykamurqaku.

³¹ Hinaptinmi Joabqa Absalonpa wasin-man rispan nirqa: ¿Imanasqataq serviqnikikuna cebadayta kañaykamurqaku? nispa.

³² Absalonñataqmi nirqa: Ñoqam qayachimurqayki rantiypi rispa reyta kaynata nimunaykipaq: ¿Imapaqtaq Gesur nacionmanta hamurqani? Allinchá kanman karqa hinapi kamuyniy. Kunan-punim reyta qawamusaq, huchayuq kaptiyqa wañuchiwachun, nispa.

³³ Chaymi reypa kasqanman rispan Joab chaykunata willaykuptin Absalonta qayachirqa. Hinaptinmi Absalonqa reypa kasqanman yaykuykuspan pampaman kumuykurqa. Davidñataqmi Absalonta muchaykurqa.