2~Samuel 11 - CHUYA QELLQA La Biblia en Quechua de Ayacucho 2012

Davidpa waqllikuy huchamam wichiykusqanmanta

¹ Hamuq wata chayaramuptinmi, reykunapa guerraman lloqsinanku tiempopi, Joabta chaynataq Israel tropakunata capitannintintakama David kamachirqa Amonpa tropankunawan peleamunanpaq; chaymi Amón tropakunata venceruspanku Rabá llaqtatapas muyuriqninpi churakuruspanku wichqarurqaku. Davidmi ichaqa Jerusalenpi qeparurqa.

² Hinaspam Davidqa tarde lawta camanmanta hatariruspan palacionpa altosninpi ichikachachkarqa, hinaspam ancha kuyayllapaq warmita bañakuchkaqta rikuruspan,

³ pim chay warmi kasqanta yachananpaq tapuchimurqa, hinaptinmi Davidman kaynata willarqaku: Payqa Eliampa churin Betsabeymi, Het casta Uriaspa warminmi kasqa, nispanku.

⁴ Hinaptinmi Davidqa Betsabeyta pusamunankupaq runankunata kacharqa. Pusaramuptinkum paywan puñururqa; chaymantam Betsabeyqa wasinman kutikurqa. Payqa chayllaraqmi killanwan onqosqanmanta chuyanchakururqa.

⁵ Betsabeymi wiksayuq rikuriruspan Davidman willaykachimurqa: Wiksayakurunim, nispan.

⁶ Hinaptinmi Joabman David kunarqa: Het casta Uriasta kachamuway, nispa. Chaymi chaynata Joab ruwarqa.

⁷ Urías hamuruptinmi David tapurqa Joabpa imaynam kasqanmanta chaynataq tropakunapa guerrapi imaynam kasqanmantapas.

⁸ Chaymantam Uriasta David nirqa: Wasikiman rispa warmikiwan puñukamuy, nispa. Palaciomanta Urías lloqsiruptillanmi Davidqa kikinpa mikunanmanta huk regalota apachirqa.

⁹ Uriasmi ichaqa wasinman mana rispa, reypa serviqninkunawan palaciopa punkunpi puñururqa.

¹⁰ Wasinman Urías mana chayasqanta paqarinnintin Davidman willaykuptinkum Uriasta tapurqa: Guerraman risqaykimanta kutiramuchkaspaqa, ¿imanasqataq mana wasikimanchu rirqanki? nispa.

¹¹ Uriasñataqmi nirqa: Diospa Arcanpas, Israel tropaku-napas, Judá tropakunapas, kamachiwaqniy Joabpas serviqninkunapiwan carpallapi hawa pampapi kachkaptinkuchu, ¿ñoqañataq mikukuq, tomakuq hinaspa wasiyman yaykuyman karqa warmiywan puñukuq? Vidaykiraykum jurani, manapunim chaytaqa ruwaymanchu, nispa.

¹² Chaymi David nirqa: Kunanqa kaypiraqyá qepariy, paqarinñam aviasqayki, nispa. Hinaptinmi Uriasqa Jerusalenpi paqa-rinnintinkama qeparurqa.

¹³ Davidmi mikunankupaq tomanankupaq convi-darqa, hinaspam sinkanankama upya-rachirqa. Chaywanpas Uriasqa manam wasinman ripurqachu, aswanqa reypa serviqninkunawan kuskam puñururqa.

¹⁴ Paqarinnintinmi Joabman cartata David qellqarqa, hinaspam kikin Uriaswan apachirqa.

¹⁵ Chay cartapim nirqa: Uriasta llumpa-llumpay wañuchinakuypa chawpinman churaruy hinaspa paymanta suchurikuychik, chaynapi wañurachinankupaq, nispa.

¹⁶ Chaymi Joabqa llaqtata atacaspan allinnin qari-qari soldadokunapa kasqanman Uriasta churarurqa.

¹⁷ Llaqtamanta soldadokuna lloqsiramuspankum Joabwan pelearqaku; Davidpa tropankunamantam achka soldadokuna wañururqaku, Het casta Uriaspas chaypim wañurullarqa.

¹⁸ Hinaptinmi Joabqa Davidman willa-chimurqa guerrapi tukuy ima pasakusqanmanta.

¹⁹ Hinaspanmi kachasqan runata kaynata umacharqa: Guerramanta tukuy imata reyman willaykuptikiqa

²⁰ ichapas piñakuspan tapusunkiman: “¿Imanasqataq peleanaykichikpaq llumpayta llaqtaman asuykururqankichik? ¿Manachu perqa hawankunamanta tukuy imawan choqamusunaykichikta yacharqankichik?

²¹ ¿Pitaq Jerobaalpa churin Abimelecta wañurachirqa? ¿Manachu huk warmi Tebes llaqtapa perqanmanta pakisqa maray rumita kachaykamuspa?” nispa, hinaptinqa kaynatam ninki: “Serviqniki Het casta Uriaspas wañurunmi”, nispayki.

²² Chay willakuqmi Davidpa kasqanman chayaruspan, Joabpa tukuy ima kunamusqanta kaynata willarqa:

²³ Contraykupi lloqsimuq soldadokuna vencewachkaptinkupas llaqtapa punkunkamam qatirurqaniku.

²⁴ Ichaqa serviqnikikunapa contranpi perqamanta flechamuptinkum wakin serviqnikikuna wañururqaku, Het casta serviqniki Uriaspas wañurunmi, nispa.

²⁵ Chaymi willakuqta David nirqa: Kallpanchaspayá Joabta nimuy: “Ama llakikuychu, guerrapiqa pipas wañunmi. Aswanraqyá chay llaqtata atacaychik chinkachinaykichikkama”, nispa.

²⁶ Betsabeymi qosan Uriaspa wañurusqanta yacharuspan llumpayta waqallarqa.

²⁷ Lutokusqan tiempo pasaruptinmi Uriaspa viudanta palacionman David pusachimurqa. Chaymi warminña kaspan Davidpa qari churinta wachakurqa. Ichaqa Davidpa ruwarusqanqa manam Tayta Diospa munasqanman hinachu karqa.