2~Reyes 9 - CHUYA QELLQA La Biblia en Quechua de Ayacucho 2012

Jehupa munaychakusqanmanta

¹ Profeta Eliseom, profetakunapa hukninta qayaykuspan nirqa: Alistakuspa kay aysakupi aceiteta aparikuspayki Galaad lawpi Ramot llaqtaman riy.

² Chayaruspaykim Nimsipa willkan, Josafatpa churin Jehuta maskanki. Hinaspam paypa kasqanman yaykuspayki, kuska kaq masinkunamanta sapaq cuartoman pusaykunki.

³ Chaypim kay apasqayki aceiteta umanman talliykunki kaynata nispayki: “Tayta Diosmi nisunki: Ñoqam Israelpa reynin kanaykipaq akllayki, nispa. Chaymantam punkuta kichaykuspa lluptikamunki”, nispa.

⁴ Hinaptinmi chay jovenlla profeta Galaad law Ramot llaqtaman rirqa.

⁵ Chayaruptinmi tropakunapa capitanninkuna huñunasqa tiyachkasqaku, chaymi asuykuspan nirqa: Capitán, qanwanmi rimayta munani, nispa. Chaymi Jehú tapurqa: ¿Mayqanniykuwan? nispa. Hinaptinmi chay profeta nirqa: Qanwanmi capitán, nispa.

⁶ Hatarispan cuartoman Jehú yayku-ruptinmi, aceiteta umanman talliykuspan chay profeta nirqa: Israelpa yupaychasqan Tayta Diosmi kaynata nin: “Ñoqam Israel nacionpi rey kanaykipaq sapaqchayki.

⁷ Qanmi reyniki Acabpa mirayninkunata wañuchinki, chaynatam Jezabelta vengakunki serviq-niy profetaykunapa yawarnin chaqchus-qanmanta.

⁸ Acabpa llapallan castankunatam chinkachisaq, qari churinkunatam Israelmanta tukusaq, criado kaptinkupas chaynataq libre kaptinkupas tukusaqmi.

⁹ Imaynam Nabatpa churin Jeroboampa mirayninkunata chaynataq Ahiaspa churin Baasapa mirayninkunata chinkachirqani chaynatam Acabpa mirayninkunatapas tukurusaq.

¹⁰ Jezabeltapas Jezreel chakrapim allqokuna mikunqa, manam pampaqninpas kanqachu”, nispa. Chaynata niykuspanmi chay joven profeta punkuta kichaykuspan lluptikurqa.

¹¹ Cuartomanta Jehú lloqsiramuspan reypa serviqnin capitankunaman asuykuptinmi tapurqaku: ¿Imanantaq? ¿Imapaqtaq wak loco qayasusqanki? nispanku. Chaymi Jehú nirqa: Wak runataqa reqsinkichikmi, rimas-qantapas yachankichiktaqmi, nispa.

¹² Chaymi paykuna nirqaku: Ama llullakuwaykuchu. Imam nisusqaykita willaykuwayku, nispanku. Jehuñataqmi nirqa: Kaykunatam niwarqa. Tayta Diosmi kaynata nin: “Ñoqam Israelpi rey kanaykipaq sapaqchayki”, nispa.

¹³ Hinaptinmi Jehú sarunanpaq llapa capitankuna capankuta gradaskunaman chaylla mastarqaku, chaymantam cornetata tocaspanku qaparirqaku: “Jehuñam reyqa”, nispanku.

Rey Joramta Jehú wañuchisqanmanta

¹⁴ Rey Jorampa contranpim Nimsipa willkan Josafatpa churin Jehú hoqarikururqa. Chay punchawkunam Joramqa Israel runakunapiwan Siria nacionpa reynin Hazaelmanta Galaad law Ramot llaqtata defiendespan kachkarqa.

¹⁵ Ichaqa Siriapa reynin Hazaelwan peleasqanpi kirirusqankuraykum rey Joramqa hampichikunanpaq Jezreel llaqtaman kutikurqa. Chaymi riqmasinkunata Jehú nirqa: Rey kanayta munaptikichikqa amam pipas kay llaqtamanta lluptinqachu, chaynapi Jezreel llaqtaman rispan ama willakamunanpaq, nispa.

¹⁶ Hinaptinmi Jehuqa guerrapaq carretanman seqaruspan Jezreel llaqtaman pasarqa, chaypim rey Joram onqospan kachkarqa. Judá nacionpa reynin Ocoziaspas Joramta watukuq rispanmi chaypi kachkarqa.

¹⁷ Jezreel llaqtapa torrenmanta llaqta waqaychaq guardianmi Jehuta tropantinta llaqtaman asuykamusqanta rikuruspan qayakurqa: ¡Tropatam rikuruni! nispa. Hinaptinmi Joram kamachikurqa: Hukkaqninta kachaychik caballopi sillakuykuspa taripananpaq, imamanmi hamusqankuta tapuramuchun, nispa.

¹⁸ Chay silladam taripaykuspan ta-puykurqa: Reymi munan imamanmi hamusqayki yachaykuyta, nispa. Jehuñataqmi nirqa: ¿Imataq qamtaqa qokusunki? Qepayman churakuspayki ñoqaykuwan riy, nispa. Llaqta waqaychaqñataqmi willakurqa: Kachasqanchik soldadom paykunaman chayarun ichaqa manam kutimunchu, nispa.

¹⁹ Hinaptinmi reyqa yapamanta huk silladata kacharqa, chaymi paypas chayaruspan tapurqa: Reymi munan imamanmi hamusqayki yachaykuyta, nispa. Chaymi Jehú nirqa: ¿Imataq qamtaqa qokusunki? Qepayman churakuspayki ñoqaykuwan riy, nispa.

²⁰ Llaqta waqaychaqñataqmi kaqllamanta willakurqa: Kunan kachasqanchikpas chayarunmi ichaqa manam kutimunchu. Puntamuqqa rikchakun Nimsipa willkan Jehumanmi, locollañam carretapi kallpamuchkan, nispa.

²¹ Chaymi Joram kamachirqa: Carretayman caballokunata wataychik, nispa. Wataruptinkum Israel nacionpa reynin Joramwan Judá nacionpa reynin Ocozías sapakama carretankupi lloqsirqaku Jehuta taripanankupaq, hinaspam Jezreel llaqtayuq Nabotpa chakranpi tuparurqaku.

²² Jehuta rikuruspanmi Joram nirqa: ¿Hawkayaypichu hamuchkanki? nispa. Chaymi Jehuñataq nirqa: ¿Ima hawkayaytataq aparamusqayki, mamayki Jezabelpas tukuy rikchaq idolokunata qatispa brujeriakunata ruwachkaptinqa? nispa.

²³ Chaynata niykuptinmi Joramqa carretanta qepaman muyurichispan lluptikurqa kaynata nispan: ¡Ocozías, traicionmi kayqa! nispa.

²⁴ Jehuñataqmi flechanta hapiykuspan qepanmanta Joramta flecharurqa. Sonqonta flecha lloqsiruptinmi Joramqa carretanmanta wichiykurqa.

²⁵ Chaymi yanapaqnin Bidcarta Jehú kamachirqa: Hoqarispayki Jezreel llaqtayuq Nabotpa chakranpa patanman wischuykamuy. Yuyariyá, iskayninchik taytan Acabta servispa carretapi qatichkaptinchikmi, Acabpa contranpi Tayta Dios nirqa:

²⁶ “Qayna punchawmi Nabotpa chaynataq churinkunapa yawarninta rikurqani, chaymi ñoqa Tayta Dios kaynata niki: Kay ruwasqaykimantaqa hina kay chakrapim vengakusqayki”, nispa. Chaynaqa, Tayta Diospa nisqanman hinayá Nabotpa chakranman wikapaykamuy, nispa.

Rey Ocoziasta Jehú wañuchisqanmanta

²⁷ Judá nacionpa reynin Ocoziasñataqmi chaykunata rikuruspan Bet-hagan lawman riq ñanninta lluptikurqa. Jehuñataqmi kaynata nispan qatirqa: Waktawan carretanpi wañuchiychik, nispa. Chaymi Ibleam llaqtapa hichpan Gur sutiyuq wichaypi kirirurqaku. Ocoziasmi ichaqa Meguido llaqtaman lluptiruspan chaypiña wañururqa.

²⁸ Chaymi serviqninkuna carretapi aparuspanku Jerusalén llaqtapi “Davidpa Llaqtanwan” sutichasqankupi, ñawpaq taytakunapa kasqanpi pamparurqaku.

²⁹ Rey Ocoziasqa Judá nacionpi munaychakuyta qallarirqa, Acabpa churin Joram chunka hukniyuq wataña Israel nacionpi munaychakuchkaptinmi.

Jezabelta wañuchisqankumanta

³⁰ Chaymantam Jezreel llaqtaman Jehú rirqa. Jezabelñataqmi Jehupa hamusqanta yachaykuspan ñawinkunata pintakururqa, chukchantapas sumaqta allichakuruspanmi ventananmanta qawamurqa.

³¹ Llaqtapa punkunman Jehú chayaruptinmi Jezabel nirqa: Yaw, reynin wañuchiq Zimri, ¿hawkallarachum kachkanki? nispan.

³² Jehuñataqmi ventanata qawarispan nirqa: ¿Pitaq ñoqawan kachkan? nispa. Chaymi reypa palacionpi servikuqkunamanta iskay-kimsa eunucokuna ventanamanta Jehuta qawariykamurqaku.

³³ Paykunatam Jehú kamachirqa: ¡Chay warmita wischuykamuychik! nispa. Hinaptinmi wischuykamuptinku perqamanwan caballokunaman Jezabelpa yawarnin pawaykurqa. Jehuñataqmi carretanwan chay warmipa hawanta pasarurqa.

³⁴ Chaymantam mikuyta upyayta tukuruspan Jehú kamachikurqa: Chay ñakasqa warmita qawaramuychik hinaspa pamparamuychik reypa churin kasqanrayku, nispa.

³⁵ Pampamunankupaq chayaruspankum uma tulluntawan makinkunata chaynataq chakinkunallantaña tarirurqaku.

³⁶ Chaymi kutirispanku willaykuptinku Jehú nirqa: Diosmi Tisbe llaqtayuq serviqnin Eliasnintakama nirqa: Jezreel llaqtapi kaq chakrapim Jezabelpa aychanta allqokuna mikunqa.

³⁷ Jezabelpa ayanqa wanu hinam Jezreel llaqtapi chakrakunata wanuchanqa, manañam pipas: “Kayqa Jezabelmi” ninqakuñachu, nispa.