2~Reyes 8 - CHUYA QELLQA La Biblia en Quechua de Ayacucho 2012

Sunem warmipa kapuqninkunata kutiykachisqanmanta

¹ Kawsarichisqan warmapa mamantam Eliseo nirqa: Kay nacionmanmi yarqayta qanchis watapuni Tayta Dios kacharimunqa, aylluykikunapiwan huklaw llaqtaman ripukuy chaypiña yachamunaykipaq, nispa.

² Profeta Eliseopa nisqanman hinam, chay warmiqa ayllunkunapiwan filisteokunapa allpanman ripukuspan qanchis wata chaypi yachamurqa.

³ Qanchis watamantam filisteokunapa allpanmanta, llaqtanman kutiruspan wasintawan chakrankunata kutiykachipunanpaq reyta mañakurqa.

⁴ Reyñataqmi profeta Eliseopa serviqnin Giezita kaynata nichkarqa: Eliseopa admirakuypaq ruwasqankunamanta willaykuway, nispa.

⁵ Chaymi wañusqanmanta warmata Eliseopa imaynam kawsarichisqanmanta reyman Giezi willachkaptin, chay warmapa maman chayarurqa wasinta chaynataq chakrankunata kutiykachipunanpaq mañakuq. Chaymi reyta Giezi nirqa: Reynilláy, kay warmipa wawantam Eliseoqa kawsarirachirqa, nispa.

⁶ Reypas warmita tapuykuptinmi paypas chaynallata willakurqa, chaymi serviqninta rey kamachirqa: Kay warmipa tukuy imankunata kutichipuychik, kutichipuychiktaq saqe-rusqanmantapuni kunankama chakrankunapa rurusqantapas, nispa.

Siria nacionpi Hazael munaychakusqanmanta

⁷ Damasco llaqtaman Eliseo chayaruptinmi Siria nacionpa reynin Ben-adad onqochkarqa, chaymi payman willay-kurqaku: Diospa profetanmi kayman chayaramun, nispanku.

⁸ Chaymi Hazaelta rey kamachirqa: Regalota aparikuspayki Diospa profetanta watukaramuy hinaspa paynintakama Tayta Diosta tapukaramuy kay onqoyniymanta sanoyanayta otaq mana sano-yanaytapas, nispa.

⁹ Damasco llaqtapi tukuy ima allinnin kaqkunamanta regalota tawa chunka camellokunapi cargarikuspanmi Eliseota watukuq Hazael pasarqa. Chayaruspanmi paypa qayllanpi sayaykuspan nirqa: Siria nacionpa reynin churiki Ben-adadmi kachamuwan kaynata nispan: “¿Kay onqoyniymanta sanoyasaqchu icha manachu?”, nispa.

¹⁰ Hinaptinmi Eliseo nirqa: Rispayki nimuy: “Kay onqoynikimantaqa sanoyankim”, nispayki. Chaywanpas Tayta Diosmi willaykuwan cheqaptapunim wañunqa, nispa.

¹¹ Chaymantam Hazaelta penqarikunankama profeta Eliseo qawarayaykuspan waqayta qallaykurqa.

¹² Chaymi Hazael tapurqa: Taytáy, ¿imanasqataq waqachkanki? nispa. Eliseoñataqmi nirqa: Yachanim Israelpa mirayninkuna ñakarichinaykita, murallasqa llaqtankunatam kañaykunki, jovenkunatam wañuchinki, wawakunatam pampakunaman waqtaspa wañuchinki, wiksayuq warmikunapa wiksantam kichanki, nispa.

¹³ Hinaptinmi Hazael nirqa: ¿Kay serviqniki allqoqa imañataq kani chaykunata ruwanaypaqqa? nispa. Chaymi Eliseo nirqa: Tayta Diosmi qawaykachiwan Siria nacionpi rey kanaykita, nispa.

¹⁴ Hazael kutispa chayaruptinmi reynin tapuykurqa: ¿Imanimusunkitaq Eliseo? nispa. Hazaelñataqmi nirqa: Sanoyankis, nispa.

¹⁵ Ichaqa paqarinnintin punchawmi Hazaelqa frazadata yakuman challpuruspan Ben-adadta samayninpas chinkanankama taparuspan wañurachirqa. Hinaspam Ben-adadpa rantinpi payña munaychakurqa.

Judá nacionpi Joram munaychakusqanmanta

¹⁶ Acabpa churin Joram pichqa wataña Israel nacionpi munaychakuchkaptinmi, Josafatpa churin Jorampas Judá nacionpi munaychakuyta qallaykurqa.

¹⁷ Joramqa kimsa chunka iskayniyuq watanpim munaychakuyta qallaykurqa, hinaspam Jerusalén llaqtapi pusaq wata munaychakurqa.

¹⁸ Joramqa Israel nacionpi reykunapa chaynataq Acabpa mirayninkunapa ruwasqanta hinam ruwarqa. Acabpa warmi churinwan casarakuruspanmi mana allinkunata Tayta Diospa qayllanpi ruwarqa.

¹⁹ Chaywanpas serviqnin Davidraykum Tayta Diosqa Judá nacionta mana tukururqachu. Chaynataqa ruwarqa wiñaypaq rataq achkiyta hina Davidmanwan mirayninkunaman qonanpaq prometesqanraykum.

²⁰ Rey Jorampa tiemponpim Edom nacionpas Judá nacionpa contranpi hoqarikururqa hinaspam reyninkutapas churakururqaku.

²¹ Chayraykum rey Joram llapa carretankunawan Zair lawkama pasarqa. Tutayaruptinñataqmi Edom nacionpi kaqkunata atacarqaku, ichaqa Edom runakunam Jorampa chaynataq carretakunapi riq capitanninkunapa muyuriqninpi churakururqaku, hinaspam Jorampa runankunata cheqerachirqaku.

²² Chaynapim Edom nacionqa Judá nacionpa munaychakuyninmanta kunan punchawkama librakururqa. Hina chay tiempopitaqmi Libna llaqtapas Judá nacionpa munaychakuyninmanta librakururqa.

²³ Jorampa imaynam kawsasqanwan imakunam ruwasqanpas Judá nacionpi reykunapa ruwasqanmanta willakuq libropim qellqasqa kachkan.

²⁴ Joram wañuruptinmi “Davidpa Llaqtanwan” sutichasqankupi ñawpaq taytankunapa kasqanpi pamparurqaku. Paypa rantinpim churin Ocoziasña munaychakurqa.

Judá nacionpi Ocoziaspa munaychakusqanmanta

²⁵ Acabpa churin rey Joram chunka iskayniyuq wataña Israel nacionpi munaychakuchkaptinmi Jorampa churin Ocozías Judá nacionpi munaychakuyta qallaykurqa.

²⁶ Ocoziasqa iskay chunka iskayniyuq watanpim munaychakuyta qallaykurqa, hinaspam Jerusalén llaqtapi huk watalla munaychakurqa. Mamanpa sutinmi karqa Atalía, payqa karqa Israelpa reynin Omripa willkanmi.

²⁷ Ocoziasqa Acabpa mirayninkuna imaynam ruwasqankuta hina ruwaspanmi mana allinkunata Tayta Diospa qayllanpi ruwarqa. Payqa Acabpa mirayninkuna ukupi masam karqa.

²⁸ Ocoziasmi Acabpa churin Joramwan hukllawakururqa, Siria nacionpa reynin Hazaelwan Galaad law Ramot llaqtapi peleanankupaq. Siria tropakunam ichaqa Joramta kirirurqaku.

²⁹ Chaymi Joramqa Jezreel llaqtaman kutikurqa Siria tropakunapa kirirusqanta hampichikamunanpaq. Acabpa churin Joram onqoptinmi, Jorampa churin Ocozías rirqa watukuq. Ocoziasqa karqa Judá nacionpa reyninmi.