2~Reyes 6 - CHUYA QELLQA La Biblia en Quechua de Ayacucho 2012

Hachata Eliseo wampuchisqanmanta

¹ Huk punchawmi Eliseota llapa profetakuna nirqaku: Qawasqaykipi hinam kay yachasqanchik wasiqa kichkillaña.

² Chaynaqa, Jordán mayupa patanman rispaykuyá sapakama qeruta kuchuspa yachananchikpaq wasita chaypi ruwaramusaqku, nispanku. Eliseoñataqmi nirqa: Riruychikyá, nispa.

³ Chaymi Eliseota paykunamanta huknin nirqa: Ama hina kaspayá ñoqaykuwan riy, nispa. Hinaptinmi Eliseo nirqa: Hakuchikyá, nispa.

⁴ Pasaspankum Jordán mayupa patanman chayaruspa qerukuna kuchuyta qallaykurqaku.

⁵ Qeruta kuchuchkaptinkum hukkaqninpa hachan pawaruspan mayuman wichiykurqa, hinaptinmi qaparirqa: ¡Taytalláy! ¡Chay hachaqa prestakuyllam karqa! nispa.

⁶ Chaymi profeta Eliseo tapurqa: ¿Maylawmantaq wichiykurqa? nispa. Wichiykusqan lawta qawaykachiptinmi kaspita Eliseo kuchuruspan choqaykurqa, hinaspam hachata chaylla wampurachimurqa.

⁷ Hinaspanmi Eliseo nirqa: Hurqoy, nispa. Chaymi haywarispan hachata hurqorurqa.

Siria tropakunata Dios ñawsayarachisqanmanta

⁸ Siria nacionpa reyninmi Israelwan guerrapi karqa, chaymi capitanninkunawan huñunakuspan willarqa maykunapim campamentonku sayachinanta.

⁹ Hinaptinmi profeta Eliseoñataq, Israel-pa reyninman willachimurqa: Cuidakunkim, amam waknintaqa rinkichu, Siria tropakunam chaymanqa rinqaku, nispa.

¹⁰ Chaynapim Israel nacionpa reyninqa tropankunata profeta Eliseopa nisqanman kacharqa, chaynata ruwaspam achka kutipi librakurqa.

¹¹ Siria nacionpa reyninñataqmi chay-kuna pasakusqanwan piñakuspan tropakunapa capitanninkunata tapurqa: ¿Mayqannikichiktaq imapas rimanakusqanchikta Israel nacionpa reyninman willachkan? nispa.

¹² Chaymi huknin capitán nirqa: Reynillayku, manam ñoqaykuchu willachkanikuqa, aswanqa Israelpim kachkan Diospa profetan Eliseo, paymi Israelpa reyninmanqa puñunaykipi rimasqaykitañapas willachkan, nispa.

¹³ Hinaptinmi Siria nacionpa reynin kamachikurqa: Rispaykichik qawamuychik maypim chay runa kasqanta, chaynapi runakunata kachaspay hapirachimunaypaq, nispa. Chaymi willaykurqaku: Dotán llaqtapim payqa kachkan, nispa.

¹⁴ Hinaptinmi Siria nacionpa reyninqa silladakunata, carretakunata hinaspa achkallaña soldadonkunata kacharqa. Chaymi tutallan chayaruspanku llaqtapa muyuriqninpi churakururqaku.

¹⁵ Paqarinnintin tutapayta profetapa serviqnin hatariruspan qawaykuptinmi, llaqtapa muyuriqninpi kachkasqaku: Siria tropakuna, caballopi silladakuna hinaspa carretakuna, hinaptinmi Eliseoman willamurqa: ¡Ay, taytalláy! ¿Imatataq ruwaykullasunchik? nispa.

¹⁶ Eliseoñataqmi nirqa: Ama manchakuychu, paykunawan kaqkunamantapas aswan achkam ñoqanchikwan kaqkunaqa kachkan, nispa.

¹⁷ Hinaptinmi Tayta Diosta mañakuspan Eliseo nirqa: Dios Taytalláy, ñawintayá kichaykuy chaynapi rikunanpaq, nispa. Chaymi serviqninpa ñawinta Tayta Dios kichaykuptin rikururqa Eliseopa muyuriqninpi orqopas tapaykuq silladakunatawan lenwachkaq carretakunata.

¹⁸ Maypacham Siria tropakuna Eliseota hapinankupaq anchuykamuptinkum, Eliseoñataq Tayta Diosta mañakuspan nirqa: Taytalláy kay runakunata ñawsayarachiy, nispa. Chaymi Eliseopa mañakusqanman hina runakunata Tayta Dios ñawsayarachirqa.

¹⁹ Hinaptinmi chay tropakunata Eliseo nirqa: Kayqa manam ñanchu nitaqmi maskasqaykichik llaqtachu. Qatiwaychik ñoqam pusasqaykichik chay maskasqaykichik runaman, nispa. Hinaspam Samaria llaqtaman pusarurqa.

²⁰ Samaria llaqtaman chayarachispanmi Tayta Diosta Eliseo mañakurqa: Dios Taytalláy, kay runakunapa ñawinta kichaykuy qawarikunankupaq, nispa. Ñawinkuta Tayta Dios kichaykuptinmi Samaria llaqtapiña kasqankuta qawakuykurqaku.

²¹ Israelpa reyninñataqmi paykunata rikuruspan Eliseota tapurqa: Taytalláy, ¿wañuchisaqchu kay runakunata? nispa.

²² Hinaptinmi Eliseo nirqa: Ama wañuchiychu, ¿yaqachu wañuchiwaq espadaykiwan chaynataq flechaykiwan presochasqaykikunata? Paykunamanqa mikuytawan yakuta qoykuy, chaynapi mikuykuspa hinaspa tomaykuspa reyninkuman kutikunankupaq, nispa.

²³ Chaymi mikuyta yanuchispa mikuruptinku tomaruptinku paykunata aviarurqa, hinaptinmi reyninkuman kutikurqaku. Chaymantapunim Siria nacionniyuq tropakunaqa manaña Israel nacionta atacarqakuñachu.

Samaria llaqta librasqa kasqanmanta

²⁴ Chaykunapa qepantam Siria nacionpa reynin Ben-adad llapa tropankunata huñuruspan Samaria llaqtata muyururqa.

²⁵ Chayraykum Samaria llaqtapi hatun yarqay karurqa, chaymi asnopa umantapas rantikuqku yaqa huk kilo qollqepaq, palomapa akantañataqmi cuarto kilota rantikuqku parte kilo masnin qollqepaq.

²⁶ Huk punchawmi murallapa hawanta Israelpa reynin richkarqa, hinaptinmi huk warmi qaparispan nirqa: Reynilláy, yanapaykullaway nispa.

²⁷ Reyñataqmi nirqa: Tayta Dios mana yanapasuptikiqa ¿imaynatataq yanapaykiman? ¿Mayman-tataq trigota vinota qosqayki?

²⁸ ¿Imataq pasasunki? nispa. Hinaptinmi chay warmi nirqa: Kay warmim niwarqa: “Wawaykita aparamuy kunan punchaw mikurunanchikpaq. Paqarinñataqmi ñoqapa wawayta mikusunchik”, nispa.

²⁹ Chaymi wawayta yanuruspa mikururqaniku. Paqarinnintinñataqmi payta nirqani: “Kunanñataqyá wawaykita apamuy mikunanchikpaq”, nispay. Paymi ichaqa wawanta pakarun, nispa.

³⁰ Chayta uyariruspanmi reyqa pachanta llikipaspan muralla hawanta rirqa. Chaymi llapa runakuna rikururqaku reyqa pachanpa ukunpi luto pachayuq kasqanta.

³¹ Chaypim rey qaparirqa: Safatpa churin Eliseopa umanta kunanpuni mana kuchuptiyqa Diosyá llumpa-llumpayta castigawachun, nispa.

³² Eliseom llapa ancianokunawan wasinpi tiyachkarqaku. Reymi payman huk runata kacharqa. Ichaqa kachasqan runa manaraq chayachkaptinmi, llapa ancianokunata Eliseo nirqa: Qawaychik, runa wañuchiqpa churinmi huk runata kunkayta kuchunanpaq kachamuchkan, chaynaqa chay runa chayaramuptinmi punkuta wichqaruspaykichik ama yaykuchimunkichikchu. Chay runapa qepantaqa patronninmi hamuchkan, nispa.

³³ Llapa ancianokunawan Eliseo rimach-kaptinraqmi chayaruspan rey nirqa: Cheqaptapunim kay ñakariyqa Tayta Diosmanta hamun, ¿imatawanraqtaq paymanta suyayman? nispa.