2~Reyes 5 - CHUYA QELLQA La Biblia en Quechua de Ayacucho 2012

Naamanpa sanoyasqanmanta

¹ Naamanqa karqa Siria nacionpi reypa llapa tropankunapa kamachiqninmi, paynintakamam Siria nacionta enemigonkunamanta Tayta Dios librarqa, chayraykum reyninqa anchata kuyarqa. Payqa allinnin qari-qari soldadom karqa, ichaqa lepra onqoywanmi ñakarirqa.

² Huk kutipim Siria runakunamanta Israel nacionman rispanku huk sipasta presochaspa aparurqaku, paymi Naamanpa warminta servirqa.

³ Paymi patronanta nirqa: Sichum Samaria llaqtapi profetapa ñawpaqninman patronniy riruptinqa lepra onqoyninmantam sanoyarachinman, nispa.

⁴ Naamanñataqmi reypa kasqanman yaykuspan nirqa: Israel nacionmanta pusamusqanku sipasmi kayna-waknata willakun, nispa.

⁵ Chaymi Siria nacionpa reynin nirqa: Hinatayá riruy ñoqapas Israelpa reyninmanmi cartata apachisqayki, nispa. Hinaptinmi Naamanqa kimsa pachak kimsa chunka kilo qollqeta, soqta chunka soqtayuq kilo qorita chaynataq chunka musoq pachakunatapas aparikuspan rirqa.

⁶ Israel nacionpa reyninman carta apasqanmi kaynata nirqa: Kay cartata chaskispaykim yachanki lepra onqoyninmanta sanoyachinaykipaq serviqniy Naamanta kachamusqayta, nispa.

⁷ Israel nacionpa reyninñataqmi cartata leeruspan pachanta llikipaspan nirqa: ¿Ñoqaqa Dioschu kani runata wañuchi-naypaq otaq kawsachinaypaqpas, chay-napi kay onqoqta kachamuwaptin sanoyachinaypaq? Yachaychikyá kaywanqa manam imatachu munan aswanqa guerrapi ñoqawan peleayllatam, nispa.

⁸ Israel nacionpa reynin, pachanta llikipasqanta yacharuspanmi profeta Eliseo nichimurqa: ¿Imanasqataq pachaykita llikiparunki? Chay runata kachamuway, chaynapi Israel nacionpi profeta kasqanta yachananpaq, nispa.

⁹ Hinaptinmi Naamanqa carretanpi rispan caballonkunapiwan Eliseopa wasin punkupi sayarurqa.

¹⁰ Ichaqa Eliseom willakuqta kachaspan nichimurqa: Jordán mayuman rispa chaypi qanchis kutikama bañakamuy, hinaptinmi aychaykiqa ñawpaqta hina sanoña kanqa, nispa.

¹¹ Naamanñataqmi piñasqa kutikurqa kaynata nistin: Ñoqaqa nirqani: “Lloqsiykamuspanchiki yupaychasqan Tayta Diospa sutinta qayllaypi rimarinqa, hinaspachiki nanayniyta llapchaykuspan kay lepra onqoyniyta sanoyarachinqa”, nispaymi.

¹² ¿Manachum Israelpa mayunkunamantaqa Damasco lawpi Abana mayuwan Farfar mayuraq aswan allin karqa? Chay mayukunapi bañakuspaypas ¿manachu sanoyaruyman karqa? Chaynata nispanmi piñasqallaña kutikurqa.

¹³ Ichaqa serviqninkunam asuykuspanku nirqaku: Señorllayku, sichum profeta imatapas sasa kaqta kamachisuptikiqa ¿manachum ruwawaq karqa? “Bañakuruspaykiqa sanoyarunkim” nisuchkaptillaykiqa bañakaramuyá, nispanku.

¹⁴ Chaymi Naamanqa pasaspan profetapa kamachisqanman hina Jordán mayupi qanchis kutikama zambullikaramurqa, hinaptinmi aychan wawapa hina rikurirurqa, chaynapim sanoyarurqa.

¹⁵ Chaymantam riqmasinkunapiwan Eliseopa kasqanman kutiruspanku ñawpaqninpi sayaykuspa Naamán nirqa: Kunanmi yachaykuni, manam kay pachapiqa Dios kanchu aswanqa Israel nacionllapim. Ama hina kaspaykiyá kay serviqnikimanta kay regalokuna apamusqayta chaskiykullaway, nispa.

¹⁶ Hinaptinmi Eliseo nirqa: Tayta Diosqa kawsanmi, paypa qayllanpim kachkani, manam chaskikimanchu, nispa. Chaskiykunanpaq Naamán hikutaptinpas manam Eliseoqa chaskiyta mu-narqachu.

¹⁷ Chaymi Naamán nirqa: Ama hina kaspayá kay llaqtaykipi allpata iskay mulapi apanaypaq qoykuway. Kunan punchawmantam kay serviqnikiqa Tayta Diosllapaqña animalkunata kañapusaq, manañam wakin dioskunamanqa ofrecesaqñachu, aswanqa Tayta Diosllapaqñam.

¹⁸ Ichaqa ruegakuykim, Rimón idolopa templon-man yupaychananpaq reyniy yaykuspan brazoypi tawnapakuykuptinqa chaynataq ñoqapas paywan kuska qayllanpi qonqoraptiyqa Tayta Diosyá pampachaykuwachun, nispa.

¹⁹ Chaymi Eliseo nirqa: Hawkalla kutikuy, nispa. Chaymi Naamán pasakurqa. Ichaqa manaraqpas karuta richkaptinmi,

²⁰ profeta Eliseopa serviqnin Giezi kaynata tantearurqa: Patronniyqa yanqam wischupakurun Siria nacionniyuq Naamanpa apamusqankunataqa, Tayta Diosraykum jurani: Kallpaylla hayparuspay imallantapas mañakaramusaq, nispan.

²¹ Chaymi Naamanta hayparunanpaq Giezi kallparqa. Naamanñataqmi kallpaylla hamusqanta rikuruspan carretanmanta uraykuspan tapurqa: ¿Allillanchu kachkankichik? nispa.

²² Hinaptinmi Gieziñataq nirqa: Allinllam kachkaniku, patronniy Eli-seom kachamuwachkan qanman kaynata willanaypaq: Kunanmi Efraín law orqokunamanta iskay joven profetakuna chayaramuwan, ama hina kaspaykiyá paykunaman qoykunaypaq kimsa chunka kimsayuq kilo qollqetawan iskay musoq pachakunata apachimuway, nispa.

²³ Chaymi Naamán nirqa: Ama hina kaspaykiyá soqta chunka soqtayuq kilo qollqellataña chaskiykuway, nispa. Chaynata hikutaspanmi Naamanqa soqta chunka soqtayuq kilo qollqetawan iskay musoq pachakunata iskay wayqaman hinaykuspan iskay criadonkunaman qoykurqa, hinaspam Giezipa ñawpaqninta pasachirqa.

²⁴ Moqoman chayaruptinkum, apaysiqnin runakunamanta chaskiykuspan wasinman churaykamurqa, hinaspam apaysiqnin runakunata kutikunankupaq aviarurqa.

²⁵ Chaymantam Patronnin Eliseopa qayllanman yaykuykuptin Eliseo tapurqa: Giezi, ¿maymantataq hamuchkanki? nispa. Chaymi payñataq nirqa: Ñoqaqa manam maytapas rirqanichu, nispa.

²⁶ Hinaptinmi Eliseo nirqa: Maypacham chay runa carretanmanta uraykamuspa chaskiykusuptikim yuyayniypi rikuchkarqayki, ichaqa manam qollqeta, pachakunata, aceituna huertakunata, uvas huertakunata, ovejakunata, torokunata hinaspa criadokunata chaskikuna tiempochu.

²⁷ Chaynaqa, Naamanpa lepra onqoyninwanmi qamña miraynikikunapiwan mana tukuyta onqonkichik, nispa. Chaymi Gieziqa Eliseopa qayllanmanta riti hina yuraq-yuraq lepra onqoyniyuqña lloqsirurqa.