2~Reyes 4 - CHUYA QELLQA La Biblia en Quechua de Ayacucho 2012

Viudapa aceitenmanta

¹ Hukkaqnin profetapa viudanmi Eliseoman rispan nirqa: Yachasqaykipi hinapas qosayqa wañukunñam, payqa Tayta Diosta kasukuq runam karqa. Ichaqa manukusqayku runam hamuruwaspan iskaynin qari wawaykunata criadon kanankupaq pusayta munachkan, nispa.

² Chaymi Eliseo nirqa: ¿Imatataq qampaq ruwanayta munanki? ¿Kachkanchu imallaykipas wasikipi? nispa. Hinaptinmi chay viuda nirqa: Manam imaypas kanñachu, aysakupi aceitellayñam kachkan, nispa.

³ Hinaptinmi Eliseo nirqa: Kutirispaykiyá vecinoykikunamanta achka vacío aysakukunata prestakaramuy,

⁴ hinaspam wasikiman wawaykikunapiwan kuska yaykuruspayki punkuta wichqakamunki, llapallan prestakamusqayki aysakukunaman hillpuspam huntasqanman hina huklawman churanki, nispa.

⁵ Nisqanpi hinam chay warmiqa wasin-man pasaspan wawankunawan punkunta wichqakaramurqa. Wawankuna aysakukunata haywaptinmi payñataq aceiteta hillpurqa.

⁶ Llapa aysakukunaman aceite huntaruptinmi warmanta nirqa: Huk aysakutawan haywamuway, nispa. Chaymi warman nirqa: Manam aysakukunaqa kanñachu, nispa. Chaynata niruptillanmi aceite taniramurqa.

⁷ Chaymantam chay warmiqa pasaspan profetaman willamurqa, hinaptinmi profetañataq nirqa: Chay aceiteta rantikamuspayki manuykikunata pagamuy, puchunñataqyá qampaqwan wawaykikunapaq kachun, nispa.

Wawata Eliseo kawsarichisqanmanta

⁸ Huk punchawmi Sunem llaqtanta Eliseo pasachkarqa, chaypim ancha kapuqniyuq warmi yacharqa. Paymi Eliseota hikutaspan wasinpi mikumunanpaq pusarqa. Chaymi sapa kuti chayninta pasaspanqa chay warmipa wasinpi mikunanpaq yaykuq.

⁹ Chay warmim qosanta nirqa: Yachanim kay wasinchikman mikunanpaq hamupayaq runaqa Diospa chuya profetan kasqanta.

¹⁰ Chaynaqa, altospiyá cuartota ruwarapusun, chaypi camata, sillata, mecherota churapuptinchik watukamuwaspanchik samakunanpaq, nispa.

¹¹ Huk punchawmi Eliseoqa chay wasiman chayaruspan ruwapusqanku cuartopi puñurqa,

¹² hinaspam criadon Giezita nirqa: Wasiyuq señorata qayaramuy, nispa. Qayaramuptinmi Eliseo qayllanman hamurqa.

¹³ Hinaptinmi Eliseoñataq criadonwan chay warmita nichirqa: Qamqa tukuy imata ruwaspam yana-paykuwachkankiku. ¿Imatataq qampaq ruwanayta munanki? ¿Reytachu otaq tropakunapa kamachiqnintachu qampaq rimapayaykapunayta munanki? nispa. Hinaptinmi chay warmi nirqa: Kay llaqtaypiqa hawkam kawsakuni, nispa.

¹⁴ Hinaptinmi criadonta Eliseo nirqa: Chaynaqa, ¿imatataq paypaq ruwach-wan? nispa. Giezeñataqmi nirqa: Imataya ruwachwan, señorapaqa manam wawanpas kanchu, qosanpas yuyaqñataq, nispa.

¹⁵ Chaymi Eliseo nirqa: Qayaramuy, nispa. Qayaramuptinmi chay warmiqa punkupi sayaykurqa.

¹⁶ Hinaptinmi Eliseo nirqa: Wataman kunan hinatam qari wawata marqarinki, nispa. Hinaptinmi chay warmi nirqa: Taytalláy, amayá kay serviqnikitaqa burlakuwaychu, nispa.

¹⁷ Eliseopa nisqanman hinam chay warmi wiksayakuruspan hamuq watapi qari wawata wachakururqa.

¹⁸ Chay wawam wiñarurqa. Huk punchawmi taytanpa kasqanman rirqa chakrapi rutuqkunawan kachkaptin.

¹⁹ Hinaspanmi taytanta nirqa: ¡Ay, umallaymi nanawachkan! nispa. Taytanñataqmi criadonta kamachirqa: Mamanman aparuy, nispan.

²⁰ Chaymi criadonqa marqarikuspan mamanman chayarachirqa, chaymi ma-manpa millqayninpi chawpi punchawkama karuspan wañururqa.

²¹ Mamanñataqmi altosman aparuspan profetapa camanman churaykurqa, hinaspanmi punkuta wichqaykuspan lloqsikaramurqa.

²² Chaymantam qosanta qayamuspan nirqa: Huknin criadoykitawan china asnoykita prestaykuway, chaynapi Diospa profetanman utqaylla rirunaypaq, chayllam kutiramusaq, nispa.

²³ Chaymi qosan tapurqa: ¿Imamantaq paypata rinki? Kunanqa manam musoq killachu nitaqmi samana punchawchu, nispa. Hinaptinmi warminñataq nirqa: Ama hukmanyaychu, nispa.

²⁴ Chaymantam china asnonta caronaykachispan criadonta nirqa: Ñawpaqniyta riptikim qatisqayki. Amam maypipas sayachiwankichu ñoqa ninaykama, nispa.

²⁵ Chaymi pasaspan Carmelo orqopi Eliseopa kasqanman chayarurqa. Profeta Eliseoñataqmi karullamantaraq Sunem llaqtayuq warmita rikuruspan criadon Giezita nirqa: Wak hamuqqa Sunem llaqtayuq warmim.

²⁶ Kallpaylla taripaspayki tapuykamuy: “¿Allinllachu kachkanki, qosaykipas chaynataq wawaykipas allinllachu kachkanku?” nispayki. Chaynata tapuykuptinmi chay warmiqa nirqa: Allinllam kachkaniku, nispa.

²⁷ Profeta Eliseopa kasqanman chayaruspanmi chakinmanta hapipakururqa. Asuchinanpaq Giezi asuykuptinmi Diospa profetan nirqa: Ama imanaychu sonqonpim ancha llakisqa kachkan. Imamantam chayna kasqantaqa manaraqmi Tayta Dios willawanchu, nispa.

²⁸ Hinaptinmi Eliseota chay warmi nirqa: Taytalláy, ¿ñoqachu qari wawata mañakurqayki? ¿Manachum nirqayki ama burlakuwaychu nispa?

²⁹ Chaymi criadon Giezita Eliseo nirqa: Chaylla alistakuspa tawnayta aparikuspa pasaypuni, ñanpi piwanpas tupaspaykiqa amam rimaykunkichu nitaqmi pipa rimaykususqaykitapas chaskinkichu, hinaspam tawnayta warmapa uyanman churaykunki, nispa.

³⁰ Warmapa mamanñataqmi nirqa: Tayta Diosqa kawsanmi, qampas kawsankitaqmi, manam saqesqaykichu, nispa. Chaymi Eliseoqa chay warmiwan pasarqa.

³¹ Gieziñataqmi puntaruspan, warmapa uyanman Eliseopa tawnanta churaykurqa, warmam ichaqa mana kawsarirqachu, chaymi Eliseoman kutirispan willarqa: Warmaqa manam rikcharinñachu, nispa.

³² Wasiman Eliseo chayaruptinmi warmaqa camapi wañusqa chutarayachkasqa.

³³ Chaymi Eliseoqa yaykuruspan punkuta wichqakaramurqa, hinaspam Tayta Diosta mañakurqa.

³⁴ Chaymantam wañusqa warmapa hawanman pakchanpa chutakuykuspan tupanaykachirqa siminta siminwan, ñawinta ñawinwan, makinkunata makinkunawan, hinaptinmi warmapa cuerpon qoniriyta qallaykurqa.

³⁵ Sayariruspanmi Eliseoqa wasi ukupi ichikacharqa. Kutiykuspanñataqmi warmapa hawanman yapamanta chutakuykurqa, chaymi warmaqa qanchis kutikama hachiruspan qawarikururqa.

³⁶ Eliseom criadon Giezita qayaykuspan nirqa: Wasiyuq señorata qayaykamuy, nispa. Qayaramuptinmi nirqa: Kayqa wawayki, apakuyña, nispa.

³⁷ Chay warmiñataqmi yaykuruspan Eliseopa ñawpaqninpi qonqoranpa kumuykurqa, hinaspanmi wawanta marqarikuspan lloqsimurqa.

Eliseopa milagrokuna ruwasqanmanta

³⁸ Chaymantam Gilgal llaqtaman Eliseo kutirqa. Chay punchawkunapim hatun muchuy chay lawkunapi karqa. Llapa profetakunam Eliseopa muyuriqninpi tiyachkarqaku, hinaptinmi criadonta Eliseo nirqa: Profetakunapaq hatun mankapi mikuyta yanuramuy, nispa.

³⁹ Paykunapa hukninmi monteta rirqa mikunankupaq yuyu pallamuq. Arwi-arwipa rurunta tariramuspanmi llikllan huntata pallaramurqa. Wasiman chayarachispanñataqmi picaparuspan yanukusqanku mankaman kamarurqa, ichaqa manam yacharqachu ima sachapa rurun kasqantapas.

⁴⁰ Qaranakuruspa mikuyta qallaykuptinkum llapa profetakuna qaparirqaku: Diospa profetan, kay mikuyqa venenoyuqmi kasqa, nispanku. Chaymi mana mikurqakuchu.

⁴¹ Hinaptin-mi Eliseo kamachikurqa: Harinata apamuwaychik, nispa. Qoykuptinkum mankaman talliykuspan nirqa: Runakunaman qaraychik mikunankupaq, nispa. Mikuruptinkum manaña paykunata imanarqachu.

⁴² Chaymantam Baal-salisa llaqtamanta huk runa profeta Eliseoman iskay chunka cebadamanta primicia tantakunata apamurqa, chayraq cosechasqa espigayuq trigotapas. Chaymi criadonta Eliseo nirqa: Runakunaman mikunankupaq qoykuy, nispa.

⁴³ Chaymi criadon nirqa: ¿Imanispataq pachak runakunaman kaychallata qoykusaq? nispa. Eliseoñataqmi nirqa: Runakunaman mikunanpaq qoy, Tayta Diosmi nin: “Mikuptinkupas puchunqaraqmi” nispa.

⁴⁴ Runakunaman qoykuptinmi mikurqaku, chaymi Tayta Diospa nisqanman hina puchururqa.