2~Reyes 3 - CHUYA QELLQA La Biblia en Quechua de Ayacucho 2012

Israelpi rey Joram munaychakusqanmanta

¹ Judá nacionpi rey Josafat chunka pusaqniyuq wataña munaychakuchkaptinmi, Israel nacionpi Acabpa churin Joram Samaria llaqtamanta munaychakuyta qallaykurqa, chunka iskayniyuq watam munaychakurqa.

² Payqa Tayta Diospa qayllanpim mana allinkunata ruwarqa. Ichaqa manam taytanpa nitaq mamanpa ruwasqanta hinachu; payqa taytanpa rumimanta ruwasqan Baalpa idolonkunatam wischururqa.

³ Chaywanpas Israelpa mirayninkunata huchallichiq Nabatpa churin rey Jeroboam hinam huchallikurqa.

Moab nación vencesqa kananmanta

⁴ Moab nacionpa reynin Mesam achka ovejakunata uywaq, chaymi Israel nacionpa reyninman impuestota pagaq pachak waranqa malta carnerokunatawan pachak waranqa millwantin carnerokunata.

⁵ Ichaqa rey Acab wañuruptinmi, Israel nacionpa reynin Jorampa contranpi Moab nacionpa reynin hoqarikururqa.

⁶ Rey Joramñataqmi Samaria llaqtamanta lloqsiruspan Israel nacionpa tropankunata huñururqa.

⁷ Hinaspam Judá nacionpa reynin Josafatman kaynata willachimurqa: Moabpa reyninmi contraypi hoqarikurun, ¿yaqachu paypa contranpi peleaq reysiwankiman? nispa. Chaymi Judapa reynin Josafat nirqa: Arí risaqmi, qanwan ñoqawanqa chullallam kanchik, runaykunawan caba-lloykunapas qampa hinallam.

⁸ ¿Maylaw-nintataq risunchik? nispa. Rey Joramñataqmi nirqa: Edom nacionman riq chunniq ñannintam risun, nispa.

⁹ Chaymi Israelpa, Judapa hinaspa Edompa reyninkuna rirqaku. Qanchis punchawña chunniqninta muyuchkaptinkum soldadokunapaqwan animalkunapaq yaku pisirurqa.

¹⁰ Hinaptinmi Israelpa reynin nirqa: ¡Imallapitaq rikukunchik! Tayta Diosmi kimsanchikta huñuramuwanchik moabitakunaman qoykuwananchikpaq, nispa.

¹¹ Chaymi rey Josafatqa tapukurqa: ¿Manachu pipas Tayta Diospa profetan kaypi kanman, chaynapi paynintakama Diosta tapunanchikpaq? nispa. Hinaptinmi Israel nacionpi reypa serviqninkunamanta kaq nirqa: Kaypim kachkan Safatpa churin Eliseo, payqa Eliaspa serviqninmi, nispa.

¹² Josafatñataqmi nirqa: Payqa Tayta Diospa nisqantam willaykuwasun, nispa. Chaymi Israel nacionpa reynin, Edom nacionpa reynin hinaspa rey Josafat, Eliseopa kasqanman rirqaku.

¹³ Chaymi Israelpa reyninta Eliseo nirqa: ¿Imatataq ñoqawan munanki? Taytaykipa chaynataq mamaykipa profetankunata tapukamuy, nispa. Israelpa reyninñataqmi nirqa: Manam, Tayta Diosmi kay kimsa reykunata huñuramuwanku moabitakunaman qoykuwanankupaq, nispa.

¹⁴ Hinaptinmi Eliseo nirqa: Tukuy Atiyniyuq Tayta Diosqa kawsanmi, paypa qayllanpim kunan kachkani, Judá nacionpa reynin Josafatta mana respetaspayqa manam qawayllapas qawarikimanchu karqa.

¹⁵ Chaynaqa, arpa tocaqta pusamuwaychik, nispa. Chaymi arpa tocaq tocanankama Tayta Diospa atiynin Eliseoman huntaykurqa,

¹⁶ hinaptinmi kaynata nirqa: Tayta Diosmi nin, kay qechwapiyá pozokunata ruwaychik,

¹⁷ Tayta Diosmi kaynata nin: Manam wayratapas nitaq paratapas rikunkichikchu, ichaqa kay qechwamanmi yaku huntamunqa, hinaptinmi qamkunapas tomankichik chaynataq animalnikichikkunapas tomanqaku.

¹⁸ Chaykunaqa Tayta Diospaqqa mana kaq hinallam, payqa moabitakunatapas makikichikmanmi churamunqa.

¹⁹ Qamkunañataqmi llapa murallasqa llaqtakunatawan sumaq llaqtakunata tuñichinkichik, allinnin sachakunatam kuchunkichik, llapa pukyukunatam pamparunkichik, tarpuna chakrakunatapas rumikunawanmi huntachinkichik, nispa.

²⁰ Paqarinnintin achikyaqtam, Diosman ofrenda ofrecena horata, Edom lawmanta yaku chayaramuspan lliw qocharurqa.

²¹ Moabitakunañataqmi paykunawan peleanankupaq reykuna hamusqanta yacharuspanku, chayllaraq arma hapiy yachaqkunamanta qallaykuspa llapallan qarikunata huñururqaku, hinaspam nacionninkupa patanpi churakururqaku.

²² Paqarinnintin tutapayta Moab runakuna hatariruspa qawariptinkum yakuta inti kanchaykamurqa, hinaptinmi paykunapaqa yawarpaq rikchakarapurqa.

²³ Chaymi ninakurqaku: Wakqa yawarmi. Ñoqanchikman hamuq reykunam kikinkupura peleaspa wañurachinakunku. Chaynaqa, imankutapas hoqarikamunapaq hakuchik, nispanku.

²⁴ Israel miraykunapa campamentonman chayaruptinkum ichaqa Israel runakuna hatarispa moabitakunata atacamurqaku, chaymi ñawpaqninkumanta lluptirqaku, hinaptinmi Israel runakunaqa hayparuspa wañurachirqaku.

²⁵ Hinaspam llaqtakunatapas tuñichirqaku, allinnin chakrakunamanpas sapakamam rumiwan huntachirqaku, yakuyuq pozokunatapas pamparuspam allinnin sachakunatapas kuchuparurqaku. Kir-hareset llaqtallatañam manaqa tuñirachirqakuchu, ichaqa warakaqkunam muyuriqninpi churakuruspanku tuñichirqaku.

²⁶ Moab nacionpa reyninmi peleasqanpi vencerachikusqanta qawakuykuspan, qanchis pachak soldadokunata akllaykurqa Edom nacionpa reyninta atacananpaq, ichaqa manam atirqachu.

²⁷ Chaymi paypa rantinpi munaychakunanpaq kaq piwi churinta wañurachispan diosninman murallapa hawanpi kañapurqa. Chayta qawaykuspankum Israel tropakunaqa anchallataña piñakuruspanku llaqtankuman kutikurqaku.