2~Reyes 25 - CHUYA QELLQA La Biblia en Quechua de Ayacucho 2012

¹ Isqon wataña rey Sedequías munaychakuchkaptinmi, chunka kaq killapa chunka punchawninpi Babilonia nacionpa reynin Nabucodonosor, llapa tropankunawan Jerusalén llaqtapa contranpi hamuruspan muyuriqninpi churakururqa. Campamentonta sayarachispanmi rampakunata llaqtapa muyuriqninpi hatarirachirqa.

² Chaynapim Jerusalén llaqtaqa enemigopa chawpichasqan karqa Sedequiaspa munaychakusqan chunka hukniyuq watakama.

³ Tawa kaq killapa isqon punchawninpim mikunanku tukuruptin llaqtapi runakuna yarqaymanta kaspanku

⁴ llaqtapa murallanta toqorurqaku. Chaymi Babilonia tropakuna llaqtapa muyuriqninpi kachkaptinkupas, Jerusalenpi llapa soldadokuna tutallan lluptirurqaku reypa huertanpa hichpanpi kaq iskay perqapa chawpi punkuntakama. Reypas Arabá qechwaman riq ñannintam ayqekurqa.

⁵ Babilonia tropakunañataqmi rey Sedequiasta qatispanku Jericó llaqtaman riq pampapi hapiramurqaku. Sedequiaspa tropankunapas cheqeruspankum sapallanta saqerurqaku.

⁶ Presocharuspankum rey Sedequiasta Ribla llaqtaman Babilonia nacionpa reyninman pusarqaku. Chaypim Sedequiasta sentenciaspanku

⁷ Sedequías qawachkaptin churinkunata wañurachirqaku, kikintañataqmi ñawinkunata hurqoruspanku cadenawan watasqata Babilonia llaqtaman pusarqaku.

Jerusalenpi templota tuñichisqankumanta

⁸ Babilonia nacionpa reynin Nabu-codonosor chunka isqonniyuq wataña munaychakuchkaptinmi, pichqa kaq killapa qanchis kaq punchawninpi, Jerusalén llaqtaman reyta waqaychaq soldadokunapa capitannin reypa serviqnin Nabuzaradán chayaramurqa.

⁹ Paymi kañaykurqa Tayta Diospa templonta, reypa palacionta, Jerusalén llaqtapi llapa wasikunata hinaspa kamachikuqkunapa wasinkunatapas.

¹⁰ Chaymantam reyta waqaychaq soldadokunapa capitanninwan kaq Babilonia soldadokuna, Jerusalén llaqtapa muyuriqninpi murallata taqmarurqaku.

¹¹ Hinaspanmi reyta waqaychaq soldadokunapa capitannin Nabuzaradanqa Jerusalén llaqtapi puchuqkunatawan, Babilonia nacionpa reyninman kuskanchakuruq runakunata chaynataq wakin runakunatapas presocharuspan aparqa;

¹² wakcha runakunallatañam saqerurqa uvas chakrakunatawan wakin chakrakunata llamkanankupaq.

¹³ Babilonia tropakunaqa, Tayta Diospa templonpi bronce pilarkunatawan, broncemanta estanquetapas tiyanantinkunata ñutuparuspankum chay bronceta Babiloniaman apakurqaku.

¹⁴ Aparqakutaqmi mankakunatapas, palakunatapas, mechero mayllanakunatapas, wisllakunatapas, servichikunanku broncemanta llapa serviciokunatapas,

¹⁵ incienso qontichinakunatapas, tazonkunatapas, qorimanta qollqemanta tukuy ima kaqkunatapas.

¹⁶ Chay broncemanta iskay pilarkunataqa templopi kananpaqmi Salomón ruwachirqa, ruwachirqataqmi yakupaq estanquetapas hinaspa estanquepa tiyanankunatapas, chay estanquepa tiyanankunapa llasayninqa manam hayka kasqanpas yachakurqachu.

¹⁷ Sapa pilarkunapa sayayninmi karqa pusaq metro masnin, puntanpi broncemanta adornoyuq. Sapa adornopa sayayninmi karqa iskay metro masnin, chay adornopa muyuriqninpas broncemanta granadakunawan broncemanta mallawan adornasqam karqa. Iskaynin pilarkunam hina chaynalla karqa.

Judá nacionpi runakuna preso risqankumanta

¹⁸ Rey waqaychaq soldadokunapa capitanninqa aparqataqmi sumo sacerdote Seraiastawan sacerdote Sofoniasta hinaspa punkukunawan cuentallikuq kimsa runakunatapas.

¹⁹ Llaqtapi runa-kunamantapas, soldadokunapa capitan-nintawan, rey Sedequiaspa umachaqnin pichqa runakunata, guerrapaq runata huñumuq capitanta hinaspa llaqtapi ancha reqsisqa soqta chunka runakunatam presocharurqa.

²⁰ Paykunatam reyta waqaychaq soldadokunapa capitannin Nabuzaradán, Ribla llaqtaman, Babilonia nacionpa reyninman pusarqa.

²¹ Babilonia nacionpa reynin kamachiptinmi Hamat law Ribla llaqtapi paykunata wañurachirqaku. Chaynatam Judá nacionniyuq runakunata llaqtankumanta huklawman presota aparqaku.

Judá nacionpi puchuqkuna Egipto nacionman lluptisqankumanta

²² Judá nacionpi puchuq runakunata kamachinanpaqmi, Safanpa willkan hinaspa Ahicampa churin Gedaliasta rey Nabucodonosor churarqa.

²³ Judá nacionpa tropankunata kama-chiqkunawan tropakunañataqmi, Geda-liasta llaqtapa gobernadornin kananpaq rey Nabucodonosorpa churasqanta yacharuspanku, Gedaliaswan tupamunankupaq Mizpa llaqtaman rirqaku. Paykunam karqaku Netaniaspa churin Ismael, Careapa churin Johanán, Netofa llaqtayuq Tanhumetpa churin Seraías hinaspa Maacat llaqtayuq runapa churin Jaazanías. Paykunaqa runankunapiwanmi hamurqaku.

²⁴ Chaymi paykunamanwan runankunaman juraspan Gedalías nirqa: Babilonia nacionpa capitanninkunataqa ama manchakuychikchu, hinapi yachaspa Babiloniapa reyninta servispaykichikqa allinmi kankichik, nispa.

²⁵ Ichaqa qanchis kaq killapim reykunapa castanmanta kaq Elisamapa willkan hinaspa Netaniaspa churin Ismael, chunka runakunapiwan chayaramurqa, hinaspam Gedaliastawan Judá nacionmanta kaq runankunata chaynataq Mizpa llaqtapi yachaq Babilonia runakunatapas wañurachirqa.

²⁶ Hinaptinmi Babilonia runakunata manchakuspanku llapa runakuna taksapas hatunpas tropakunapa capitanninkunapiwan Egipto nacionman lluptikurqaku.

Rey Joaquinta kacharisqankumanta

²⁷ Judá nacionpa reynin Joaquín, Babilonia nacionpi kimsa chunka qanchisniyuq wataña preso kachkaptinmi, chay watapa chunka iskayniyuq killanpa iskay chunka qanchisniyuq punchawninpi, Babiloniapa reynin Evil-merodac, punta kaq wata munaychakuyninpi, rey Joaquinta carcelmanta hurqorurqa.

²⁸ Kuyakuywan rimapayaspanmi Babilonia llaqtapi wakin rey-kunamantapas aswan reqsisqataraq ruwaykurqa.

²⁹ Carcelpi kasqan pachankunatapas mudarachiptinmi rey Joaquinqa wañukunan punchawkama Babiloniapa reynin Evil-merodacwan kuska mikurqa.

³⁰ Sapa punchawmi Babiloniapa reyninqa Joaquinman wañukunan punchawkama mikuchirqa.