2~Reyes 20 - CHUYA QELLQA La Biblia en Quechua de Ayacucho 2012

Rey Ezequiaspa onqosqanmanta

¹ Chay punchawkunapim rey Ezequías onqorurqa wañuy patanpiña kanankama, chaymi Amozpa churin profeta Isaías watukuq rispan nirqa: Tayta Diosmi nisunki: “Qamqa wañukunkiñam, chaynaqa aylluykikunawan sumaqta allichakuy”, nispa.

² Chaymi Ezequiasqa perqa lawman uyanta muyuykachispan Tayta Diosta mañakurqa:

³ Dios Taytalláy mañakuykim, qayllaykipi cheqap sonqowan kawsasqayta hinaspa qampa munasqaykiman hina ruwasqaytayá yuyariykuy, nispa. Chaynata niruspanmi Ezequiasqa llumpayta waqakurqa.

⁴ Chaymi Isaías palaciopa chawpi patiomanta manaraq lloqsichkaptin Tayta Dios nirqa:

⁵ Kutirispayki rey Ezequiasman kaynata nimuy: “Ñawpaq taytayki Davidpa yupaychasqan Tayta Diosmi kaynata nin: Mañakuwasqaykitam uyariykuyki, rikurqanitaqmi waqasqaykitapas, sanoyarachiptiymi kimsa punchawmanta temployman rinki,

⁶ chunka pichqayuq watatawanraqmi kawsachisqayki, qamtawan Jerusalén llaqtatam Asiria nacionpa reyninmanta librasqayki. Kikiyrayku chaynataq serviqniy Davidta kuyasqayraykum kay Jerusalén llaqtata waqaychasaq”, nispa.

⁷ Isaiasmi nirqa: Higosta kutaruspa apamuychik, nispa. Aparamuptinkum Ezequiaspa kirinman laqarurqaku hinaptinmi chaywan sanoyarurqa.

⁸ Chaymi Isaiasta rey Ezequías tapurqa: Tayta Dios sanoyaykachiwaptin kimsa punchawmanta temploman rinaypaqqa ¿imataq señal kanqa? nispa.

⁹ Hinaptinmi Isaías nirqa: Tayta Diospa nisusqayki cumplikunanta yachanaykipaqqa kaymi señal kanqa: “¿Chunka gradosta inti ñawparunantachu munanki? ¿Icha chunka gradosta inti kutirunantachu munanki? ¿Mayqantataq munanki?” nispa.

¹⁰ Chaymi Ezequías nirqa: Facilqa kanman intipa llantuynin chunka gradosta ñawparuyninmi, qepaman chunka gradosta kutiyninmi ichaqa sasa, nispa.

¹¹ Hinaptinmi Tayta Diosta profeta Isaías mañakuptin intipa llantuyninta Tayta Dios chunka gradosta kutirirachirqa Acazpa relojninman hina.

Babiloniamanta hamuqkunata rey Ezequías chaskisqanmanta

¹² Chay punchawkunapim Babilonia nacionpa reynin Baladanpa churin Merodac-baladán, rey Ezequías onqorusqanta yacharuspan cartakunatawan regalota apachimurqa.

¹³ Ezequiasñataqmi chaykunawan kusikuspan, mana imatapas pakaykuspan palacionpi kaqkunata chaynataq munaychakusqan nacionpi tukuy kapuqninkunatapas paykunaman qawachirqa: Qorita, qollqeta, especeriakunata, miski asnaq aceiteta, armakuna waqaychananta, wasinpi tukuy imakuna waqaychasqantapas.

¹⁴ Hinaptinmi profeta Isaías hamuspan rey Ezequiasta tapurqa: ¿Maymantataq chay runakuna hamusqaku? ¿Imatataq nisurqanki? nispa. Chaymi rey Ezequías nirqa: Paykunaqa karu-karu Babilonia nacion-mantaraqmi hamusqaku, nispa.

¹⁵ Huktawanmi Isaías tapurqa: ¿Imakunatataq palacioykipi rikurqaku? nispa. Ezequiasñataqmi, nirqa: Palacioypi tukuy imatam qawarqaku, tukuy ima hatallisqaytam mana pakaspay qawachirqani, nispa.

¹⁶ Chaymi rey Ezequiasta Isaías nirqa: Uyariy Tayta Diospa nisqanta:

¹⁷ Hamuch-kanmi punchaw palacioykipi llapa imaykikunatawan, ñawpaq taytaykikunapa kunan punchawkama tukuy ima huñusqankuta mana puchuykuspa Babilonia nacionman apanankupaq.

¹⁸ Miraynikikunatam Babilonia nacionman reypa palacionpi eunucokuna hina servikunankupaq apanqaku, nispa.

¹⁹ Chaymi Isaiasta rey Ezequías nirqa: Tayta Diospa nisqanta willawasqaykiqa allinpunim. Kaytam yuyaymanachkarqani: Kawsanaykamaqa hawkalla hinaspa allinllam kawsasaq, nispay.

Rey Ezequiaspa wañukusqanmanta

²⁰ Rey Ezequiaspa imaynam kawsasqanwan imakunam ruwasqanpas, atiyniyuqllaña kayninpas, estanqueta ruwasqanpas chaynataq yarqata ruwachispan llaqtaman yaku pusaykusqanpas Judá nacionpi reykunapa ruwasqanmanta willakuq libropim qellqasqa kachkan.

²¹ Ezequías wañukuptinmi, paypa rantinpi churin Manasesña munaychakurqa.