2~Reyes 2 - CHUYA QELLQA La Biblia en Quechua de Ayacucho 2012

Hanaq pachaman Elías hoqarisqa kasqanmanta

¹ Eliasta remolino wayrapi hanaq pachaman Tayta Dios hoqarinanpaq kachkaptinmi Eliseowan Eliasqa Gilgalmanta lloqsimurqaku.

² Hinaptinmi Eliseota Elías nirqa: Tayta Diosmi Bet-el llaqtaman kachawachkan, ama hina kaspaykiyá kayllapi kachkay, nispa. Chaymi Eliseo nirqa: Tayta Diosqa kawsanmi, qampas kawsankitaqmi, manam qepaymanchu, qatisqaykipunim, nispa. Chaynapim kuskanku Bet-el llaqtaman rirqaku.

³ Bet-el llaqtapi yachaq profetakunam, Eliseowan tupaq lloqsispanku nirqaku: ¿Manachu yachanki señorniki Eliasta Tayta Dios kunan hoqarirunanta? nispanku. Chaymi Eliseo nirqa: Arí yachanim, upallaychik, nispa.

⁴ Huktawanmi Eliseota Elías nirqa: Tayta Diosmi Jericó llaqtaman kachawachkan, ama hina kaspayki kayllapi kachkay, nispa. Hinaptinmi Eliseo nirqa: Tayta Diosqa kawsanmi, qampas kawsankitaqmi, manam qepaymanchu, qatisqaykipunim, nispa. Chaymi kuskanku Jericó llaqtaman chayarurqaku.

⁵ Jericó llaqtapi yachaq profetakunam Eliseoman taripaykuspanku nirqaku: ¿Manachu yachanki señorniki Eliasta Tayta Dios kunan hoqarirunanta? nispan-ku. Chaymi Eliseo nirqa: Arí yachanim, upallaychik, nispa.

⁶ Chaymantam Eliseota Elías nirqa: Tayta Diosmi Jordán mayuman kachawachkan, ama hina kaspayki kayllapi kachkay, nispa. Eliseoñataqmi nirqa: Tayta Diosqa kawsanmi, qampas kawsankitaqmi, manam qepaymanchu, qatisqaykipunim, nispa. Chaymi kuskanku pasarqaku.

⁷ Ichaqa pichqa chunka profetakunam paykunata qatimuspanku chimpankupi sayaykuspa qawarqaku. Eliaswan Eliseoñataqmi Jordán mayupa patanpi sayaykurqaku.

⁸ Eliasmi capanta pataraykuspan mayuta waqtarurqa, chaymi mayu kichakuykuptin chaki allpanta hina iskayninku chimparurqaku.

⁹ Chimparuptinkum Eliseota Elías nirqa: Qampaq imapas ruwanayta munaspaykiqa mañakuway manaraq qanmanta rakikuruchkaptiy, nispa. Chaymi Eliseo nirqa: Espirituykimanta huk chaynatawan atiynikitam munani, nispa.

¹⁰ Hinaptinmi Elías nirqa: Sasa ruwana kaqtam mañakurunki. Sichum qanmanta rakisqa kasqayta rikuspaykiqa mañakusqaykitam chaskinki, mana rikuspaykim ichaqa mana chaskinkichu, nispa.

¹¹ Rimastin richkaptinkum lenwachkaq caballokunapa aysasqan lenwachkaq carreta rikuriykamuspan paykunata rakirurqa, chaymi remolino wayrapa ukunpi Elías cieloman hoqarikururqa.

¹² Chayta qawaspanmi Eliseo qaparirqa: Taytalláy, taytallá, qamqa atiyniyuq tropakuna hinam Israel nacionpaq karqanki, nispa. Chaymantapunim Eliasta manaña Eliseo rikurqañachu, chaymi pachanta iskayman llikirurqa.

Eliaspa rantinpi Eliseo profetizasqanmanta

¹³ Eliaspa wichiykusqan capanta hoqa-riykuspanmi Jordán mayu patanman kutirispa chaypi sayarqa.

¹⁴ Hinaspam Eliaspa wichiykamuq capanwan mayuta waqtaspan nirqa: ¿Maypitaq Eliaspa yupaychasqan Tayta Dios kachkan? nispa. Chaynata nispa waqtaruptinmi mayu kicharikuykurqa hinaptinmi Eliseo chimparurqa.

¹⁵ Jericó llaqtapi kaq profetakunañataqmi waklaw chimpamanta qawamuspanku ninakurqaku: Eliaspa espiritunmi Eliseopiña kachkan, nispanku. Chaymi Eliseoman taripaspanku ñawpaqninpi qonqoranpa kumuykurqaku.

¹⁶ Hinaspam nirqaku: Kaypim ñoqaykuwan kachkan pichqa chunka allinnin qari-qari runakuna. Paykunayá rispanku servisqayki Eliasta maskaramuchunku, ichapas Tayta Diospa espiritun hoqariruspan chay-chay orqopi otaq qechwapi saqerun, nispanku. Hinaptinmi Eliseo nirqa: Ama kachaychikchu, nispa.

¹⁷ Ichaqa paykuna hikutaptinkum pen-qarikuspa Eliseo nirqa: Maskaramuychikyá, nispa. Chaymi paykuna pichqa chunka runakunawan rirqaku Eliasta maskamunankupaq, hinaspam kimsa punchaw maskamurqaku ichaqa manam tarimurqakuchu.

¹⁸ Jericó llaqtapiraq Eliseo kachkaptinmi Eliasta maskamuqkuna kutiramurqaku, hinaptinmi paykunata nirqa: ¿Manachum nirqaykichik amaña rinaykichikpaq? nispa.

Jericó llaqtapi pukyuta Eliseo allinyachisqanmanta

¹⁹ Jericó llaqtapi runakunam Eliseota nirqaku: Señorllayku, rikusqaykipi hinam kay llaqtapa kasqan sitioqa allin sitio, ichaqa yakunmi mana allinchu, allpankunapas mana imapa qespinanmi, nispanku.

²⁰ Chaymi Eliseo nirqa: Musoq mankaman kachita hinaykuspa apamuwaychik, nispa. Mañakusqanta qoykuptinkum,

²¹ Eliseoqa rispan pukyuman kachita machqeykuspan nirqa: Tayta Diosmi kaynata nin, ñoqam kay yakuta allinyachini, manañam kunanmantaqa wañuypas nitaq mana imapa qespinan allpapas kanqañachu, nispa.

²² Chay punchawmantapunim Eliseopa nisqanman hina chay yakukuna tomanapaqña karqa.

²³ Jericó llaqtamantam Bet-el llaqtaman Eliseo rirqa. Ñanta qespichkaptinmi llaqtamanta lloqsimuq maqtillukuna burlakuspa nirqaku: ¡Paqla, qespimuy! ¡Paqla, qespimuy! nispanku.

²⁴ Eliseoñataqmi paykunata qawarispan Tayta Diospa sutinpi ñakaykurqa, chaymi montemanta iskay ukumarikuna lloqsiramuspa tawa chunka iskayniyuq warmakunata tisaparurqa.

²⁵ Chaymantam Eliseoqa Carmelo orqoman pasakurqa, hinaspam Samaria llaqtaman kutikurqa.