2~Reyes 18 - CHUYA QELLQA La Biblia en Quechua de Ayacucho 2012

Rey Ezequiaspa munaychakusqanmanta

¹ Elapa churin Oseas kimsa wataña Israel nacionpi munaychakuchkaptinmi Judá nacionpi rey Acazpa churin Ezequías munaychakuyta qallaykurqa.

² Rey Ezequiasqa iskay chunka pichqayuq watanpim Judá nacionpi munaychakuyta qallaykurqa. Iskay chunka isqonniyuq watam Jerusalenpi munaychakurqa. Mamanmi karqa Zacariaspa churin Abi.

³ Ezequiasqa Tayta Diospa qayllanpim allinta ruwarqa ñawpaq taytan Davidpa tukuy ruwasqankunata hina.

⁴ Moqokunapi capillakunata tuñichispanmi yupaychananku idolokunatapas pakiparurqa, Aseraman rikchakuq idolokunatapas ñutuparurqam, Moisespa ruwachisqan broncemanta maqta urutapas ñutuparurqam. Chay punchawkunapim Israelpa mirayninkunaqa inciensota kañapuspanku Nehustán nispa sutichaqku.

⁵ Israelpa yupaychasqan Tayta Diospim Ezequiasqa hapipakurqa, Judá nacionpi reykunamantaqa manam pipas Ezequías hinaqa karqachu, paypa ñawpaqnintapas nitaq qepantapas.

⁶ Tayta Diosman hapipakuspanmi mana rakikurqachu, aswanqa Moisesman Tayta Diospa qosqan kamachikuykunatam kasukurqa.

⁷ Paywan Tayta Dios kasqanraykum tukuy ima ruwasqanpas allin lloqsirqa. Ezequiasmi Asiria nacionpa reyninpa contranpi hoqarikuruspan manaña payta servirqachu.

⁸ Filisteokunatapas lliw allpankupim Gaza llaqtakama vencerurqaku, vencerurqaqa guardiakunapa qawanan torrekunamanta murallasqa llaqtakunakamam.

Samaria llaqtata vencesqankumanta

⁹ Rey Ezequías tawa wataña munaychakuchkaptinmi chaynataq Elapa churin Oseas qanchis wataña Israel nacionpi munaychakuchkaptinmi, Asiria nacionpa reynin Salmanasar hamuruspan Samaria llaqtapa muyuriqninpi tropankunawan churakururqa.

¹⁰ Hinaspam kimsa watapi vencerurqa. Rey Ezequías soqta wataña munaychakuchkaptinmi chaynataq rey Oseaspas isqon wataña Israel nacionpi munaychakuchkaptinmi, Samaria llaqtata Asiria nacionpa reynin hapikuykurqa.

¹¹ Asiria nacionpa reynin Salmanasarmi Israel runakunata presocharuspan Asiria nacionman aparqa, hinaspanmi Halah llaqtapi, Habor mayupa patanpi kaq Gozán llaqtapi chaynataq Media nacionpa llaqtankunapipas churarurqa, chaypiña yachanankupaq.

¹² Chaykunaqa pasakurqa Tayta Diospa nisqanta mana kasukusqankuraykum chaynataq pacto ruwasqantapas mana cumplisqankuraykum. Tayta Diospa serviqnin Moisespa kamachisqankunatam mana kasukurqakuchu nitaqmi ruwaymanpas churarqakuchu.

Judá nacionpa contranpi rey Senaquerib hamusqanmanta

¹³ Rey Ezequías chunka tawayuq wataña munaychakuchkaptinmi, Asiria nacionpa reynin Senaquerib, Judá nacionpi llapa murallasqa llaqtakunata atacaruspan vencerurqa.

¹⁴ Chaymi Judá nacionpa reynin Ezequías, Asiria nacionpa reyninta Laquis llaqtapi kachkaptin nichimurqa: Arí, ñoqam huchallikuruni, tukuy mañawasqaykitam qosqayki, chaynaqa nacionniymantayá asurikuyña, nispa. Chaymi Asiria nacionpa reynin Judá nacionpa reynin Ezequiasta kamachirqa isqon waranqa isqon pachaknin kilo qollqetawan isqon pachak isqon chunka kilo qorita impuestota qonanpaq.

¹⁵ Chaymi rey Ezequías, Tayta Diospa templonmanta chaynataq palacionpi waqaychasqanku qollqeta qoykurqa.

¹⁶ Chay punchawpim rey Ezequiasqa hurqorachirqa Tayta Diospa templonpa punkunkunaman, pilarkunaman laqasqanku qorita. Chaykunatam Asiria nacionpa reyninman qoykurqa.

¹⁷ Chaymantam Asiria nacionpa reyninqa Laquis llaqtamanta Jerusalén llaqtaman kacharqa tropankunapa kamachiqninta, huk confianzan kamachikuqta chaynataq tropakunapa capitannintapas achkallaña tropayuqta, rey Ezequiaswan tupanankupaq. Jerusalén llaqtaman chayaruspankum hanay law estanqueman hamuq yarqapa hichpanpi sayarurqaku. Chay estanqueqa kachkan “Taqsaq runapa chakranman” riq ñanpim.

¹⁸ Rey Ezequiasta qayaptinkum, llaqtamanta lloqsimurqa Hilciaspa churin reypa mayordomon Eliaquim, secretario Sebna chaynataq Asafpa churin escriba Joa.

¹⁹ Paykunatam rey Ezequiasman nimunankupaq Asiria tropakuna kamachiq nirqa: Asiria nacionpa ancha reqsisqa reyninmi nin: ¿Imapi hapipakuspataq hawkallaña kachkanki?

²⁰ Qanmi nichkanki: Ñoqapaqqa kachkanmi consejaqniykunapas chaynataq guerrapaq allinnin qari-qari soldadoykunapas, nispa; yanqam chayqa. ¿Piman hapipakuspaykitaq contraypi hoqarikuchkanki?

²¹ ¿Chamchasqa soqos tawna hina Egipto nacionpichu hapipakuchkanki? Chay soqos tawnaqa tawnapakuqninpa makintapas pakikuruspanmi qellparunqa. Chay pakipasqa soqos hinallam Egipto nacionpa reynin Faraonpas chaynataq paypi hapipakuqkunapas.

²² Sichum niwanki: Ñoqaykuqa yupaychasqayku Tayta Diospim hapipakuniku, nispa. Hinaptinqa, ¿manachum moqokunapi chay Diospa capillankunatawan altarninkunatapas lliwta Ezequías chinkarachirqa? Payqa Judapi chaynataq Jerusalén llaqtapi yachaqkunatam nirqa: Kay Jerusalén llaqtapi kaq altarpa ñawpaqllanpiñam yupaychankichik, nispa.

²³ Kunanyá Asiriapa reyninwan allinyanakuy, ñoqañataqmi iskay waranqa caballokunata qosqayki, yaqachus iskay waranqa sillakuqkunata tarirunki.

²⁴ Egipto nacionpa carretankunapiña hinaspa sillada tropankunapiña hapipakuspapas ¿imaynataq atiwaq reyniypa serviqnin capitanninkunamanta eqoniq kaqllawanpas peleayta?

²⁵ Kay llaqtata tuñichiq hamunaypaqqa ¿manachum Tayta Dios kamachimuwarqa wak nacionman rispayki tuñichimuy, nispan?

²⁶ Hinaptinmi Hilciaspa churin Elia-quimwan, Sebna hinaspa Joa, chay kamachikuqta nirqaku: Mañakuykikum, muralla hawanpi runakuna uyarichkaptinkuqa amayá Judá nacionpa rimayninpiqa rimapayawaykuchu, arameokunapa rimayninpi rimapayawaykuqa, kay serviqnikikunaqa entiendesaqkum, nispanku.

²⁷ Chay kamachikuqmi ichaqa paykunata nirqa: Reyniyqa manam qamkunamanwan reynillaykichikman willanaypaqchu kachamuwarqa, aswanqa muralla hawanpi kaq runakunamanwan willanaypaqmi, paykunapas qamkunawan kuskam hatun ispayninkuta mikunqaku, chaynataqmi yaku ispayninkutapas tomanqaku, nispa.

²⁸ Chaynata niruspanmi chay kamachikuqqa sayaykuspan Judá nacionpa rimayninpi qaparispan nirqa: ¡Asiria nacionpa ancha reqsisqa reypa nisqanta uyariychik!

²⁹ “Rey Eze-quiaswanqa ama engañachikuychikchu, ñoqamantaqa manam librasunkichik-manchu.

³⁰ Sichum Ezequías nisunkichik: Tayta Diosman hapipakusun, payqa waqaychaykuwasunmi, manam llaqtanchiktaqa Asiria nacionpa reyninmanqa qoykunqachu” nispa.

³¹ Hinaptinqa amayá Ezequiaspa chayna nisqantaqa kasuychikchu, Asiria nacionpa reyninmi kaynata nin: “Ñoqawan allinyanakuspa qayllaypi uchuychakuychik, chaynata ruwaspaqa sapakamam uvasnikichikpa chaynataq higosnikichikpa rurunta mikunkichik, sapakamataqmi pozoykichikpi yakutapas tomankichik,

³² hamuspay kay yachasqaykichikman rikchakuq allpaman, allin ruruq allpaman, uvaspa, aceitunaspa chaynataq mielpa kanan allpaman kikiypuni pusanaykama, chaypi kawsaspaykichikqa manam wañunkichikchu. Ezequiastaqa ama kasuychikchu, payqa llullakususpaykichikmi nisuchkankichik: Tayta Diosmi waqaychawasunchik, nispa.

³³ ¿Yaqachum mayqan diosninkupas nacionnin librayta atirqa Asiria nacionpa reyninmanta?

³⁴ ¿Maypitaq Hamatpa, Arfadpa, Sefarvaimpa, Henapa hinaspa Ivapa diosninku kachkan? ¿Yaqachu chay diosninkuna Samaria llaqtata ñoqamanta librayta atirqaku?

³⁵ Chay nacionkunapa llapallan diosninkunamanta ¿mayqannintaq ñoqamanta nacionnin librayta atirqa? Chaynaqa, ama niychikchu Tayta Diospas Jerusalén llaqtata ñoqamanta waqaychanantaqa”, nispa.

³⁶ Uyariqnin runakunañataqmi upallalla kaspanku mana imatapas nirqakuchu. Reymi paykunata kamachirqa: Amam imatapas rimarinkichikchu, nispa.

³⁷ Hinaptinmi Hilciaspa churin mayordomo Eliaquimwan, secretario Sebna hinaspa Asafpa churin escriba Joa pachankuta llikipaspanku rey Ezequiasman kutispanku chay kamachikuqpa rimasqankunata willarqaku.