2~Reyes 17 - CHUYA QELLQA La Biblia en Quechua de Ayacucho 2012

Israelpi runakunata presochasqankumanta

¹ Judá nacionpa reynin Acaz chunka iskayniyuq wataña munaychakuchkaptinmi, Samaria llaqtamanta Israel nacionpi Elapa churin Oseas munaychakuyta qallaykurqa. Samariapim isqon wata munaychakurqa.

² Ichaqa Tayta Diospa qayllanpim mana allinkunata ruwarqa, payqa manam huchallikurqa Israel nacionpa ñawpaq reyninkuna hinachu.

³ Rey Oseaspa contranpim Asiria nacionpa reynin Salmanasar hamurqa. Venceruptinmi Oseasqa paytaña servispan impuestota pagarqa.

⁴ Ichaqa rey Oseasmi Asiria nacionpa reynin Salmanasarpa contranpi hoqarikunanpaq Egiptopa reynin So sutiyuq runaman comisionta kacharqa; Asiria nacionpa reyninman watan-watan paganan impuestotapas manañam pagarqachu. Chaykunata rey Salmanasar yacharuspanmi rey Oseasta carcelpi wichqarurqa.

⁵ Chaymantam Israel nacionman yaykuruspan Samaria llaqtapa muyuriqninpi kimsa wata churakururqa.

⁶ Isqon wataña rey Oseas munaychakuchkaptinmi, Asiria nacionpa reyninqa Samaria llaqtata venceruspan Israel runakunata presocharuspan Asiria nacionman aparqa, hinaspam Halah llaqtapi, Habor mayupa patanpi kaq Gozán llaqtapi chaynataq Media nacionpa llaqtankunapi churarqa, chaypiña yachanankupaq.

⁷ Chaykunaqa Israel runakunata pasarqa Egiptopa reynin Faraonpa makinmanta hurqomuqninku Tayta Diospa contranpi huchallikuspanku tukuy rikchaq idolokunataña yupaychasqankuraykum;

⁸ chaynataq qayllankumanta Tayta Diospa wischusqan nacionkunapa costumbrenkunatawan Israel nacionpi reykunapa millay ruwayninkunata hina ruwasqankuraykum.

⁹ Israelpa mirayninkunaqa Tayta Diosta kamispankum llapallan llaqtakunapi yupaychananku capillakunata ruwakururqaku, guardiakunapa qawanan torrekunapiwan murallasqa hatun llaqtakunapipas ruwakururqakum;

¹⁰ moqokunapipas chaynataq rapisa-pa sachakunapa sikinkunapipas rumi-manta pilarkunatawan Asera idolokunatañam sayarachirqaku.

¹¹ Paykunapa qayllanmanta Tayta Diospa qarqosqan nacionkuna hinam chay capillakunapi inciensota kañarqaku. Tukuy mana allinkunata ruwaspankum Tayta Diosta piñachirqaku.

¹² “Qamkunaqa amam chaynakunataqa ruwankichikchu” nispa Tayta Dios nichkaptinpas idolokunatam yupaycharqaku.

¹³ Chayraykum Tayta Diosqa profetakunawan chaynataq revelación chaskiqkunawan Israel nacionta hinaspa Judá nacionta anyaspan kaynata nirqa: Mana allin ñanmanta kutirikamuychik hinaspa kamachikuyniykunatawan yachachikuyniykunata waqaychaychik, ñawpaq taytaykichikman yachachisqay kamachikuykunata kasukuychik, chaykunataqa serviqniy profetaykunatakamam willachirqaykichik, nispa.

¹⁴ Paykunam ichaqa mana kasukurqakuchu, aswanqa Tayta Diospi mana hapipakuq ñawpaq taytanku hinam rumi sonqo karqaku.

¹⁵ Paykunaqa Tayta Diospa yachachikuyninkunatapas, ñawpaq taytankuwan pacto ruwas-qantapas chaynataq kamachikuynintapas qepancharurqakum. Idolokunataña yupaychaspankum muyuriqninkupi nacionkuna hina mana imapaqpas valeqña rikurirurqaku. “Amam ruwankichikchu chay nacionkunapa ruwasqantaqa”, nispa Tayta Dios nichkaptinpas chaynataraqmi ruwarqaku.

¹⁶ Señorninku Tayta Diospa llapallan kamachisqankunata saqeruspankum, metalta chulluchispa iskay torokunata ruwakururqaku, ruwakururqakutaqmi Asera idolotapas. Cielopi llapa chaskakunatawan Baal idolokunatañam yupaycharqaku.

¹⁷ Churinkutam qaritapas warmitapas idolokunaman ofrecerqaku, qatipaqkunamanwan layqakunamanmi qokururqaku. Tukuy mana allin ruwaykunaman qokuruspankum Tayta Diosta piñachirqaku.

¹⁸ Chayraykum Israelpa contranpi anchallataña piñakuruspan qayllanmanta Tayta Dios chinkarachirqa, Judá ayllullañam puchururqa.

¹⁹ Ichaqa Judá nacionpas Tayta Diospa kamachikuyninkunataqa manam kasukurqachu, aswanqa Israelpa costumbrenman hinam kawsarqa.

²⁰ Chayraykum Israelpa mirayninkunata Tayta Dios qepancharurqa. Ñakarichispanmi qayllanmanta chinkarachinankama salteaqkunaman qoykurqa.

²¹ Davidpa mirayninmanta Israel nacionta Tayta Dios rakiruptinmi, Israel runakunaqa Nabatpa churin Jeroboamtaña reyninkupaq churarurqaku. Jeroboammi Israel runakunata Tayta Diosmanta rakiruspan llumpayta huchallichirqa.

²² Chaynapim Israel runakunaqa Jeroboampa huchallikus-qankunata ruwarqaku, manam chaykunamantaqa rakikurqakuchu.

²³ Chaymi Israelta Tayta Dios qayllanmanta wischururqa, serviqnin profetankunatakama willachisqanpi hina. Israel runakunam allpankumanta Asiria nacionman preso apasqa karqaku, kunankamapas chaypim kachkanku.

Samaria runakunata astachisqanmanta

²⁴ Asiria nacionpa reyninmi Babilo-niamanta, Cutamanta, Avamanta, Hamat-manta hinaspa Sefarvaim llaqtamanta runakunata aparuspan Israel runakunapa rantinpi paykunataña Samaria llaqtapi churarurqa, chaymi hapikuykuspanku paykunaña yacharqaku.

²⁵ Chay runakunam yachayta qallaykuspanku Tayta Diosta mana yupaycharqakuchu, chaymi paykunapa contranpi leonkunata Tayta Dios kachaykuptin wañuchiyta qallaykurqa.

²⁶ Hinaptinmi Asiria nacionpa reyninman willaykurqaku: Samaria llaqtakunapi yachanankupaq pusachimusqayki runakunaqa manam chay nacionniyuq Diospa kamachikuyninkutaqa yachankuchu, chaynapim chay Diosqa leonkunata kachaykamun paykunata wañuchinanpaq, nispanku.

²⁷ Chaymi Asiria nacionpa reynin kamachirqa: Samaria llaqtamanta pusamusqaykichik hukkaqnin sacerdoteta kutichiychik, chaypi yachaspan Israelpa Diosninpa kamachikuyninkunata yachachinanpaq, nispa.

²⁸ Hinaptinmi Samaria llaqtamanta preso apasqanku huknin sacerdoteta kutichimuptinku Bet-el llaqtapi yachaspan imaynam Tayta Dios yupaychayta yachachirqa.

²⁹ Chaywanpas sapa nacionmanta kaqkunam maymi yachasqankupi diosninkuta ruwarurqaku, hinaspam Samaria runakunapa ruwasqan capillakunapi churarurqaku.

³⁰ Babilonia lawmanta kaqkunam Sucot-benot idolota ruwakururqaku, Cuta llaqtamanta kaqkunam Nergal idolota ruwakururqaku, Hamat llaqtamanta kaqkunañataqmi Asima idolota ruwakururqaku.

³¹ Ava lawmanta kaqkunam Nibhaz idolotawan Tartac idolota ruwakururqaku. Sefarvaim llaqtamanta kaqkunañataqmi Adramelec idolotawan Anamelec idolota ruwakuruspanku yupaychanankupaq churinkuta kañapuqku.

³² Tayta Diosta yupaychachkaspankupas, paykuna ukumantam sacerdotekunata akllaruspanku yupaychananku capillakunapi servikunankupaq churarurqaku.

³³ Tayta Diosta yupaychachkaspankupas idolonkunataqa hinallam serviqku, chaynataqa ruwaqku nacionninkupi costumbrenkuman hinam.

³⁴ Kunankamapas paykunaqa hinallam chaynata ruwachkanku. Tayta Diostaqa manam yupaychankuchu, kamachikuyninkunatawan yachachikuyninkunatapas paykunaqa manam ruwayman churankuchu, Israelwan sutichasqan Jacobpa mirayninkunaman Tayta Diospa qosqan yachachikuykunatawan kamachikuykunatapas manam kasukunkuchu.

³⁵ Jacobpa mirayninkunawan pactota ruwaspanmi Tayta Dios kamachirqa: Idolokunataqa amam yupaychankichikchu, ñawpaqninpipas amam qonqorakunkichikchu nitaqmi servinki-chikchu, amataqmi sacrificiokunatapas ofrecenkichikchu.

³⁶ Ñoqa Tayta Diosllatam yupaychawankichik, qamkunataqa hatun atiyniywanmi Egipto nacionmanta hurqomurqaykichik. Ñoqallata kasuwaspam yupaychawan-kichik hinaspam sacrificiokunata ofrecewankichik.

³⁷ Tukuy tiempoyá qellqaspa qosqay decretokunata, reglamentokunata, yachachikuykunata chaynataq kama-chikuykunatapas kasukuychik; idolokunataqa amam yupaychankichikchu.

³⁸ Qamkunawan pacto ruwasqaytaqa amam qonqarunkichikchu, amataqmi sapaq dioskunatapas yupaychankichikchu,

³⁹ aswanqa ñoqa Señornikichik Tayta Diosllatam serviwankichik. Ñoqañataqmi enemigoykichikmanta librasqaykichik, nispa.

⁴⁰ Chaywanpas paykunaqa manam kasukurqakuchu, ñawpaq costumbrenkuman hinam ruwarqaku.

⁴¹ Asiria nación reypa pusachimusqan runakunaqa Tayta Diosta yupaychachkaspapas, kikinkupa idolonkutapas servirqakum. Churinkupas, willkankupas, ñawpaq taytankunapa ruwasqanta hinallam kunankamapas ruwachkanku.