2~Reyes 14 - CHUYA QELLQA La Biblia en Quechua de Ayacucho 2012

Rey Amasiaspa munaychakusqanmanta

¹ Joacazpa churin Joás iskay wataña Israel nacionpi munaychakuchkaptinmi, Judá nacionpa reynin Joaspa churin Amasías munaychakuyta qallaykurqa.

² Iskay chunka pichqayuq watanpim Amasiasqa munaychakuyta qallaykurqa. Iskay chunka isqonniyuq watam Jerusalén llaqtapi munaychakurqa. Mamanmi karqa Jerusalén llaqtayuq Joadán.

³ Rey Amasiasqa Tayta Diospa qayllanpim allinkunata ruwarqa, ichaqa manañam ñawpaq taytan David hinañachu, aswanqa taytan Joaspa ruwasqankunata hinam ruwarqa.

⁴ Chaywanpas moqokunapi capillakunataqa manam chinkachirqachu, chaymi runakunaqa sacrificiokunata ofrecespa inciensota kañaqku.

⁵ Amasiasqa munaychakuyninpi allinta takyaruspanmi taytan wañuchiq runakunata wañurachirqa.

⁶ Chay runakunapa churinkunatam ichaqa mana wañuchirqachu, imaynam Moisespa qellqasqan kamachikuy libropa nisqanman hina, chaypim Tayta Dios nirqa: Wawa-churinkupa huchallikusqanmantaqa amam tayta-mamantaqa wañuchinkichikchu, nitaqmi tayta-mamanpa huchanmantapas wawa-churinkutaqa wañuchinkichikchu. Huchankumantaqa sapakamam wañunqaku, nispa.

⁷ Amasiasmi kachi wayqopi chunka waranqa Edom runakunata wañurachirqa, guerrapi venceruspanmi Sela llaqtata hapikuykurqa, hinaspam Jocteelwan suticharurqa, kunankamapas chaymi sutin.

⁸ Chaymantam Amasiasqa Israelpa reynin Jehupa willkan Joacazpa churin Joasman willakuqta kacharqa, hinaspam nichimurqa: Peleananchikpaq lloqsimuy, nispa.

⁹ Hinaptinmi Israelpa reynin Joasñataq Judá nacionpa reynin Amasiasta nichimurqa: Líbano montepi wiñaq cardo qoras cedro sachata nichimusqa: “Warmi churikita qari churiywan casarachiy”, nispa. Ichaqa Líbano monte animalsi chayninta pasaspan cardo qorata saruparusqa.

¹⁰ Edom nacionta venceruspaykim hatun tukuqllaña rikurirunki. Chaynaqa, chaywan alabakuspaykiyá hawkalla wasikipi kakuy. ¿Imapaqtaq peleaq yaykuyta munanki qampas, Judá nacionpas sasachakuypi kanaykichikpaq? nispa.

¹¹ Amasiasmi ichaqa mana kasukurqachu. Chaymi Israelpa reynin Joasqa rispan Judá nacionpa reynin Amasiaswan Bet-semes llaqtapi pelearqaku; chay llaqtaqa kachkan Judá nacionpim.

¹² Judá tropakunata Israel tropakuna venceruptinmi sapakama wasinkuman lluptikurqaku.

¹³ Israelpa reynin Joasmi Judá nacion-pa reynin Amasiasta Bet-semes llaqtapi presocharuspan Jerusalén llaqtaman aparqa. Amasiasqa karqa Joaspa churinmi hinaspa Ocoziaspa willkanmi. Rey Joasmi Jerusalén llaqtapa perqankunata pachak pusaq chunka metro largoyuqta taqmarurqa, Efraín sutiyuq punkumanta esquinapi punkukama.

¹⁴ Hinaspanmi Tayta Diospa templonpi kaq qorita, qollqeta, llapa serviciokunata chaynataq reypa wasinpi tarisqan tukuy imakunatapas apakurqa. Chaymantam reypa churinkunata presocharuspan Samaria llaqtaman kutikurqa.

¹⁵ Rey Joaspa imaynam kawsasqanwan imakunam ruwasqankunapas, qarillaña kayninpas chaynataq Judá nacionpa reynin Amasiaswan peleasqanpas Israel nacionpi reykunapa ruwasqanmanta willakuq libropim qellqasqa kachkan.

¹⁶ Rey Joás wañuruptinmi Samaria llaqtapi pamparurqaku, ñawpaq taytankunapa chaynataq Israelpi reykunapa pampakusqanpi. Paypa rantinpim churin Jeroboamña munaychakurqa.

¹⁷ Israel nacionpa reynin Joacazpa churin Joás wañukusqanmantam, Judá nacionpa reynin Joaspa churin Amasiasqa chunka pichqayuq watataraq kawsarqa.

¹⁸ Amasiaspa imaynam kawsasqanwan imakunam ruwasqankunapas Judá nacionpi reykunapa ruwasqanmanta willakuq libropim qellqasqa kachkan.

¹⁹ Jerusalén llaqtapi kaqkunam rey Amasiaspa contranpi hoqarikururqaku, chaymi Amasiasqa Laquis llaqtaman lluptikurqa, ichaqa Laquis llaqtakama qatispankum chaypi wañurachimurqaku.

²⁰ Ayanta Jerusalén llaqtaman caballokunapi apamuspankum “Davidpa Llaqtanwan” sutichasqankupi pamparurqaku, ñawpaq taytankunapa kasqanpi.

²¹ Hinaptinmi Judá nacionpi runakunaqa, Amasiaspa rantinpi churin Azariastaña rey kananpaq churarurqaku. Azariasqa chunka soqtayuq watanpim kachkarqa.

²² Ñawpaq taytankuna hina Amasiaspa wañukusqan qepallantam Elat llaqtata Judá nacionpaq Azarías kutirachikurqa, hinaspam musoqmanta hatarichirqa.

Israelpi Jeroboam munaychakusqanmanta

²³ Judapa reynin Joaspa churin Amasías chunka pichqayuq wataña munaychakuchkaptinmi, Joaspa churin Jeroboam Israelpi munaychakuyta qallaykurqa. Tawa chunka hukniyuq watam Samaria llaqtapi munaychakurqa.

²⁴ Ichaqa Tayta Diospa qayllanpim mana allinkunata ruwarqa, Israel nacionta huchallichiq Nabatpa churin Jeroboam hina huchallikuspan.

²⁵ Jeroboammi Israelpa linderonkunata kutirachikurqa Hamat lawman yaykuna qasamanta qallarispa Arabá law qochakama. Chaynataqa ruwarqa Amitaipa churin profeta Jonasnintakama Israelpa yupaychasqan Tayta Diospa nisqanman hinam. Jonasqa karqa Gat-hefer llaqtapi yachaq profetam.

²⁶ Hatun ñakariypi Israel runakuna kawsasqankuraykum paykunataqa Tayta Dios qawarirqa. Manañam pipas Israel naciontaqa yanaparqañachu.

²⁷ Kay pachamanta Israelpa sutin chinkarachiyta manaraq munaspanmi Joaspa churin Jeroboamwan Israel nacionta Tayta Dios salvarqa.

²⁸ Jeroboampa imaynam kawsasqanwan imakunam ruwasqankunapas, mana manchakuspan guerrapi peleasqankunapas chaynataq Judá nacionpa munaychakusqan Damasco llaqtata hinaspa Hamat llaqtata Israel nacionpaq imaynam kutichikusqanpas Israelpi reykunapa ruwasqanmanta willakuq libropim qellqasqa kachkan.

²⁹ Jeroboam wañukuptinmi Samariapi pamparurqaku, ñawpaq taytankunapa chaynataq Israelpi reykunapa pampakusqanpi. Paypa rantinpim churin Zacariasña munaychakurqa.