2~Reyes 12 - CHUYA QELLQA La Biblia en Quechua de Ayacucho 2012

Judá nacionpi Joás munaychakusqanmanta

¹ Rey Jehú qanchis wataña Samaria llaqtapi munaychakuchkaptinmi, Joaspas Jerusalén llaqtapi munaychakuyta qallaykurqa, hinaspam tawa chunka wata munaychakurqa. Mamanpa sutinmi karqa Sibia, payqa karqa Beerseba llaqtayuqmi.

² Joasqa sacerdote Joiada yachachisqanraykum Tayta Diospa munasqanman hina allin kaqkunata ruwarqa.

³ Chaywanpas moqokunapi capillakunataqa manam chinkachirqachu, chaypim runakunaqa hinalla sacrificiokunatawan inciensota idolokunapaq kañapuqku.

⁴ Huk punchawmi sacerdotekunata rey Joás nirqa: Tayta Diospaq sapaqchaspa temploman apamusqanku qollqetawan sapa runapa impuesto qosqanta chaynataq voluntadninkuman hina apamusqanku qollqeta huñuychik,

⁵ sapa sacerdote aylluykichikkunamanta chaskiychik hinaspa chaywan Tayta Diospa templonta allichachiychik, nispa.

⁶ Ichaqa iskay chunka kimsayuq wataña Joás munaychakunankamapas llapa sacerdotekunaqa manam templopa raqrankunata allichachirqakuchu.

⁷ Chayraykum rey Joasqa sacerdote Joiadatawan wakin sacerdotekunata qayachispan nirqa: ¿Imanasqataq templopa raqrankunataqa manaraq allichachinkichikchu? Kunanmantaqa manañam aylluykichikmanta qollqeta chaskinkichikñachu; chaskisqaykichik kaqtañataqmi Tayta Diospa wasinta allichanankupaq qonkichik, nispa.

⁸ Chaymi sacerdotekunaqa kasukuspanku qollqetaqa manaña chaskirqakuñachu, nitaqmi templopa raqrankunatapas allichachirqakuñachu.

⁹ Sumo sacerdote Joiadañataqmi qollqe huñuna cajata tapanpi uchkuyuqta ru-warachirqa, hinaspam altarpa alleq lawninpi churarurqa, punku waqaychaq sacerdotekunañataqmi Tayta Diospa templonman apamusqanku llapa qollqeta chay cajaman churarqaku;

¹⁰ huntaptinñataqmi reypa secretarionwan sumo sacerdote rispanku Tayta Diospa templonpi qollqeta yupaspa wayqakunapi waqaychaqku.

¹¹ Yuparuspankum templowan cuentallikuqkunaman qoqku, paykunañataqmi carpinterokunaman, templo allichaqkunaman,

¹² albañilkunaman hinaspa rumi labraqkunaman pagaqku. Chay qollqewantaqmi qerukunatawan labrasqa rumikunatapas rantiqku, chaynapi Tayta Diospa templonpa raqrankunata allichanankupaq. Templopa tukuy ima allichana kaqkunapim chay qollqeta tukurqaku.

¹³ Tayta Diospa templonman apamusqanku qollqemantaqa manam ruwarqakuchu qollqemanta tazonkunatapas, mecha limpianakunatapas, copakunatapas nitaq trompetakunatapas. Templopaqqa manam qollqemanta nitaq qorimanta ima servicionkunatapas ruwarqakuchu.

¹⁴ Aswanqa llamkaqkunamanmi qorqaku, chaywan Tayta Diospa templonta allichanankupaq.

¹⁵ Llamkaqkunaman paganankupaq qollqe hatalliqkunataqa manam cuentata mañaqkuchu, allin sonqoyuq runakuna kasqankurayku.

¹⁶ Huchankumanta pampachasqa kanankupaq llapa runakunapa pagasqanku qollqetaqa manam Tayta Diospa templonmanqa apaqkuchu, chay qollqeqa sacerdotekunapaqmi karqa.

¹⁷ Chay punchawkunapim Siria nacionpa reynin Hazael, Gat llaqtapa contranpi peleananpaq rirqa, venceruspanñataqmi Jerusalén llaqtapa contranpiñataq rirqa.

¹⁸ Chaymi Judá nacionpa reynin Joasqa kikinpa sapaqchasqan ofrendakunata, ñawpaq taytankunapa otaq Judá nacionpa reynin Josafatpa, Jorampa, Ocoziaspa sapaqchasqan ofrendata chaynataq templopi hinaspa reypa palacionpi churasqanku qoritapas Siria nacionpa reynin Hazaelman qoykurqa, chaymi Hazaelqa Jerusalén llaqtata manaña atacaspan kutikurqa.

¹⁹ Joaspa imaynam kawsasqanpas chaynataq imakunam ruwasqankunapas Judá nacionpi reykunapa ruwasqanmanta willakuq libropim qellqasqa kachkan.

²⁰ Rey Joastaqa serviqnin kamachi-kuqkunallam contranpi hoqarikuruspanku Sila llaqtaman richkaptin Milo sutiyuq wayqopi wañurachirqaku.

²¹ Wañuchiqninkunaqa karqa, Simeatpa churin Isacarwan Somerpa churin Jozabadmi, paykunaqa karqaku serviqninkunam. Joastam “Davidpa Llaqtanwan” sutichasqankupi pamparurqaku, ñawpaq taytankunapa kasqanpi. Paypa rantinpim churin Amasiasña munaychakurqa.