2~Reyes 11 - CHUYA QELLQA La Biblia en Quechua de Ayacucho 2012

Ataliata wañuchisqankumanta

¹ Rey Ocoziaspa maman Ataliam wawan wañurachisqankuta yacha-ruspan, reypa mirayninkunata lliwta wañurachirqa.

² Rey Jorampa warmi churin Josabam ichaqa rey Ocoziaspa panin kasqanrayku, Ocoziaspa churinkunata wañuchichkaptinku sobrinon Joasta ayqerachispan uywaqnin warmitawan kuskata puñunan cuartopi pakarurqa Atalía mana tarinanpaq. Chaynapim mana wañuchirqachu.

³ Soqta watam Joasqa uywaqninpiwan Tayta Diospa templonpi pakasqa karqa. Ataliañataqmi nacionpi munaychakurqa.

⁴ Qanchis watamanñataqmi sacerdote Joiada qayachimurqa capitankunata, reina waqaychaq soldadokunata, guardiakunapa kamachiqninkunata, hinaspam Tayta Diospa templonman pusaykurqa. Chaypim paykunawan contratota ruwaspan jurachirqa, hinaspam reypa churinta paykunaman reqsichispan,

⁵ nirqa: Kimsaman rakikuruspaykichikmi wakiqnikichik samana punchawpi palaciota waqaychankichik.

⁶ Wakiq-nikichikmi Shur punkupi churakurunkichik, wakiqnikichikñataqmi qepa law punkupi, chaynapi mana pipas yaykunanpaq.

⁷ Samana punchawpi mana guardia ruwaqkunañataqmi Tayta Diospa templonta waqaychankichik.

⁸ Sapakamam armantinkama reypa muyuriqninpi churakunkichik. Pipas qamkunapa chawpikichikta pasay munaqtaqa wañuchinkichikmi. Qamkunam reyta waqaychankichik maylawman riptinpas, nispa.

⁹ Llapa capitankunam sacerdote Joia-dapa kamachisqanta hina ruwarqaku. Samana punchawpi yaykuq soldadokunatapas chaynataq chay punchawpi lloqsiq soldadokunatapas sapa kamachiqkunam sacerdote Joiadapa qayllanman pusarqaku.

¹⁰ Joiadañataqmi Tayta Diospa templonpi churasqan rey Davidpa lanzankunatawan escudokunata sapa capitankunaman qoykarirqa.

¹¹ Guardiakunañataqmi reyta chawpicharuspanku sapakama armayuqkama altarpa muyuriqninpi sayarqaku, templopa alleq lawninmanta ichoq lawninkama.

¹² Hinaptinmi Joiadaqa reypa churin Joasta hawaman pusamuspa umanman coronata churaykurqa, hapiykachirqataqmi chunkantin kamachikuykunatapas. Chaymantam umanman aceiteta tallispan rey kananpaq sapaqcharqa. Hinaptinmi llapallanku kusikuywan taqllakuspa qaparirqaku: ¡Kawsachun rey! nispanku.

¹³ Ataliañataqmi runakunapa chaynataq soldadokunapa qaparisqanta uyariruspan Tayta Diospa templonman yaykururqa chaypi huntallaña kachkaptinku.

¹⁴ Qawarispanmi rikururqa reyta costumbrenkuman hina pilarpa waqtanpi sayachkaqta, capitankunatapas chaynataq trompeta tocaqkunatapas reypa waqtanpi kachkaqta, runakunapas kusikuspanku trompetata tocachkaqta. Chaymi Ataliaqa pachanta llikipaspan qaparirqa: ¡Traicionmi kayqa, traicionmi kayqa! nispa.

¹⁵ Hinaptinmi capitankunata sacerdote Joiada kamachirqa: Tayta Diospa templonmanta hawanman Ataliata hurqoruychik. Pitapas payman sayapakuqtaqa wañuchiychik, nispa. Chaynataqa ruwarqaku sacerdote kamachikuspa Tayta Diospa templonpiqa amam wañuchinkichikchu nisqanraykum.

¹⁶ Chaymi Ataliata silladakunapa yaykunan punkunta palacioman pusaruspanku chaypi wañurachirqaku.

¹⁷ Chaymantam Joiadaqa reytapas chaynataq runankunatapas Tayta Dioswan pactota ruwachirqa, chaynapi Tayta Diospa llaqtanña kanankupaq. Chaynataqmi reytawan runakunatapas contratota ruwachirqa.

¹⁸ Llapa runakunañataqmi Baalpa templonman yaykuruspanku altarninkunatawan llapa idolokunata pasaypaqta ñutururqaku. Baalpa sacerdoten Matantapas altarkunapa ñawpaqninpim wañurachirqaku. Joiadañataqmi Tayta Diospa templonta waqaychanankupaq guardiakunata churarqa.

¹⁹ Joiada kamachiptinmi capitankuna, rey waqaychaq soldadokuna, guardiakuna chaynataq llapallan runakuna Tayta Diospa templonmanta palacioman reyta pusarqaku guardiakunapa yaykunan punkunta. Joasñataqmi reykunapa trononpi tiyaykurqa.

²⁰ Llaqtapi llapallan runakunam kusisqallaña kar-qaku. Ataliata reypa palacionpi wañurachisqankumantam llaqtapas hawkaña karqa.

²¹ Joasqa qanchis watanpim munaychakuyta qallaykurqa.