2~Reyes 10 - CHUYA QELLQA La Biblia en Quechua de Ayacucho 2012

Rey Acabpa ayllunkunata Jehú wañuchisqanmanta

¹ Samaria llaqtapim rey Acabpa qanchis chunka churinkuna karqa. Chaymi Samaria llaqtapi Jezreel llaqtayuq capitankunaman, ancianokunaman chaynataq Acabpa churin uywaqkunaman cartata apachispan Jehú nirqa:

² Reynikichikpa churin uywaqkuna, carretankunawan, caballonkunawan cuentallikuqkuna, murallasqa llaqta nanachikuqkuna hinaspa armankuna hatalliqkuna, kay cartata chaskispaykichikmi,

³ reynikichikpa allinnin chaynataq justo kaq churinta akllankichik, hinaspam taytanpa rantinpi churankichik, chaynata ruwaspam reynikichikpa mirayninkunapa favorninpi peleankichik.

⁴ Carta chaskiqkunañataqmi ancha mancharisqallaña nirqaku: Iskay reykunapas Jehuta mana venceyta atichkaptinkuqa ¿imaynataqsi ñoqanchikqa paywan peleachwanchik? nispanku.

⁵ Chaymi reypa mayordomonwan, llaqtapi gobernador, ancianokuna chaynataq warmakunapa uywaqninkunapas Jehuta nichimurqaku: Ñoqaykuqa serviqnikikunam kaniku, imam niwasqaykikutam ruwasaqku. Manataqmi pitapas reypaqqa akllaymankuchu, qamyá tanteasqaykita ruway, nispanku.

⁶ Hinaptinmi yapamanta cartaspan Jehú nirqa: Ñoqapa favorniypi hinaspa kasuwaqniy kaspaykichikqa, reynikichikpa qari churinkunapa umanta apamuspayá paqarin kay horata Jezreel llaqtaman hamuychik, nispa. Reypa qanchis chunka qari churinkunaqa, llaqtapi reqsisqa runakunapa makinpim kachkarqaku, paykunapa uywasqan kasqanrayku.

⁷ Chaymi cartata chaskiruspallanku, reypa qanchis chunka churinkunata wañurachispanku umankuta canastapi Jezreel llaqtapi Jehuman apachirqaku.

⁸ Huk willakuqñataqmi hamuruspan Jehuman kaynata willaykurqa: Reypa churinkunapa umantam chayarachimunku, nispa. Chaymi Jehú kamachirqa: Llaqtapa punkunpiyá paqarinkama iskay hawaqpi montoramuychik, nispa.

⁹ Paqarinnintintam Jehú chayman rirqa, hinaspam chaypi sayaykuspan llapa runakunata nirqa: Qamkunaqa mana huchayuqmi kankichik. Reyniytaqa ñoqam contranpi hoqarikuruspay wañurachirqani, ichaqa ¿pitaq kaykunataqa wañurachirqa?

¹⁰ Yachaychikyá, Tayta Diospa imapas Acabpa mirayninkunapa contranpi nisqanqa manam yanqaqa kanmanchu, aswanqa cumplikunqam. Tayta Diosmi kaykunataqa ruwarqa serviqnin Eliasnintakama nisqanman hina, nispa.

¹¹ Jehuqa wañurachirqataqmi Acabpa mirayninkunamanta Jezreel llaqtapi puchuqkunatapas, kamachikuyninpi yanapaqninkunatapas, amigonkunatapas chaynataq sacerdotenkunatapas. Manam pitapas puchurqachu.

¹² Jezreel llaqtamantam Jehú pasarqa Samaria llaqtaman. Risqanpim oveja michiqkunapa huñunakunanman chayarurqa.

¹³ Chaypim Judá nacionpa reynin Ocoziaspa ayllunkunata tarirurqa, hinaspam tapurqa: ¿Pikunataq kankichik? nispa. Chaymi paykuna nirqaku: Ñoqaykuqa rey Ocoziaspa ayllunmi kaniku, chaymi reypa churinkunatawan reinapa wawankunata watukuq hamurqaniku, nispanku.

¹⁴ Hinaptinmi Jehú kamachikurqa: Kawsachkaqllata kaykunata hapiychik, nispa. Kawsachkaqllata hapiruspankum, oveja michiqkunapa huñunakunanku hichpanpi kaq pozopa waqtanpi tawa chunka iskayniyuq runakunata mana pitapas puchuspa wañurachirqaku.

¹⁵ Chaymanta pasaspanmi Jehú tuparurqa Recabpa churin Jonadabwan, rimaykuspanmi payta tapurqa: ¿Yaqachum ñoqawan sonqoyki kachkan, imaynam ñoqapa sonqoy qampaq kasqanman hina? nispa. Jonadabñataqmi nirqa: Arí, nispa. Hinaptinmi Jehú nirqa: Chayna kaptinqa makikita haywarimuway, nispa. Makinta haywariykuptinmi carretanman seqarachirqa,

¹⁶ hinaspam nirqa: Ñoqawan hakuchik, Tayta Diospaq tukuy ima ruwasqayta qawamuy, nispa. Chaymi carretanpi pasachirqa.

¹⁷ Samaria llaqtaman Jehú chayaruspanmi Acabpa mirayninmanta puchuqkunata wañurachirqa mana hukllatapas puchuykuspa, chaynataqa ruwarqa Eliasnintakama Tayta Diospa nisqanman hinam.

Baal yupaychaqkunata Jehú chinkachisqanmanta

¹⁸ Chaymantam llapa runakunata huñuruspan Jehú nirqa: Acabqa pisillatam Baalta yupaycharqa, ñoqam ichaqa paymantapas aswan allintaraq yupaychasaq.

¹⁹ Chaynaqa, qayamuychik Baalpa profetankunata, yupaychaqnin runakunatawan sacerdotenkunatapas, lliw hamuchunku. Huk hatun sacrificiotam Baalman ofrecesaq, pipas mana hamuqqa wañuchisqam kanqa, nispa. Jehuqa chaynata ruwarqa, sakrillawan huñuruspan Baal yupaychaqkunata lliwta wañuchinanpaqmi.

²⁰ Jehuqa nirqataqmi: Baalpaq hatun huñunakuy punchawta akllaychik, nispa. Hinaptinmi chaynata ruwarqaku.

²¹ Chaytam tukuy Israel nacionpi Jehú willachimurqa, hinaptinmi Baalpa yupaychaqninkuna temploman lliw huñunakaramurqaku, manam pipas qepamurqachu. Chaynapim Baalpa templonpi kichkiy-kichkiy karqaku.

²² Hinaspanmi pachakuna waqaychaqta Jehú kamachirqa: Baal yupaychaq runakunapaq pachakunata hurqomuy, nispa. Hinaptinmi chaynata ruwarqa.

²³ Jehu-ñataqmi Recabpa churin Jonadabwan Baalpa templonman yaykuruspanku Baal yupaychaqkunata nirqa: Sumaqta qawaychik, yanqañataq kaypi pipas kanman Tayta Diosta yupaychaqkuna. Kaypiqa kanqa Baalta yupaychaqkunallam, nispa.

²⁴ Baalta yupaychaqkuna sacrificiokunata ofrecenankupaq temploman yaykuruptinkum Jehuñataq pusaq chunka runankunata hawa punkupi churaramuspan kamachirqa: Pipas kay runakunamanta hukllantapas mana wañuchispa lluptirachiqqa vidanwanmi paganqa, nispa.

²⁵ Baalman ofreceyta tukuruspanmi soldadonkunatawan capitanninkunata Jehú kamachirqa: Yaykumuspaykichik wañuchiychik ama chullallapas lluptichunchu, nispa. Chaymi soldadokunawan capitankuna llapa runakunata wañuchispa hawaman wischumurqaku. Chaymantam Baalpa templonpi santuariokama yaykuruspanku

²⁶ Baalpa templonpi idolokunata hurqoramuspanku kañaykurqaku.

²⁷ Baal idolotapas ñuturuspankum templontapas tuñirachirqaku, hinaspam ispakunanku sitiotaña ruwarurqaku, chaynam kachkan kunankamapas.

²⁸ Chaynatam Israelmanta Baal idolota Jehú chinkarachirqa.

²⁹ Chaywanpas Israel nacionta huchallichiq Nabatpa churin Jeroboampa huchankunataqa manam saqerqachu, aswanmi Bet-el llaqtapi chaynataq Dan llaqtapi qorimanta torillokunata hinalla yupaycharqa.

³⁰ Jehutam Tayta Dios nirqa: Nisqayta kasukuspa Acabpa mirayninkunata wañuchispa qayllaypi allin ruwasqaykiraykum churikikuna Israel nacionpi munaychakunqa willkaykipa willkankama, nispa.

³¹ Jehumi ichaqa mana tukuy sonqonwanchu Israelpa yupaychasqan Tayta Diospa kamachikuyninkunata kasukurqa. Israel nacionta huchallichiq Jeroboampa huchankunatapas Jehuqa manam saqerqachu.

³² Chay punchawkunapim Israelpa allpan menosyachiyta Tayta Dios qallaykurqa. Israelpa linderonkunapi yachaq runakunatam rey Hazael atacamuyta qallaykuspam qechururqa,

³³ Jordán mayupa intipa qespimunan lawmanta qallaykuspan Galaad lawninta Basankama; chaynallataq Arnón mayupa norte lawninpi kaq Aroer llaqtatapas. Chaykunam karqa Gad ayllupa, Rubén ayllupa hinaspa Manasés ayllupa allpankuna.

³⁴ Jehupa imaynam kawsasqanwan imakunam ruwasqanpas chaynataq qarillaña kayninpas Israelpi reykunapa ruwasqanmanta willakuq libropim qellqasqa kachkan.

³⁵ Jehú wañukuptinmi Samaria llaqtapi pamparurqaku ñawpaq taytankunapa kasqanpi. Paypa rantinpim churin Joacazña munaychakurqa.

³⁶ Jehuqa iskay chunka pusaqniyuq watam Samaria llaqtamanta Israel nacionta kamachirqa.