2~Reyes 1 - CHUYA QELLQA La Biblia en Quechua de Ayacucho 2012

Rey Ocoziaspa wañukusqanmanta

¹ Rey Acab wañukuptinmi llapa moabitakuna Israelpa contranpi hoqarikururqaku.

² Rey Ocoziasmi Samariapi palacionpa altosninpi ventananmanta wichiykamuspan onqorurqa, chaymi runankunata kamachispan nirqa: Rispaykichik Ecrón llaqtapa diosnin Baal-zebubta tapumuychik, kay onqosqaymanta sanoyasaqraqchu icha manañachu, nispa.

³ Hinaptinmi Tisbe llaqtayuq Eliasta Tayta Diospa angelnin nirqa: Samaria llaqtapi yachaq reypa kachamusqan runakunawan tupamunaykipaq riy hinaspa kaynata nimuy: ¿Manachu Israel nacionpi Dios karqa, chaynapi Ecrón llaqtapi Baal-zebub idolotaraq tapumunaykichikpaq? nispa.

⁴ Chaynaqa, Tayta Diosmi kaynata nin: “Onqosqayki camaykimantaqa manañam hatarinkiñachu, aswanqa wañunkipunim”, nispa. Chaymi Elíasqa rispan, imam kamachisqanman hina ruwamurqa.

⁵ Kachasqan runakuna kutiramuptinkum reyñataq tapurqa: ¿Imanasqataq kutiramunkichik? nispa.

⁶ Chaymi paykuna nirqaku: Huk runawan tuparuptiykum niwarqaku: “Kachamusuqnikichik reyman kutirispa Tayta Diospa nisqanta kaynata nimuychik: ¿Manachu Israel nacionpi Dios karqa chaynapi Ecrón llaqtapi kaq Baal-zebub idolotaraq tapuchimunaykipaq? chayraykum onqosqaykimantaqa manañas hatarinkiñachu aswanqa wañukunkiñas”, nispanku.

⁷ Hinaptinmi paykunata rey tapuykurqa: Tuparuptikichik tukuy kaykuna nimusuqnikichik runaqa ¿imaynataq kasqa? nispa.

⁸ Chaymi paykuna nirqaku: Pelomanta pachayuq hinaspa qaramanta ruwasqa weqaw watayuqmi, nispanku. Reyñataqmi nirqa: Payqa Tisbe llaqtayuq Eliasmi, nispa.

⁹ Hinaspam huk capitanta pichqa chunka soldadontinta kacharqa. Chayaruptinkum Eliasqa orqopa puntanpi tiyachkasqa, chaymi capitán nirqa: Diospa profetan, qamtam rey nimusunki uraykamunaykipaq, nispa.

¹⁰ Chaymi chay pichqa chunka soldadokunapa capitanninta Elías nirqa: Sichum Diospa profetan kaptiyqa, hanaq pachamanta nina uraykamuspa qamtawan pichqa chunka runaykikunata rupasunkichik, nispa. Hinaptinmi hanaq pachamanta nina uraykamuspan chay capitantawan pichqa chunka runankunata ruparurqa.

¹¹ Huktawanmi rey kacharqa huk capi-tanta pichqa chunka soldadontinta. Paypas Eliastam nirqa: Diospa profetan, qamtam rey nimusunki chaylla uraykamunaykipaq, nispa.

¹² Chaymi Elías nirqa: Sichum Diospa profetan kaptiyqa, hanaq pachamanta nina uraykamuspayá qamtawan pichqa chunka runaykikunata rupasunkichik, nispa. Hinaptinmi hanaq pachamanta nina uraykamuspan chay capitantawan pichqa chunka runankunata ruparurqa.

¹³ Huktawanmi rey kacharqa huk capitan-ta pichqa chunka soldadokunatawan, chaymi Eliaspa kasqanman chayaruspan paypa qayllanpi qonqorakuykuspan ruegakurqa: Diospa profetan, ruegakuykim vidallay-tawan kay pichqa chunka serviqnikikunapa vidantayá kuyapayariy.

¹⁴ Ñam iskay kutikamaña hanaq pachamanta nina uraykamuspan punta hamuq capitankunatawan pichqa chunka runankunata ruparun. Vidallaykutayá kuyapayariykuy, nispa.

¹⁵ Hinaptinmi Eliasta Tayta Diospa angelnin nirqa: Paywan riy, paytaqa ama manchakuychu, nispa. Chaymi Elías hatarispan capitanwan kuska reyman rirqaku.

¹⁶ Chayaruspanmi reyta nirqa: Tayta Diosmi kaynata nin: ¿Manachu Israel nacionpi Dios karqa Ecrón llaqtapi Baal-zebub idolota tapuchimunaykipaq? chayraykum onqosqaykimantaqa manaña hatarinkiñachu aswanqa wañukunkiñam, nispa.

¹⁷ Eliasnintakama Tayta Diospa nisqan-man hinam Ocozías wañukurqa. Mana churiyuq kasqanraykum rantinpi wawqen Joramña munaychakurqa. Chayku-naqa pasakurqa Josafatpa churin Joram iskay wataña Judá nacionpi munaychakuchkaptinmi.

¹⁸ Ocoziaspa imaynam kawsasqanwan, wakin ruwasqankunapas Israel nacionpi reykunapa vidanmanta willakuq libropi qellqasqam kachkan.