2~Juan 1 - CHUYA QELLQA La Biblia en Quechua de Ayacucho 2012

Cartapa qallariyninmanta

¹ Ñoqa ancianom, Diospa akllasqan señoramanwan wawankunaman qellqamuykichik. Qamkunataqa cheqaptam kuyaykichik, manataqmi ñoqallachu aswanqa haykam cheqap kaq reqsiqkunapiwanmi.

² Kuyaykikuqa ñoqanchikpi cheqap kaq takyasqanraykum, chayqa wiña-wiñaypaqmi ñoqanchikwan kanqa.

³ Dios Taytanchikpa hinaspa Dios Taytapa churin Jesucristoyá kuyakuyninman hina, llakipakuyninta, hawkayayninta, cheqap kayninta hinaspa kuyakuyninta qamkunaman chaqchurimusunkichik.

⁴ Wakin wawaykikunatam tariramuni, imaynam Dios Taytanchikpa kamachikuynin chaskisqanchikman hina cheqap kaqpi kawsachkaqta, chaymi llumpay kusisqa kachkani.

⁵ Señora, kunanñataqmi ruegakamuyki lliwchanchikyá kuyanakusun. Kay qellqamusqayqa manam musoq kamachikuychu, aswanqa ñawpaqmantaraq Diospa qowasqanchik kamachikuymi.

⁶ Kuyanakuyqa Diospa kamachikuyninkunaman hina kawsakuymi, ñawpaq-mantaraq uyarisqaykipi hinapas kama-chiwarqanchikqa kuyanakuspa kawsa-nanchikpaqmi.

Pantachikuqkunamanta

⁷ Achkaq pantachikuqkunam kay pachapi purichkanku, paykunaqa Jesucristopa runa kayninpi hamusqantapas negankum, chayna yachachiqkunaqa pantachikuqmi hinaspa anticristom.

⁸ Cuidakuychikyá tukuy llamkasqaykichikpa ruruynin ama yanqachasqa kananpaq, chaynapi llapan premioykichikta Señorninchikmanta chaskinaykichikpaq.

⁹ Pantaruspa Jesucristopa yachachi-kuyninpi mana takyaq runapiqa Dios-qa manam kanchu. Jesucristopa yacha-chikuyninkunapi takyaq runapim ichaqa Dios Taytapas hinaspa Dios Churipas kachkan.

¹⁰ Sichum pipas qamkuna-man hamuspa mana Jesucristopa yacha-chikuynintachu apamusunkichik hinaptinqa amayá chaskiychikchu nitaq “yaykukamuy” niychikchu.

¹¹ Pipas “yayku-kamuy” niqqa mana allin ruwaqmasin-ñam rikurirun.

Cartapa tukuyninmanta

¹² Achkam qamkunaman qellqamunay kachkan, ichaqa manam cartallawanqa lliwtaqa nimuykichikmanchu, chaymi piensachkani watukamuspayña qamkunawan rimayta, chaynapi anchata kusikunanchikpaq.

¹³ Diosninchikpa akllasqan ñañaykipa wawankunam rimaykamusunkichik. Amén.