2~Crónicas 9 - CHUYA QELLQA La Biblia en Quechua de Ayacucho 2012

Salomonta Sabá nacionpa reinan watukamusqanmanta

¹ Salomón ancha reqsisqa kasqanmanta Sabá nacionpa reinan uyariruspanmi sasa tapukuykunawan pruebananpaq Jerusalén llaqtaman hamurqa, achka serviqninkunawan kuska, camellokunapi miski asnaq perfumekunata, achka qorita hinaspa alhaja rumikunata aparisqa. Salomonpa kasqanman chayaramuspanmi sonqonpi tanteasqanman hina tukuy imata tapurqa.

² Chaymi Salomonñataq lliw tapukuyninta contestarqa, ima tapukuyninpas manam puchurqachu mana contestasqaqa.

³ Sabá nacionpa reinanmi qawaykurqa Salomonpa yachayninta, palacio ruwachisqanta,

⁴ mesanpi tukuy rikchaq mikuykunanta, palacionpi yanapaqninkunapa imaynam kawsasqankuta, serviqninkunapa imaynam servisqanta hinaspa pachankuta, reyman copa serviqkunata hinaspa pachankuta chaynataq Tayta Diosman lliw kañana sacrificio ofrecesqantapas. Chaykunawan admirasqallaña kaspanmi

⁵ reyta nirqa: Cheqapmi kasqa niwasqankuqa, llaqtaypim uyarirqani ruwasqaykimanta hinaspa alli-allin yachayniyuq kasqaykimanta.

⁶ Ichaqa manam creerqanichu ñawiywan kunan rikuykunaykama, imallaraqsi willawasqankuqa, yachaynikiqa uyarisqaymantapas aswanraqmi kasqa.

⁷ ¡Mayna kusisqam runaykikunaqa! ¡Mayna kusisqataqmi serviqnikikunapas! Paykunaqa tukuy tiempoy yachaywan rimasqaykikunata uyarichkanku.

⁸ ¡Yupaychasqayki Tayta Diosyá hatunchasqa kachun! Paymi allinpaq qawaykususpayki rey kanaykipaq trononpi churaykusurqanki; Diosqa Israel nacionta kuyaspan wiñaypaq takyachinanraykum paykunapa reynin kanaykipaq churaykusurqanki, chaynapi derechonpi allinta nanachikunaykipaq, nispa.

⁹ Hinaspanmi rey Salomonman qoykurqa kimsa waranqa isqon pachak soqta chunka kilo qorita, qorqataqmi achkallaña miski asnaq perfumekunatawan kuyayllapaq alhaja rumikunatapas. Kay reinapa qosqanta hina nana-nanaq miski asnaq perfumekunataqa manam pipas Salomonmanqa qorqachu.

¹⁰ Rey Hirampa serviqninkunapas chaynataq Salomonpa serviqninkunapas Ofir lawmanta qorita apamuspankum sándalo qerukunatawan alhaja rumikunata apamurqaku.

¹¹ Chay sándalo qerukunamantam rey Salomón ruwachirqa Tayta Diospa templonpi kaq gradaspi hapipakunata chaynataq kikinpa palacionpi kaq gradaspi hapipakunatapas. Tocaqkunapaqpas arpakunatawan salteriokunatam ruwachirqa. Judá allpapiqa manam haykapipas chaynataqa rikurqakuchu.

¹² Rey Salomonpas Sabá nacionpa reinanmanmi tukuy ima munasqantawan mañakusqanta qoykurqa, apamusqanmantapas mastaraq; hinaptinmi reinaqa serviqninkunapiwan nacionninman kutikurqa.

Salomonpa kapuqninkunamanta hinaspa ancha reqsisqa kasqanmanta

¹³ Salomonmi sapa wata iskay chun-ka iskayniyuq tonelada qorita chaskirqa,

¹⁴ llapa negociantekunapa impuesto pagasqankuqa manam chaykunawan yupas-qakuchu karqa. Arabia lawpi reykunawan nacionpi kamachikuqkunapas qoritawan qollqetam apamurqaku.

¹⁵ Rey Salomonmi qorimanta ruwachirqa iskay pachak escudokunata, sapa escudotam soqta kilo masnin qorimanta ruwachirqa;

¹⁶ ruwachirqataqmi qorimanta kimsa pachak escudokunatapas, sapa escudotam kimsa kilo masnin qorimanta ruwachirqa, hinaspam “Líbano monte” sutiyuq palaciopi churachirqa.

¹⁷ Tiyanan tronotapas marfilmanta ruwachispanmi suma-sumaq qoriwan llusichirqa.

¹⁸ Chay tronoqa soqta gradasniyuqmi karqa, sarupakunanpas qorimantam karqa, kaylaw-waklaw waqtankunapim karqa maki churanankuna, chaykunapa waqtanpim karqa sayachkaq leonkuna.

¹⁹ Chay soqta gradaskunapa kaylaw-waklaw waqtanpipas chunka iskayniyuq leonkunam karqa, huk leonmi karqa sapa gradaspa waqtanpi. Chayna tronotaqa manam maylaw nacionpa reyninpas ruwachirqachu.

²⁰ Rey Salomonpaqa tomanan vasokunapas qorimantam karqa, “Líbano monte” sutiyuq palaciopi serviciokunapas suma-sumaq qorimantam karqa, qollqemantaqa manam imapas karqachu. Salomonpa tiemponpiqa manam qollqetaqa qawariqkupaschu.

²¹ Rey Salomonpa barconkunam rey Hirampa serviqninkunawan Tarsis lawman rispanku sapa kimsa watamanta qorita, qollqeta, marfilta, monokunata hinaspa pavo realkunata apamuqku.

²² Chaynapim rey Salomonqa apu kayninpipas chaynataq yachayninpipas tukuy hinastinpi kaq reykunata masyarurqa.

²³ Kay pachapi llapallan reykunam Salomón qawaykuyta munarqaku hinaspa Diospa yachay qosqan uyariykuyta.

²⁴ Llapallankum qori-qollqeta, serviciokunata, sumaq pachakunata, armakunata, miski asnaq perfumekunata, caballokunata hinaspa mulakunata regalanankupaq sapa wata apamuqku.

Rey Salomonpa rantisqankunamanta

²⁵ Salomonpam karqa caballonkunatawan carretankunata waqaychananpaq tawa waranqa establokuna hinaspa chunka iskayniyuq waranqa sillada tropankuna. Paykunatam carretakunapa kasqan llaqtakunaman churarqa hinaspa Jerusalén llaqtapi reyta waqaychanankupaq.

²⁶ Pay-mi munaychakurqa llapallan reykunapa hawanpi, Eufrates mayumanta qallaykuspa filisteokunapa nacionninkama hinaspa Egipto nacionpa linderonkama.

²⁷ Rey Salomonmi Jerusalén llaqtapi qollqeta huñurachirqa rumita hinaña, cedro sachakunañataqmi Sefela lawpi purun higosta hinaña.

²⁸ Salomonpa caballokunataqa apamurqaku Egipto nacionmantawan huklaw nacionkunamantam.

Rey Salomonpa wañukusqanmanta

²⁹ Salomonpa imaynam kawsasqanwan imakunam ruwasqanpas, qallariyninmanta tukupayninkamam, profeta Natanpa libronpiwan Silo llaqtayuq profeta Ahiaspa libronpi qellqasqa kachkan; qellqasqataqmi kachkan Nabatpa churin Jeroboammanta profeta Iddopa qellqasqan libropipas.

³⁰ Rey Salomonmi Jerusalén llaqtapi tawa chunka wata munaychakurqa.

³¹ Salomón wañuruptinmi “Davidpa Llaqtanwan” sutichasqankupi pamparurqaku, paypa rantinpim churin Roboamña munaychakurqa.