2~Crónicas 8 - CHUYA QELLQA La Biblia en Quechua de Ayacucho 2012

Salomonpa wakin ruwasqankunamanta

¹ Rey Salomonmi Tayta Diospa templontawan kikinpa palacionta iskay chunka watapi ruwachirqa.

² Rey Hirampa qosqan llaqtakunatapas musoqmanta hatarirachispanmi Israelpa mirayninkunataña chaykunapi churarurqa.

³ Chaymantam Soba lawpi Hamat llaqtapa contranpi rispan chay llaqtata Salomón hapikuykurqa.

⁴ Chunniq lawpi kaq Tadmor llaqtatapas kaqmantam ruwachirqa, ruwachirqataqmi kawsaykuna waqaychanan Hamat lawpi llaqtakunatapas.

⁵ Kaqmantam ruwachirqa hanay lawpi kaq Bet-horón llaqtatapas hinaspa uray lawpi Bet-horón llaqtatapas, chay llaqtakunam karqa murallasqa hinaspa cerrojosqa punkuyuq llaqtakuna.

⁶ Musoqmantam ruwachirqa Baalat llaqtatawan kawsaykuna waqaychana llaqtakunatapas, carretakunatawan caballokunata waqaychana llaqtakunatapas. Ruwachir-qataqmi Jerusalén llaqtapi, Líbano lawpi hinaspa lliw munaychakusqan allpapi llapa tukuy ima ruway munasqantapas.

⁷ Heteoku-namanta, amorreokunamanta, ferezeokunamanta, heveokunamanta hinaspa jebuseokunamanta puchuq runakunaqa manam Israelpa mirayninkunachu karqaku.

⁸ Paykunapa puchuq mirayninkunam hinalla chay allpapi yacharqaku Israelpa mirayninkuna mana chinkachisqanrayku, paykunatam Salomón mana imallapaq sasa llamkaykunapi llamkachirqa, chaynam kunankamapas kachkanku.

⁹ Israelpa mirayninkunataqa manam Salomonqa pitapas criadota hinaqa llamkachirqachu, aswanqa soldadokuna, kamachikuqkuna, capitankuna, carreta manejaqkuna hinaspa sillada tropakunam paykunaqa karqaku.

¹⁰ Rey Salomonpam karqa iskay pachak pichqa chunka capatazninkuna, paykunam llamkaqkunata kamachirqaku.

¹¹ “Davidpa Llaqtanwan” sutichasqanku llaqtamantam, Faraonpa warmi churinta Salomón pusarqa paypaq ruwachipusqan wasiman; kaynata nispan: “Manam warmiyqa Israelpa reynin Davidpa wasinpiqa yachanmanchu, Tayta Diospa Arcanpa yaykusqan sitiokunaqa chuyam”, nisqanrayku.

¹² Rey Salomonmi templopa ñawpaqnin patiopi Tayta Diospaq altar ruwachisqanpi lliw kañana sacrificiota Tayta Diosman ofreceq.

¹³ Payqa ofreceq Moisespa kamachisqanman hinam chaypaq akllasqa punchawkunapi, samana punchawkunapi, musoq killa fiestakunapi, watapi kimsa hatun fiestakunapi. Chay fiestakunam karqa: Mana levadurayuq tanta fiesta, semanakunapa tukuynin fiesta hinaspa ramada ruway fiesta.

¹⁴ Sacerdotekunatapas kamachirqataqmi taytan Davidpa kamachisqanman hina muyuyninpi imam ruwanankuta ruwanankupaq, levitakunatapas kamachirqataqmi Tayta Diosta alabaspa sacerdotekunata tukuy ima ruwaypi sapa punchaw yanapanankupaq, punku waqaychaqkunatapas punkukunata muyuyninpi sapakama nanachikunankupaqmi kamachirqa. Chaynatam Diospa serviqnin David kamachikurqa.

¹⁵ Reypa kamachikuyninmantaqa manam sapaqchakurqakuchu llapa sa-cerdotekunapas, levitakunapas, teso-rerokunapas hinaspa tukuy ima ruwaqkunapas.

¹⁶ Salomonqa Tayta Diospa templonta cimientachiy qallarisqanmantam tukuy imata qespichinankama ruwachirqa, chaynatam Tayta Diospa templon ruwayta tukururqa.

¹⁷ Salomonmi rirqa Ezión-geber llaqtaman hinaspa Elat llaqtaman, chay llaqtakunaqa karqa lamar qochapa patanpim, Edom nacionpa allpanpi.

¹⁸ Hirammi serviqninkunawan apachirqa barcokunata, kacharqataqmi barcokunapi llamkaqkunatapas. Paykunam Salomonpa serviqninkunawan Ofir lawman rispanku yaqa chunka pichqayuq tonelada qorita rey Salomonpaq apamurqaku.