2~Crónicas 34 - CHUYA QELLQA La Biblia en Quechua de Ayacucho 2012

Rey Josiaspa munaychakusqanmanta

¹ Josiasqa pusaq watanpim munaychakuyta qallaykurqa. Kimsa chunka hukniyuq watam Jerusalén llaqtapi munaychakurqa.

² Rey Josiasqa Tayta Diospa qayllanpim allinkunata ruwarqa, ñawpaq taytan David hinam kawsarqa, chaymantaqa manam alleqmanpas nitaq ichoqmanpas rakikurqachu.

Rey Josiaspa imakunam ruwasqanmanta

³ Pusaq wataña munaychakuyninpim, rey Josiasqa warmallaraq kachkaspan, ñawpaq taytan Davidpa Diosninta maskayta qallaykurqa. Chunka iskayniyuq wataña munaychakuchkaspanmi, Judá nacionpi chaynataq Jerusalén llaqtapi kaq moqokunapi capillakunata, Asera idolokunata, metalta chulluchispa ruwasqa tukuy rikchaq idolokunata hinaspa rumimanta labrasqa idolokunatapas wischuyta qallaykurqa.

⁴ Paypa qayllanpim Baalpa altarninkunatapas tuñichirqaku, chay altarpa hawanpi kaq incienso kañanankutapas ñutuchirqam; Asera idolokunatawan rumimanta labrasqa metalta chulluchispa ruwasqa rikchaqmana idolokunatapas ñutuparachispanmi polvontapas chay idolokunaman sacrificaq runakunapa sepulturanman machqerachirqa.

⁵ Hina altarkunallapitaqmi chay idolokunapa sacerdotekunapa tullunkunatapas kañarurqa, chaynatam Judá naciontawan Jerusalén llaqtata chuyancharqa.

⁶ Chaynallatam ruwarqa Manasés, Efraín, Simeón hinaspa Neftalí ayllukunapa llaqtankunapipas hinaspa muyuriqninkunapipas.

⁷ Altarkunata, Asera idolokunata, rumimanta labrasqa rikchaqmana idolokunata hinaspa Israel nacionpi incienso kañana altarkunata tuñiparachimuspanmi Jerusalén llaqtaman kutimurqa.

Diospa yachachikuynin libro tarisqanmanta

⁸ Chunka pusaqniyuq wataña munaychakuchkaspanmi, nacionmantawan templomanta millakuypaq kaqkunata wischuchisqanpa qepanta, Azaliapa churin Safanta, gobernador Maasiasta hinaspa Joacazpa churin secretarion Joata kacharqa Tayta Diospa templonta allichamunankupaq.

⁹ Paykunam sumo sacerdote Hilciasman rispanku Tayta Diospa templonpi huñusqanku qollqeta qoykurqaku; chay qollqetam punkukuna nanachikuq levitakuna chaskirqaku Manasés ayllumanta, Efraín ayllumanta, Israel nacionpi yachaq runakunamanta, chaynallataq Judá nacionpi, Benjaminpi hinaspa Jerusalén llaqtapi yachaqkunamantapas.

¹⁰ Chay qollqetam Tayta Diospa templonpi llamkachiq mayordomokunaman qoykurqaku. Paykunam Tayta Diospa templon allichaypi llamkaqkunaman pagarqaku.

¹¹ Qorqakutaqmi carpinterokunamanpas chaynataq maestrokunamanpas labrasqa rumikunatawan qerukunata rantinankupaq. Chay qerukunam karqa armazonninkunapaqwan tableanankupaq. Templo tuñisqa kachkaptinpas Judá nacionpa reyninkunataqa manan imapas qokurqachu.

¹² Chay runakunam allin sonqowan llamkarqaku. Capatazkunam karqaku Leví ayllumanta kaq Meraripa miraynin Jahatwan Abdías, Coatpa miraynin Zacariaswan Mesulam hinaspa rikchaqmana tocanankunata tocaq levitakunapas.

¹³ Paykunam qepiqkunatawan llamkaqkunata kamachirqaku. Levitakunapim karqa secretariokuna, gobernadorkuna hinaspa punkukuna nanachikuqkuna.

¹⁴ Tayta Diospa templonman apamusqanku qollqeta hurqomuchkaptinkum sacerdote Hilcías tarirurqa, Moisesnintakama Tayta Diospa qosqan yachachikuy librota.

¹⁵ Chaymi secretario Safanman Hilcías kaynata willarqa: Tayta Diospa templonpim kamachikuy librota tariruni, nispa. Hinaspanmi Safanman qoykurqa.

¹⁶ Safanñataqmi reyman apaspan kaynata willarqa: Serviqnikikunaqa tukuy ima kamachisqaykitam ruwachkanku.

¹⁷ Tayta Diospa templonpi tarisqanku qollqeta hurqoruspankum llamkachiqkunamanwan llamkaqkunaman qoykamunku, nispa.

¹⁸ Chaymantapas secretario Safanqa nirqataqmi: Sacerdote Hilciasmi kay librota qoykuwan, nispa. Hinaspanmi reypa qayllanpi chay librota leerqa.

¹⁹ Maypacham Diospa leyninta rey uyariykuspanmi pachankunata llikiparqa.

²⁰ Hinaspam sacerdote Hilciasta, Safanpa churin Ahicamta, Micaiaspa churin Abdonta, secretario Safanta hinaspa serviqnin Asaiasta kaynata kamachirqa:

²¹ Rispaykichikyá Tayta Diosta tapumuychik ñoqamanta, Israel nacionpi chaynataq Judá nacionpi puchuq runakunapaqpas, kay tarisqanku libropa imam nisqanmanta; kay libroman hinaqa ñawpaq taytaykichikkuna mana kasukusqankuraykum Tayta Diospa piñakuynin contranchikpi mancharikuyllapaqña kachkan, nispa.

²² Hinaptinmi tapukamunankupaq reypa kachasqan runakunawan Hilcías rirqa, Jerusalén llaqtapi kaq musoq barriopi yachaq profetisa Huldaman. Payqa Ticvapa churin Salumpa warminmi karqa, Ticvañataqmi karqa templopi pachakunata nanachikuq Harhaspa churin. Chayaruspa kaykunata willaykuptinkum

²³ Huldañataq nirqa: Israelpa yupaychasqan Tayta Diosmi kaynata nin: Kachamusuqnikichik runamanmi kaynata ninkichik:

²⁴ Ñoqa Tayta Diosmi nini: Kay Judá nacionpi yachaqkunamanmi hatun ñakariyta chayachimusaq, reypa qayllanpi leesqaykichik libropa nisqan hatun sasachakuykunaman hinaspa ñakariykunaman hina.

²⁵ Ñoqata saqeruwaspankum tukuy rikchaq idolokunamanña inciensota kañarqaku, chaykunata ruwaspankum piñachiwarqaku, chayraykum kay llaqtaman piñakuyniyta kacharimuptiy mana taninqachu, nispa.

²⁶ Ichaqa Israelpa yupaychasqan Tayta Diosta tapuwanaykichikpaq kacha-musuqnikichik Judá nacionpa reynintam kaynata nimunkichik: Israelpa yupaychasqan Tayta Diosmi kaynata nin: Kay Libropa imam nisqanta uyarispayki

²⁷ sonqoykipi llakikuspa, kay nacionpa chaynataq runankunapa contranpi rimasqayta uyarispa, qayllaypi uchuychakuspa pachaykikunatapas llikipaspa waqasqaykiraykum ñoqapas uyariykuyki.

²⁸ Chayraykum ñawpaq taytaykikuna hina wañukuspaqa hawkayaypim pampasqa kanki. Kay llaqtapa chaynataq runankunapa contranpi ñakariy apachimusqaytaqa manam rikunkichu, nispaykichik. Chaymi kutirispanku reyman chaynata willamurqaku.

²⁹ Hinaptinmi Judá nacionpi chaynataq Jerusalén llaqtapi llapallan ancianokunata rey Josías huñurachimurqa.

³⁰ Chaymantam reywan kuska Judá nacionpi yachaqkuna, Jerusalenpi yachaqkuna, sacerdotekuna, levitakuna hinaspa llapallan runakuna taksapas hatunpas Tayta Diospa templonman rirqaku; paykunapa qayllanpim reyqa leerqa, templopi tarisqanku Tayta Diospa pacto ruwasqan librota.

³¹ Chaymantam reyqa pilarpa waqtanpi sayaykuspan Tayta Diospa qayllanpi pactota ruwarqa, chayman hinam prometekurqa Tayta Diosta qatinanpaq, kamachikuyninkunatapas, yachachikuyninkunatapas tukuy sonqonwan hinaspa tukuy kawsayninwan kasukunanpaq; prometekurqataqmi Diospa pacto ruwasqan libropa nisqankunata kasukunanpaqpas.

³² Chaymantam Jerusalenpi hinaspa Benjaminpi yachaqkunatapas kasukunankupaq prometechirqa; chaymi Jerusalenpi yachaqkunaqa ruwarqaku ñawpaq taytankupa yupaychasqan Tayta Diospa pacto ruwasqanman hina.

³³ Rey Josiasmi Israelpa mirayninkunapa yachasqan allpapi kaq millakuypaq kaqkuna ruwasqankuta chinkarachirqa, hinaspam Israel nacionpi llapallan runakunata kamachirqa Tayta Diosta yupaychanankupaq. Rey Josías kawsa-nankamaqa manam Diosmanta rakikurqakuchu, aswanqa ñawpaq taytankupa yupaychasqan Tayta Diostam kasukurqaku.